Daily Archives: January 8, 2024

صوبائی دارلحکومت پشاور میں ماحولیاتی آلودگی پر قابو پانے، آلودگی کے سدباب اور آگاہی کے حوالے سے واک کا انعقاد کیا گیا۔ جس میں کمشنر پشاور محمد زبیر، ڈائریکٹر جنرل (ای پی اے) محمد انور خان،ڈپٹی کمشنر پشاور آفاق وزیر، ڈپٹی ڈائریکٹر ٹرانسپورٹ پیر زبیر،ہیڈ آف آئی آر پی سی فرحت عباس وڑائچ،ایڈیشنل اسسٹنٹ کمشنر لطف الرحمان،ایڈیشنل اسسٹنٹ کمشنر سلیم ایوبی، ایڈیشنل اسسٹنٹ کمشنر ہارون سلیم، ایڈیشنل اسسٹنٹ کمشنر اویس خان، صدر تاجر انصاف شاہد خان سمیت تاجر برادری، طلباء اور مختلف مکتبہ فکر سے تعلق رکھنے والے افراد نے شرکت کی۔ شرکاء نے بینرز اور پلے کارڈ ز اٹھا رکھے تھے جن پر ماحولیاتی آلودگی پر قابو پانے کے حوالے سے مختلف تدابیر درج تھیں۔ شرکاء نے کہا مالوحیاتی آلودگی پر قابو پانے کے لئے ہمیں زیادہ سے زیادہ پودے لگانے ہوں گے اور ہمیں گاڑیوں کا استعمال کم سے کم کرنا ہو گا اس سے صحت کے ساتھ ساتھ بچت بھی ہوگی۔ انھوں نے کہا کہ فضائی آلودگی انسانی صحت کے لیے زہر قاتل ہے اس لیے اس پر قابو پانے کے لیے ہر ممکن کوشش کرنا ہو گی اور ہمیں فضاء میں فضلہ نہیں جلانا چاہیے اور اینٹوں کے بھٹوں کو زگ زیگ ٹیکنالوجی پر منتقل کرنا ہو گا اور ہمیں پلاسٹک کا استعمال ترک کرنا ہو گا اور ہمیں ماحولیات آلودگی پر قابو پانے کے حوالے سے تمام ضروری اقدامات پرعمل درآمد کو یقینی بنانا ہو گا تاکہ ماحولیاتی آلودگی پر قابو پایا جا سکے اور یہ ہم سب کی مشترکہ کوششوں سے ہی ممکن ہو سکے گا۔

مالاکنڈ میں ضلعی انتظامیہ، پاک فوج اور فرنٹیئر کور نارتھ کی جانب سےامن جیپ اینڈ بائیک ریلی کا انعقاد کیا گیا۔ تقریب کے مہما ن خصو صی انسپکٹر جنرل فرنٹیئر کور نارتھ تھے  ۔73کلو میٹر پر مشتمل جیپ اینڈ بائیک ریلی میں پاکستان بھر سے 78 جیپوں اور 25 بائیکس نے حصہ لیا ۔ریلی بٹ خیلہ سے براستہ درگئی، مالاکنڈ فورٹ پر اختتام پذیر ہوئی۔تقر یب کے آخر میں مہمان خصوصی نے ریلی میں شاندار کارگردگی دکھانے والے جیپ ڈرائیورز اور بائیکرز میں انعامات تقسیم کئے۔ تقریبات میں علاقائی فنکاروں نے بھی اپنے فن کا مظاہرہ کیا۔ ایونٹ کے انعقاد پر شرکاء اور مہمانوں نے منتظمین کی کاوشوں کو سراہا۔

خیبر پختونخواہ حکومت نے سرکاری اور نجی پرائمری سکولوں کی چھٹیوں میں توسیع کا فیصلہ کر لیا۔ محکمہ تعلیم کی جانب سے جاری اعلامیہ کے مطابق نجی اور سرکاری پرائمری سکولز 13 جنوری تک بند رہے گے۔ اعلامیہ کے مطابق مڈل ، ہائی اور ہائیر سیکنڈری سکولوں کی اوقات کار تبدیل کر دیئے گئے ہیں جس کے تحت مڈ ل، پرائمری اور ہائر سیکنڈری سکول 9:30 کو کھلیں گے اور 3:30 کو بند ہونگے۔

