Daily Archives: April 20, 2022

الیکشن کمیشن نے خیبرپختونخوا کے بلدیاتی انتخابات کے دوسرے مرحلے میں امیدواروں کے وفات کی وجہ سے ملتوی ہونیوالے مختلف کیٹیگریز کے انتخابات کے لئے نیا شیڈول جاری کردیا۔
پولنگ 22 مئی کو ہوگی۔اور آج 20 اپریل کو پبلک نوٹس جاری کیا جائیگا۔ جبکہ 21 سے 23 اپریل تک کاغذات نامزدگی جمع کئے جائینگے۔25 اپریل کو امیدواروں کے نام جاری کئے جائینگے۔ 26 تا 28 اپریل ان کاغذات کی جانچ پڑتال کی جائیگی۔ کاغذات کی درستگی اور مسترد ہونے کے خلاف اپیلیں 29 تا 30 اپریل جمع کئے جاسکیں گے۔ جبکہ ٹرائیبونل ان اپیلوں پر فیصلہ 9 مئ تک کریگا۔10 اپریل کو امیدواروں کی نظرثانی شدہ فہرست جاری کی جائیگی۔ امیدوار اپنے کاغذات 11اپریل تک واپس لے سکیں گے۔ 12 مئ کو امیدواروں کی حتمی فہرست جاری کرکے ان کو نشانات الاٹ کئے جائینگے۔ جن اضلاع میں یہ انتخابات ہورہے ہیں ان میں ضلع کرم ، شمالی وزیرستان، جنوبی وزیرستان، ایبٹ آباد، مانسہرہ، ملاکنڈ اور لوئر دیر شامل ہیں جہاں ویلیج کونسلوں میں جنرل، یوتھ مزدور و کسان اور خاتون کی نشست پر امیدوار وفات پاگئے تھے ۔اور انتخابی عمل کو روک دیا گیا تھا۔

پشاور میں تعینات افغان کونسل جنرل حافظ محب اللہ کہتے ہیں کہ تجارت پیغمبری پیشہ ہے اس لیے بھی اسکی دل سے عزت اور قدر کرتے ہیں ، اسلامی اقدار کو لے کر دنیا کے ساتھ چلیں گے ، پاکستان ہمارہ برادر اسلامی ہمسایہ ملک ہے ، ہم چاہتے ہیں کہ دونوں ملکوں میں سیاسی اور معاشی روابط مضبوط ہوں تاکہ کاروبار کو ترقی ملے اور دونوں جانب کی عوام کو امن و ترقی نصیب ہو، فیڈریشن آف پاکستان چیمبرز آف کامرس اینڈ انڈسٹری کے وفد نے افغان کونسل جنرل کے خیالات سے اتفاق کرتے ہوئے دونوں ملکوں کے مابین حائل تکنیکی روکاوٹوں کو دور کرنے کے لیے وفود کے تبادلے اور مذاکرات پر زور دیا تاکہ حکومتوں کو بارڈرز تجارت کے لیے کھلے رکھنے بارے قائل کرنے میں مدد مل سکے ۔

ان خیالات کا اظہار گزشتہ روز افغان کونسل جنرل حافظ محب اللہ سے ملاقات کے دوران کیا گیا ۔ ایف پی سی سی آئی وفد میں موجودہ ریجنل کوآرڈینیٹر سرتاج احمد خان ، سابق صوبائی نائب صدر عدنان جلیل اور مہمند چیمبر آف کامرس کے صدر سجاد علی خان شریک تھے جبکہ اس موقع پر کمرشل اتاشی واحد اللہ ہمت اور ڈپٹی کمرشل اتاشی حامد اللہ فضل خیل بھی موجود تھے ۔ پاک افغان عہدیداروں کی اس بیٹھک میں دو طرفہ تعلقات اور باہمی دلچسپی کے امور پر تبادلہ خیال کیا گیا اور مستقبل کے لیے عملی جدوجہد کرنے پر اتفاق کیا گیا ۔ افغان کونسل جنرل کو بریف کرتے ہوئے ایف پی سی سی آئی کے وفد بالخصوص سرتاج احمد خان کا کہنا تھا کہ پاک افغان تجارت میں ہمیشہ سے ریجنل ٹریڈ کو وہ اہمیت نہیں مل سکی جو اسکا حق بنتی ہے کیونکہ صوبہ خیبر پختونخوا افغانستان کے قریب ترین ہونے کے علاوہ بھی کئی ایک حوالوں سے اپنی الگ پہچان رکھتا ہے ۔

