Daily Archives: March 13, 2025

ڈی جی آئی ایس پی آر لیفٹیننٹ جنرل احمد شریف چوہدری نے نجی ٹی وی سے تفصیلی گفتگو میں جعفر ایکسپریس اور سینکڑوں مسافروں کو کالعدم بی ایل اے کی جانب سے یرغمال بنانے کے غیر معمولی واقعے کی تفصیلات جاری کرتے ہوئے کہا کہ آپریشن مکمل کرلیا گیا ہے اور یہ کہ دہشت گردوں اور ان کی سہولت کاروں کے علاوہ ان کے حامیوں کے ساتھ بھی کوئی رعایت نہیں برتی جائے گی۔ ان کے مطابق اس تمام حساس صورتحال کے نتیجے میں 30 سے زائد دہشت گردوں کو ہلاک کردیا گیا جبکہ 21 مسافروں اور 4 سیکورٹی اہلکاروں نے شہادت پائی۔ ان کا مزید کہنا تھا کہ تین چار مختلف سیکورٹی اداروں نے اس آپریشن میں حصہ لیتے ہوئے اس کو کامیاب بنایا اور یہ کہ اس دہشت گرد کارروائی میں ملوث دہشت گرد وائرلیس پر افغانستان میں موجود اپنے ماسٹر مائنڈ سے مسلسل ہدایات لیتے رہے۔ ان کے بقول ” گیم ” کی شرائط تبدیل ہوگئی ہیں اور ریاست عوام کی مدد سے ملک سے انتہا پسندی اور دہشت گردی کے خاتمے کے لئے نہ صرف پُرعزم ہے بلکہ اس کی قوت اور صلاحیت بھی رکھتی ہے۔ ڈی جی آئی ایس پی نے ایک سوال کے جواب میں کہ اگر ایک جانب بھارتی میڈیا نے پروپیگنڈا پر مشتمل پاکستان مخالف مواد کے ذریعے غلط بیانی سے کام لیا تو دوسری طرف پاکستان کی ایک مخصوص پارٹی اور اس کے حامیوں نے بھی مایوسی پھیلانے اور پروپیگنڈا کرنے میں کوئی کسر نہیں چھوڑی۔
اس میں کوئی شک نہیں کہ دہشت گرد گروپ نے جس پلاننگ کے تحت یہ کارروائی ڈیزائن کی اس کے نتیجے میں فورسز کے لیے آپریشن کرانا نہ صرف یہ کہ ایک مشکل بلکہ رسکی ٹاسک تھا کیونکہ سینکڑوں مسافروں کو درجنوں افراد نے یرغمال بنادیا تھا اور ان میں خودکش بمبار بھی شامل تھے۔ اس قسم کی صورتحال میں بہت زیادہ ذمہ داری اور فل پروف اقدامات سے کام لینا پڑتا ہے تاکہ یرغمالیوں کا کم سے کم جانی نقصان ہو تاہم ریاست مخالف افراد نے حالات کی حساسیت کا ادراک کیے بغیر فورسز کو نہ صرف مورد الزام ٹھہرایا بلکہ بنیادی نوعیت کی غلط اطلاعات بھی فراہم کیں۔ بلاشبہ اس تمام تر کوششوں میں 9 مئی کے واقعات میں ملوث پارٹی اور بیرون ملک مقیم اس پارٹی کے حامی یوٹیوبرز نے حسب معمول بنیادی کردار ادا کیا اور غالباً یہی وجہ ہے کہ ڈی جی آئی ایس پی آر نے بھی اشارتاً ان عناصر کی نشاندھی بھی کی۔
اس میں کوئی شک نہیں کہ پاکستان کو بہت پیچیدہ سیکورٹی صورتحال کا سامنا ہے مگر اس سے زیادہ خطرناک بات یہ ہے کہ بعض پولیٹیکل اسٹیک ہولڈرز نظام سے فوائد حاصل کرنے کے باوجود کالعدم ٹی ٹی پی اور بی ایل اے جیسے گروپوں کی حمایت اور وکالت کرتے آرہے ہیں ۔ فیک نیوز اور پروپیگنڈا مہم میں شریک مخصوص لوگ حقوق اور سیاسی شکایات کی آڑ میں جاری دہشت گردی کو جائز سمجھتے ہوئے دہشتگردی کا جواز فراہم کرتے ہیں اور اس گیم میں عوام کو ریاست کے خلاف استعمال کرنے سے گریز نہیں کرتے۔
ڈیجیٹل دہشتگردی عام یا مروجہ دہشتگردی سے زیادہ خطرناک عمل ہے اس لیے لازمی ہے کہ اس قسم کی سرگرمیوں میں مصروف عمل عناصر کے ساتھ سختی کے ساتھ نمٹا جائے اور ان کے ساتھ وہی سلوک کیا جائے جو کہ دہشت گردوں کے ساتھ کیا جاتا ہے۔
اقوام متحدہ ، یورپی یونین ، امریکہ ، چین اور ایران سمیت متعدد عالمی اداروں اور ممالک نے دہشت گردی کے اس واقعے کی نہ صرف یہ کہ کل کر مذمت کی بلکہ پاکستان کو انسداد دہشت گردی کی مد میں ہر ممکن تعاون کی یقین دھانی بھی کرائی ہے۔
یہاں اس بات کا جائزہ لینا بھی ضروری ہے کہ مسائل کے حل اور محرومیوں کے خاتمے کے لئے کھلی دہشتگردی پر مبنی جو راستہ ان گروپوں نے اختیار کر رکھا ہے وہ کس حد تک درست ہے کیونکہ اس تمام صورتحال کے دوران عام لوگ بڑی تعداد میں نشانہ بننے لگے ہیں اور مذکورہ ریاست مخالف عناصر اس معاملے کی مذمت بھی نہیں کرتے بلکہ وہ دہشت گردی کو جواز فراہم کرتے ہیں۔
عقیل یوسفزئی