Daily Archives: May 22, 2024

صوبائی محکمہ داخلہ نے خیبر پختونخوا پولیس کی سفارشات پر جاری مراسلہ میں قرار دیا ہے کہ ضم شدہ اضلاع سے تعلق رکھنے والے خاصہ دار فورس کے اہلکار بھی پینشن کے حقدار تصور ہونگے.
تفصیلات کے مطابق فاٹا انضمام کے بعد سابقہ لیویز اور خاصہ دار خیبر پختونخوا پولیس میں ضم کر دئیے گئے تھے۔واضح رہے کہ انضمام سے قبل خاصہ داروں کی پینشن کی بجائے اُنکے بیٹے کو ملازمت دی جاتی تھی۔ صوبائی پولیس میں انضمام کے بعد سابقہ خاصہ دار پولیس میں 10سال سے کم مدت ملازمت کی وجہ سے پینشن کے حقدار نہ ٹھہرتے تھے۔ انسپکٹر جنرل آف پولیس خیبر پختونخوا جناب اختر حیات خان نے ضم خاصہ داروں کو پینشن کی فراہمی کے اس دیرینہ مطالبہ کے پیش نظرسنٹرل پولیس آفس میں ایڈیشنل انسپکٹر جنرل ہیڈ کوارٹرز اول خان کی سربراہی میں کمیٹی تشکیل دی۔جن کی سفارشات پر سمری صوبائی حکومت کو ارسال کی گئی۔جس پر محکمہ داخلہ صوبہ خیبر پختونخوا نے اس مسئلے کی اہمیت کو مد نظررکھتے ہوئے مروجہ قوانین کے تحت تمام ضم اہلکاروں کو پینشن دینے کا مراسلہ جاری کر دیا۔ صوبائی حکومت کے اس مراسلے کے مطابق ضم شدہ اضلاع کے خاصہ دار اب پینشن کے اہل ہونگے۔اس فیصلے سے ضم اضلاع کے پولیس اہلکاروں کا دیرینہ مسئلہ حل ہو گیا ہے۔انسپکٹر جنرل اختر حیات خان نے صوبائی محکمہ داخلہ کے اس اقدام کو سراہتے ہوئے پینشن کے حصول کوضم اضلاع کی پولیس کیلئے خوش آئند قرار دیا اور مبارکباد دی۔

باجوڑ ہنر مند نوجوان پروگرام کا چوتھا تربیتی کورس اختتام پزیر،75 طلباء کو اسناد اور انعامات سے نوازا گیا۔ پاک فوج کے زیر اہتمام باجوڑ کی نوجوان نسل کو باصلاحیت اور ہنر مند بنانے کیلئے بٹوار میں حال ہی میں ہنر مند نوجوان پروگرام کا چوتھا تربیتی کورس اختتام پزیر ہوا جس میں 75 طلباء کو آٹو مکینک، الیکٹریشن، ویلڈنگ اور کمپیوٹر کورسز کی تربیت دی گئی۔ اسی سلسلے کی کانووکیشن تقریب میں مقامی کمانڈنگ آفیسر لیفٹیننٹ کرنل مظفر احمد چیمہ (مہمان خصوصی) سمیت اساتزہ ،معززین علاقہ اور طلباء نے کثیر تعداد میں شرکت کی۔ کمانڈنگ آفیسر نے تمام طلباء کو سرٹیفکیٹس کے ساتھ ساتھ اعلیٰ کارکردگی دکھانے والے طلباء میں لیپ ٹاپ، ٹول کٹس، ویلڈنگ مشین، الیکٹرک کٹس اور نقد انعامات بھی تقسیم کئے۔ ملک و مشران نے پاک فوج کی اس کاوش کو خوب سراہا اور کہا کہ نوجوانوں کا اس تربیتی کورس میں بڑھ چڑھ کر حصہ لینا ایک روشن صبح کی نوید ہے۔

ریلوے انتظاميہ نے 1 کلو میڑ سے 200 کلو میٹر تک سفر کرنے والے مسافروں کے لیے ٹرینوں کے کرایوں میں کمی کر دی ہے۔کرایوں میں کمی کا اطلاق پشاور سے چلنے والی تمام ٹرینوں کی ہر کلاس پر ہوگا۔پشاور سے نوشہرہ ،جہانگیرہ ، اٹک سٹی،  حسن ابدال ،ٹیکسلا، راولپنڈی  جانے والے مسافر اس رعایتی کرایوں سے مستفید ہوسکیں گے۔اس سے قبل پشاور سے راولپنڈی اکانومی کلاس کا کرایہ 700 روپے  تھا جسے سے کم  کر کے اب 600 روپے  کر دیا گیا ہے ۔پشاور سے نوشہرہ کا کرایہ 250 سے کم کر کے  150 روپے کر دیا گیا ہے ۔پشاور سے جہانگیرہ کا کرایہ کا کرایہ 300 سے کم کر کے 200 روپے کر دیا گیا ہے اسی طرح پشاور سے اٹک سٹی کا کرایہ 350 روپے سے کم کر کے 300 کر دیا گیا ہے پشاور سے حسن ابدال کا کرایہ 650 سے کم کر کے 400 روپے کر دیا گیا ٹیکسلا کا کرایہ 650 روپے سے کم کر کے 450 روپے کر دیا گیا ہے۔واضح رہے عوام ایکسپریس ، رحمان بابا ایکسپریس اور خیبر میل ایکسپریس کا کرایہ کم سے کم کسی بھی سٹیشن کا 250 روپے تھا جسے اب صرف 100 روپے کر دیا گیا ہے۔اسی طرح جعفر ایکسپریس کا کرایہ جو کہ کم از کم 300 روپے تھا اسے کم کر کے 150 روپے کر دیا گیا ہے۔ریلوے حکام نے ٹرینوں کے کرایوں میں کمی کا نوٹیفکیشن جاری کردیا ہے۔جس پر کل سے عمل درآمد کا آغاز  کر دیا گیا ہے۔