انہوں نے بتایا کہ ایف پی سی سی آئی چاہتی ہے کہ پشاور میں پاک افغان ایکسپو کو خصوصی توجہ دی جائے کیونکہ یہ دونوں ملکوں کے کاروباری طبقے سمیت عوام کے لیے روزگاراور معاشی ترقی کی راہیں کھولے گا۔ پشاور میں یہ صنعتی نمائش اور اس جیسی سرگرمیاں آگے چل کر دونوں ملکوں کی تعمیر و ترقی یقینی بنائینگی ۔ سرتاج احمد خان کا کہنا تھا کہ ہماری خواہش ہے کہ کنڑ اور دیگر بارڈر ایریاز میں وفود کے تبادلے کیے جائیں تاکہ ایک دوسرے کے ساتھ مل بیٹھ کر بات چیت کرنے اور مستقبل کے لائحہ عمل بنانے میں مدد مل سکے ۔ وفود کے تبادلوں اور باہمی گفت و شنید سے ہی حکومتوں کو بھی تجارتی سرگرمیاں بڑھانے اورصنعتکاروں کے لیے سازگار ماحول فراہم کرنے پر قائل کیا جاسکتا ہے ۔ وفد سے بات چیت کرتے ہوئے افغان کونسل جنرل حافظ محب اللہ کا کہنا تھا کہ ہم کھلے دل سے تجارت اور کاروبار کی ترقی کے لیے کیے جانے والے اقدامات کا خیر مقدم کرینگے تاکہ دونوں ملکوں کے عوام کو اسکے ثمرات میسر آسکیں ۔ انہوں نے کہا کہ کاروبار اور بالخصوص تجارت کے پیشے کی قدر تو اس لیے بھی ہمارے دل میں زیادہ ہے کیونکہ یہ پیغمبری پیشہ ہے ۔ ہمارہ یقین ہے کہ ایک دوسرے کے ساتھ تجارت بڑھانے میں برکت ہے ۔ تجارت کو فروغ ملے گا تو پاکستان اور افغانستان میں سیاسی روابط بھی مضبوط ہونگے جو دونوں ملکوں میں امن و آشتی قائم رکھنے اور ترقی کرنے کے لیے وقت کی اہم ضرورت ہے ۔ افغان کونسل جنرل نے کہا کہ پاک افغان ایکسپو کی کامیابی کے حوالے سے ذمہ داران مل بیٹھ کر حتمی فیصلے کریں اس ایکسپو کا کامیاب بنانے کے لیے جوبھی طریقہ کار وضح کیا گیا اس میں افغان حکومت بھر پور ساتھ دیگی ۔

اس ایکسپو میں دونوں جانب کی ثقافت چھلکنی چاہیے ، یہاں وہاں کی مصنوعات کو بھر پور طریقے سے اس میں پیش کیا جائے تاکہ تاجر کو اعتبار ملے اور عوام کو مصنوعات تک رسائی ممکن ہو سکے ۔ افغان کونسل جنرل نے کہا کہ پاکستان تو ہے ہی لیکن افغان قوم اس صوبہ خیبر پختونخوا اور پشاور کو بھی بڑی قدر کی نگاہ سے دیکھتے ہیں ۔ ویزے کے حصول میں آسانیاں پیدا کرنا اور مستقبل میں ایک دوسرے کے بازاروں کے دورے کرکے کاروبار کو فروغ دینا ہماری بھی خواہش ہے اور امید ہے پاکستان اور خیبر پختونخوا حکومت بھی اس سے اتفاق کرینگے ۔

