ضلعی انتظامیہ پشاور کی جانب سے 5 فروری یوم یکجہتی کشمیر کے موقع پر کشمیری عوام سے اظہار یکجہتی کے لیے خصوصی تقریبات، واکس اور سیمینارز کا انعقاد کیا گیا۔ اس موقع پر حکومتی و ضلعی انتظامیہ کے اعلیٰ افسران، تاجر برادری، تعلیمی اداروں کے طلباء و طالبات، سول سوسائٹی، صحافی برادری اور مختلف مکاتب فکر سے تعلق رکھنے والے افراد نے بھرپور شرکت کی۔
یوم یکجہتی کشمیر کے سلسلے میں ضلعی انتظامیہ پشاور کی جانب سے وزیر اعلیٰ سیکریٹریٹ سے گورنر ہاؤس تک ایک بڑی یکجہتی واک کا انعقاد کیا گیا، جس میں گورنر خیبر پختونخوا فیصل کریم کنڈی، وزیر برائے سماجی بہبود سید قاسم علی شاہ، چیف سیکریٹری خیبر پختونخوا ندیم اسلم چوہدری، کمشنر پشاور ڈویژن ریاض خان محسود، ڈپٹی کمشنر پشاور سرمد سلیم اکرم سمیت مختلف سرکاری اداروں کے افسران، تاجر برادری، اساتذہ، طلباء و طالبات اور سول سوسائٹی کے افراد نے بڑی تعداد میں شرکت کی۔
واک کے شرکاء نے ہاتھوں میں بینرز اور پلے کارڈز اٹھا رکھے تھے جن پر “کشمیر پاکستان کی شہ رگ ہے”، “ہم کشمیریوں کے ساتھ ہیں”، “کشمیر کی آزادی ہمارا مشن ہے” جیسے نعرے درج تھے۔ واک میں شامل افراد نے زبردست نعرے بازی کرتے ہوئے بھارتی مظالم کی مذمت کی اور کشمیریوں کی جدوجہد آزادی کو خراج تحسین پیش کیا۔
واک کے دوران مقررین نے خطاب کرتے ہوئے کہا کہ کشمیری عوام 75 سال سے بھارتی ظلم و جبر کا شکار ہیں۔ بھارت نے مقبوضہ کشمیر میں انسانی حقوق کی سنگین خلاف ورزیاں کی ہیں اور کشمیری عوام پر ظلم و بربریت کے پہاڑ توڑ رکھے ہیں۔ مقررین نے کہا کہ پاکستان ہمیشہ کشمیری عوام کے ساتھ کھڑا ہے اور کھڑا رہے گا۔ انہوں نے عالمی برادری اور اقوام متحدہ سے مطالبہ کیا کہ وہ بھارت کے ان مظالم کا نوٹس لے اور کشمیری عوام کو ان کا حق خودارادیت دلوائے۔
پشاور شہر کے مختلف علاقوں میں بھی یوم یکجہتی کشمیر کے حوالے سے مختلف ریلیاں نکالی گئیں اور تعلیمی اداروں میں خصوصی تقریبات کا انعقاد کیا گیا۔
پشاور کے مختلف اسکولوں، کالجز اور جامعات میں یوم یکجہتی کشمیر کے حوالے سے خصوصی سیمینارز اور تقریری مقابلوں کا اہتمام کیا گیا۔ ان تقریبات میں طلباء نے کشمیری عوام کی جدوجہد آزادی پر روشنی ڈالی اور مظلوم کشمیری بہن بھائیوں کے لیے دعا کی۔
واک اور تقریبات میں شریک افراد نے کہا کہ کشمیر پاکستان کی شہ رگ ہے اور کشمیری عوام کی قربانیاں رائیگاں نہیں جائیں گی۔ انھوں نے کہا کہ بھارت نے ظلم و جبر کے ذریعے کشمیری عوام کی آواز دبانے کی کوشش کی ہے لیکن وہ ناکام ہوگا۔ مقررین نے مزید کہا کہ اقوام متحدہ اور عالمی برادری کو چاہیے کہ وہ اس دیرینہ مسئلے کو حل کرے اور کشمیری عوام کو ان کا جائز حق دلوائے۔
واضح رہے کہ پشاور میں یوم یکجہتی کشمیر کو جوش و خروش کے ساتھ منایا گیا اور عوام نے ہر سطح پر کشمیری بھائیوں کے ساتھ یکجہتی کا اظہار کیا۔ واک اور تقریبات میں شریک تمام افراد نے اس عزم کا اظہار کیا کہ کشمیر کی آزادی تک جدوجہد جاری رہے گی۔