 تقریباً 300 کے قریب پاکستانی طلبہ کو بحفاظت وطن واپس لایا گیا ہے۔ کرغزستان سے آنے والے پاکستانی طبلہ کو خوش آمدید کہنے کے لئے وزیراعلی خیبرپختونخوا علی امین گنڈاپور سمیت صوبائی وزراء، ڈی جی پی ڈی ایم اے اور اعلی حکام پشاور ائیرپورٹ پر موجود ہیں ۔کرغزستان سے آنے والے پاکستانی طلبہ کے والدین کی بڑی تعداد اپنے پیاروں سے ملنے کے لیے ائرپورٹ پر موجود ہے۔کرغزستان میں میں موجود دیگر پاکستانیوں کو وطن واپس لانے کے لئے دوسری پرواز آج صبح راونہ کی جائے گی۔کرغزستان میں پھنسے پاکستانی طلبہ و طلبات کی مزید لسٹنگ بھی گوگل فارم کے زریعے کی جا رہی ہے۔معلومات و رہنمائی کیلئے کرغزستان میں پھنسے پاکستانی طلبہ و طلبات واٹس ایپ نمبرز(03433333049)(03440955550) جبکہ والدین پی ڈی ایم اے کی ہیلپ لائن 1700 پر رابطہ کریں۔

پاک چین سفارتی تعلقات کے قیام کی 73 ویں سالگرہ کی تقریب منعقد ہو ئی ۔ تقریب کے مہما ن خصو صی گورنر خیبرپختونخوافیصل کریم کنڈی نے پاک چین دوستی سے متعلق ویڈیو کا باضابطہ افتتاح کیااور 73 ویں سالگرہ کا کیک بھی کاٹا ۔ تقر یب میں  پشاور میں افغانستان کے قونصل جنرل حافظ محب اللہ،بشپ آف پاکستان ارنسٹ جیکب اور زندگی کے مختلف شعبوں سے تعلق رکھنے والی شخصیات نے  شرکت کی ۔گورنر نے چائنہ ونڈو کی مختلف گیلریاں دیکھیں، فرینڈ شپ وال پر دستخط کئے اور مہمانوں کی کتاب میں اپنے تاثرات بھی درج کئے۔گورنر وفاقی حکومت کی جانب سے اہل چین کو دوستی کی73 ویں سالگرہ کے موقع پر مبارکبادبھی دی ۔پاک چین دوستی ہمالیہ سے بلند، شہد سے میٹھی اور سمندر سے گہری ہے۔برادر ہمسایہ ملک چین نے ہر مشکل وقت میں پاکستان کا ساتھ دیا اور پاکستان بھی کبھی پیچھے نہیں رہا۔سی پیک سے پاکستان میں معاشی و اقتصادی ترقی کا ایک نیا دور شروع ہو گا۔رشکئی اکنامک زون صوبے میں معاشی سرگرمیوں میں اضافہ سمیت لوگوں کو روزگار فراہم کرنے کا باعث ہوں گے۔گورنرفیصل کریم کنڈی کی چائنہ ونڈو میں میڈ یاسے بھی گفتگو میں کہا کہ آج پاکستان کے ہر کونے میں چائنیزبھائی کام کرتے نظر آرہے ہیں۔گذشتہ مہینے صوبے میں ایک بدقسمت حادثہ بھی ہوا لیکن ملک دشمنوں کی سازش کامیاب نہیں ہوئی اورہماری دوستی میں نہ تو دراڑ آئی اور نہ ہی کبھی آئے گی۔ہماری جب بھی چائنہ وفد سے ملاقات ہوتی ہیں تو اُن سے طلباء کیلئے سکالرشپس کے حوالے سے ضرور بات ہوتی ہے۔میں اپنا کردار آئین کے مطابق ادا کروں گا۔صوبہ میں واقعی زیادہ لوڈشیڈنگ ہو رہی ہے جبکہ ہمارا صوبہ سستی بجلی بھی پیدا کر رہا ہے، بجلی کی تینوں کمپنیاں صوبے کو مل جانی چاہئیں۔چیئرمین واپڈا سے ملا ہوں اس سے بھی پانی و بجلی کے حقوق پر بات کی ہے۔نہیں چاہتا کہ مرکز اور صوبہ کی لڑائی میں صوبہ کی ترقی رُک جائے،پہلے ہی ہمارا صوبہ ترقی کی رفتار میں بہت پیچھے رہ گیا ہے۔مرکز سے چیزیں دھمکی دھونس سے نہیں بلکہ دلیل و مذاکرات سے لینے ہوں گے۔پاکستانی ریاست اور حکومت ایسے کسی بھی لوگوں یاگروہ سے مذاکرات نہیں کرے گی جو ریاستی اداروں اور عوام پر حملہ آور ہوتے ہیں۔صوبے میں تعلیمی انقلاب لانے کے نعرے لگانے والے وائس چانسلر ہی نہیں لاسکتے، صوبے میں 20  سے زیادہ یونیورسٹی میں وائس چانسلرز نہیں ہیں۔