چیف جسٹس پشاور ہائی کورٹ، پشاور کی خصوصی ہدایت پر سول جج کی عدالت نے شمالی وزیرستان میں کام شروع کر دیا جس کیلئے ڈسٹرکٹ اینڈ سیشن جج شمالی وزیرستان عثمان ولی خان نے ابتدائی انتظامات مکمل کر لئے , سول جج / جوڈیشل مجسٹریٹ کی تعیناتی فوری بنیادوں پر کی گئی ہے۔

تفصیلات کے مطابق چیف جسٹس پشاور ہائی کورٹ، پشاور قیصر رشید کی ہدایات پر رجسٹرار پشاور ہائی کورٹ، پشاور انعام اللہ خان نے سول جج / جوڈیشل مجسٹرٹ برائے میران شاہ ضلع شالی وزیرستان کی تعیناتی کے احکامات جاری کر دئیے جس کیلئے جسٹس صاحبزادہ اسد اللہ پیشاور ہائی کورٹ بنوں بنچ کی زیر نگرانی ڈسٹرکت اینڈ سیشن جج شمالی وزیرستان عثمان ولی خان نے ابتدائی انتظامات مکمل کرلئے اور زاہد علی خان بطور سول جج کی تعیناتی فوری بنیادوں پر کر دی گئی ہے۔

اس موقع پر ڈسٹرکٹ اینڈ سیشن جج شمالی وزیرستان عثمان علی خان نے کہا کہ پشاور ہائی کورٹ کی اولین تر جیح ہے کہ سائلین کو سستا انصاف فراہم کرنے کیلئے ہنگامی بنیادوں پر متعلقہ سول جج کی تعیناتی کی گئی ہے اس سے سائلین کو اضافی اخراجات برداشت نہیں کرنے پڑیں گے اور انکو گھر کی دہلیز پرسستا انصاف میسر ہو گا اور سائلین کو بے جاسفری تکالیف کا سامنا نہیں کرنا پڑے گا۔

ڈسٹرکٹ اینڈ سیشن جج شمالی وزیرستان عثمان ولی خان نے تمام تر انتظامات مکمل کرنے میں تعاون پر ڈپٹی کمشنر شمالی وزیرستان شاہد علی خان اور ڈی پی او شمالی وزیرستان عقیق حسین کا بھی شکریہ ادا کرتے ہوئے کہا کہ انہوں نے ہر طرح کی ہمیں معاونت فراہم کی اور سول جج کی شمالی وزیرستان میں تعیناتی کو یقینی بنایا۔

ویمن یونیورسٹی صوابی: یونیورسٹی حدود میں موبائل فونز کے استعمال پر پابندی عائد۔
ویمن یونیورسٹی صوابی کے ترجمان نے کہا ہے کہ ویمن یونیورسٹی صوابی میں مختلف شکایات آرہی تھیں کہ طالبات کلاسز کے دوران موبائل فونز استعمال کررہی ہیں جس سے تعلیمی سرگرمیاں متاثر ہورہی تھیں اس کے علاوہ یونیورسٹی حدود میں طالبات کی جانب سے مختلف موبائل ایپ جب میں ٹک ٹاک بھی شامل ہیں ان کے استعمال کی شکایات بھی موصول ہوئیں۔ ان تمام سرگرمیوں کی وجہ سے یونیورسٹی کا تعلیمی ماحول اور وقار متاثر ہورہا تھا لہذا یہ فیصلہ کیا گیا ہے کہ یونیورسٹی حدود بالخصوص کلاسز میں طالبات کی جانب سے موبائل فونز کے استعمال پر مکمل پابندی ہوگی اور اس کی خلاف ورزی پر جرمانہ بھی عائد کیا جائے گا۔ یونیورسٹی ڈسپلن پر کسی قسم کا سمجھوتا نہیں کیا جائے گا۔پڑھائی کے اوقات میں سوشل میڈیا ایپلیکشنز کا استعمال کرتے ہیں، جس سے طلبہ کی پڑھائی، اخلاقیات اور کارکردگی متاثر ہورہی ہے۔