پشاور۔ خیبر پختونخوا ریونیو اتھارٹی (کیپرا) نے شاندار کارکردگی کا مظاہرہ کرتے ہوئے مالی سال 22-2021 میں دئیے گئے ہدف سے 3 ارب زیادہ کے محاصل اکٹھے کرلئے.
تفصیلات کے مطابق کیپرا نے مالی سال 22-2021 کے دوران 30 ارب روپئے سے زیادہ کے محاصل اکھٹے کرکے نہ صرف دئیے گئے ہدف کو حاصل کیا بلکہ صوبائی حکومت کی جانب سےمالی سال 22-2021 کے لئے دیئے گئے 27 ارب روپے کے ہدف سے تین ارب اضافی محاصل اکٹھے کر لیے۔
ترجمان کیپرا کے مطابق سال21-2020 کے مقابلے میں رواں برس کیپرا کے محاصل میں 45 فیصد کا اضافہ ریکارڈ کیاگیا جبکہ پچھلے تین سالوں میں کیپرا نے شاندار کارکردگی کا مظاہرہ کرتے ہوئے اپنے سالانہ محاصل میں تین گنا اضافہ کیا ہے۔
مالی سال 22-2021 سیلز ٹیکس آن سروسز کی مد میں 27ارب اور 23 کروڑ جبکہ انفراسٹرکچر ڈویلپمنٹ سس کی مد میں 2 ارب 79 کروڑ روپے اکٹھے کئے گئے۔ واضح رہے کہ خیبر پختونخوا ریونیو اتھارٹی طورخم بارڈر، غلام خان، انگوراڈا اور خرلاچی کے مقامات پر موجود پاکستان کسٹم کی چیک پوسٹس کے ذریعے افغانستان سے آنے والی مال بردار گاڑیوں سے انفراسٹرکچر ڈویلپمنٹ سیس کی وصولی کرتی ہے۔
خیبر پختونخوا ریونیو اتھارٹی نے ٹیکس کے دائرہ کار میں اضافے پر بھر پور کام کیا اور 18300 سے زائد ٹیکس دہندگان ان کو ٹیکس کے دائرہ کار میں شامل کیا جس سے محاصل میں اضافہ ہوا۔
کیپرا کے محاصل میں اضافے کی بنیادی وجوہات میں ٹیکس کی شرح میں کمی کی موثر منصوبہ بندی، خیبر پختونخوا حکومت، بالخصوص وزیر اعلی محمود خان اور وزیر خزانہ تیمور خان جھگڑا کی بہترین حکمت عملی اور رہنمائی اور کیپرا کے عملے کے انتک محنت شامل ہے۔
ڈائریکٹر جنرل کیپرا کیپٹن ریٹائرڈ شہباز طاہر ندیم نے اپنے اخباری بیان میں کیپرا کی ٹیم کی کارکردگی کو سراہا اور کہا کہ دئیے گئے ہدف سے تین ارب روپے زیادہ اکٹھے کرناخیبر پختونخوا ریونیو اتھارٹی کے عملے کی بہترین کارکردگی کا منہ بولتا ثبوت ہے ۔ ان کا کہنا تھا کہ اگلے مالی سال کے اہداف کو بھی اسی طرح حاصل کرنے کے لیے پر اعظم ہیں۔