خیبر پختونخواحکومت نے صوبے میں صنعتکاری کے فروغ اور سرمایہ کاروں و صنعتکاروں کو حکومت کی جانب سے ادارہ جاتی خدمات آسان بنانے کی غرض سے ایک اہم سنگ میل عبور کرتے ہوئے خیبر پختونخوا اکنامک زونز ڈویلپمنٹ اینڈ منیجمنٹ کمپنی کا ڈیجیٹل موبائل ایپ متعارف کردیاہےجس کے ذریعے اب صوبے میں سرمایہ کاری کے خواہشمند افراد اور صنعت کاروں کو کمپنی کی جانب سے درکار خدمات ،سہولیات اور تمام معلومات موبائل ایپ پر آن لائن دستیاب ہونگے۔ خیبر پختونخوا پورے ملک میں اب پہلا صوبہ بن گیا جس نے سرکاری شعبے میں صنعتکاری کے سلسلے میں اس نوعیت کا ایک جامع اور ہر پہلو سے مفید ایپ متعارف کرادیا۔خیبر پختونخوا کے نگران وزیر برائے صنعت وحرفت،فنی تعلیم اور امور ضم اضلاع ڈاکٹر عامر عبداللہ نے کے پی ایزڈمک کے مرکزی دفتر حیات آباد پشاور میں کمپنی کے چیف ایگزیکٹیو آفیسر جاوید اقبال خٹک اور دیگر منیجمنٹ کی موجودگی میں بٹن دبا کر ڈیجیٹل موبائل ایپ کا باضابطہ افتتاح کیا۔واضح رہے کہ نگران وزیر نے کمپنی کو اپنے خدمات کی ان لائن دستیابی کیلئے اس سہولت کی دستیابی یقینی بنانے کیلئے ٹاسک سونپ دیا تھا جس کے سلسلے میں کمپنی کے آئ ٹی شعبے نے پندرہ روز کے اندراندر اس کو عملی جامہ پہنایا۔اس موقع پر نگران وزیر نے اظہار خیال کرتے ہوئے اس اہم منصوبے کی تکمیل پر کمپنی کی منیجمنٹ اور پوری ٹیم کی کارکردگی کو سراہتے ہوئے کہا کہ یہ خیبر پختونخوا میں صنعتی شعبے میں صنعتکاروں اور سرمایہ کاروں کی سہولت کیلئے ایک نمایاں اقدام ہے۔انھوں نے کہا کہ اس منصوبے میں ہمارے صوبے نے سرکاری شعبے میں دیگر صوبوں پر سبقت حاصل کی جس پر کے پی ایزڈمک کی پوری ٹیم داد کی مستحق ہے۔ نگران وزیر نے ہدایت کہ اس ان لائن سہولت کو وقت کیساتھ ساتھ  ہر پہلو سے مکمل اور مزید سہل بنایا جائے جس میں صنعتوں اور سرمایہ کاری کے حوالے سے تمام درکار خدمات اور معلومات کا ایک جامع احاطہ موجود ہو۔ انھوں نے کہا کہ ایپ کے استعمال کو کمپنی کے مروجہ قوانین اور ضوابط”بائی لاز”کے لازمی جز کے طور پر شامل کیا جائے۔نگران وزیر نے کہا کہ ایپ میں صوبے کے صنعتی زونز میں سرمایہ کاری کیلئے تیار خالی پلاٹس کا پوراڈیٹا بھی موجود ہونا چاہیئے تاکہ اس سلسلے میں خواہشمند سرمایہ کاروں کو موبائیل ایپ ہی کے زریعے صوبے کے تمام صنعتی بستیوں میں پرکشش ترغیبات اور صنعتیں لگانے کیلئے پلاٹس کے معلومات کا حصول آسان ہو۔ انھوں نے اس سلسلے میں اس ٹاسک کو ایک ہفتے کے اندر اندر مکمل کرنے کی ڈیڈ لائن دے دی۔ اس موقع پر نگران وزیر کو بتایا گیا کہ پہلے مرحلے میں مزکورہ ڈیجیٹل ایپ صرف اینڈرائڈ فون پر دستیاب ہوگا جبکہ چند ہفتے بعد ایپل پر بھی اس کی دستیابی یقینی بنائی جائے گی۔انکوبتایا گیا کہ ایپ میں بنیادی طور پر کمپنی کے حوالے سے درکار معلومات اور سنگل پوائنٹ پر کمپنی کے حوالے سے درکار خدمات کے حصول کے دو اہم پہلوؤں کو شامل کیا گیا ہے جبکہ صنعتی سہولت کاری ،صنعتی منصوبے،تازہ معلومات ،مدد و تعاون اور عوامی رائے جانچنے کے خصوصیات اس میں شامل کئے گئے ہیں اس طرح اس کے ذریعے سرمایہ کاری کرنے کے خواہشمند افراد پلاٹ کیلئے آن لائن درخواست بھی  بھیج سکیں گے۔دریں اثنا کے پی ایزڈمک میں نگران وزیر کی زیر صدارت چترال میں نئے قائم ہونے والے صنعتی زون کے امور کے حوالے سے اجلاس منعقد ہوا جس میں انھیں مزکورہ صنعتی بستی کی تکمیل اور اس میں توانائی کی فراہمی کے حوالے سے بعض مسائل کے حوالے سے آگاہ کیا گیا۔نگران وزیر کو بتایا گیا کہ چترال اکنامک زون صنعتکاری کیلئےمکمل طور پر تیار ہے اور اس میں 35 فیصد پلاٹس الاٹ کی گئی ہیں  تاہم اس کو جلد از جلد توانائی کے ضروریات پوری کرنے کی ضرورت ہے جس کے سلسلے میں ایک میگاواٹ سولر سسٹم “گرین انرجی” فراہم کرنے کی تجویز زیر غور ہے جو وقتی طور پر کئی سالوں کیلئے زون کے ضروریات کیلئے کافی ہے۔اس حوالے سے نگران وزیر نے کمپنی حکام کو ہدایت کی کہ وہ اس ماڈل کے تمام تیکنیکی پہلوؤں کا جائزہ لیکر اسکے قابل عمل ہونے کے بعد اس پر عملدرآمد کرنے کیلئے اسے بورڈ کے سامنے پیش کرے۔

خیبرپختونخوا میڈیکل یونیورسٹی نے بھی موسم سرما کی تعطیلات میں اضافے کا اعلان کردیا۔ وائس چانسلر  کے ایم یو پروفیسر ڈاکٹر ضیاء الحق کی جانب سے بتایا گیا ہے کہ موسم سرما کی تعطیل 14 جنوری تک رہے گی۔ وائس چانسل کے مطابق تعطیلات میں اضافے کا فیصلہ سردی بڑھنے کی وجہ سے کیا گیا ہے۔