Daily Archives: October 16, 2024

خیبر پختونخوا جوڈیشل اکیڈمی پشاور میں زیر تربیت سول ججز/جوڈیشل مجسٹریٹس /علاقہ قاضیوں کو وفاقی جوڈیشل اکیڈمی ، وفاقی شریعت کورٹ اور شریعہ اکیڈمی اسلام آباد کا تین روزہ تربیتی دورہ کرایا گیا ۔جس کا مقصد زیر تربیت ججوں کی عدالتی امور سے متعلق معلومات اور تجربہ میں اضافہ کرنا تھا جو کہ ان کی تربیتی کورس کا حصہ تھا۔ ڈین فیکلٹی خیبر پختونخوا جوڈیشل اکیڈمی پشاور، ضیاء الرحمان کی سربراہی میں ڈائریکٹر انسٹرکشنز واجد علی اور ایڈمن آفیسر ساجد امین بھی زیر تربیت ججز کے ہمراہ تھے۔ پانچ ہفتوں پر مشتمل قبل از ملازمت تربیتی پروگرام کے سلسلہ میں زیر تربیت ججز کو تربیتی دورہ کے پہلے دن فیڈرل جوڈیشل اکیڈمی اسلام آباد کا دورہ کرایا گیا ، جہاں قائمقام ڈائریکٹر جنرل فخرزمان اوردیگر افسران نے شرکاء تربیت کا استقبال کیا اور انہیں فیڈرل جوڈیشل اکیڈمی سے متعلق تفصیلی بریفنگ دی گئی ،اس موقع پر ڈین فیکلٹی جوڈیشل اکیڈمی پشاور ضیاء الرحمان نے خیبر پختونخوا جوڈیشل اکیڈمی کے مقاصد ، انتظامی ڈھانچے اور کام، مختلف شعبوں اور دستیاب سہولیات کے بارے میں بریفنگ دی۔بعد میں زیر تربیت ججز کو”پریزنٹیشن سکلز” اور”مصنوعی ذہانت یعنی آرٹی فیشل انٹیلی جنس” کے موضوعات پر فیڈرل جوڈیشل اکیڈمی کے تربیت کاروں نے لیکچرز دیئے جبکہ اختتامی تقریب میں دونوں اداروں کی جانب سے سوینئر ز کا تبادلہ بھی کیا گیا۔
تربیتی دورہ کے دوسرے دن، زیر تربیت ججز کو فیڈرل شریعت کورٹ کا دورہ کرایا گیا جہاں سینئر ڈائریکٹر شعبہ تحقیق و اشاعت مطیع الرحمان نے ان کا استقبال کیا اور زیر تربیت ججز نے فیڈرل شریعت کورٹ کے قیام، مقاصد اور تاریخی فیصلوں کے بارے میں معلوماتی بریفنگ حاصل کی، جس میں اسلامی قانون اور پاکستان کے قانونی فریم ورک میں اس کے اطلاق کے بارے میں آگاہی حاصل کیا۔اس موقع پر فیڈرل شریعت کورٹ کے جج جسٹس محمد انور شاہ کے ساتھ زیر تربیت ججز کا انٹرایکٹو سیشن کا انعقاد بھی کیا گیا جس میں اسلامی قانون کی تشریح میں وفاقی شریعت کورٹ کے کردار کے بارے میں زیر تربیت ججز کے علم میں مزید اضافہ ہوا۔ اکیڈمی کی جانب سے ڈین فیکلٹی نے جسٹس محمد انور شاہ کا شکریہ ادا کرتے ہوئے اکیڈمی یادگاری شیلڈ بھی پیش کی۔ بعد میں تربیتی دورہ کے سلسلہ میں شریعہ اکیڈمی اسلام آباد کا دورہ کرایا گیا جہاں زیر تربیت ججزنے شریعہ اکیڈمی کے مقاصد، ڈھانچے اور سرگرمیوں کے بارے میں ایک جامع بریفنگ حاصل کی۔ اس معلوماتی سیشن نے اسلامی فقہ کو فروغ دینے میں شریعہ اکیڈمی کے کردار اور جدید قانونی طریقوں سے اس کی مطابقت کے بارے میں قیمتی بصیرت فراہم کی۔ بعد میں دونوں اکیڈمیوں کے درمیان یادگاری شیلڈز کا تبادلہ ہوا، جس سے تعاون اور باہمی افہام و تفہیم کے جذبے کو فروغ ملا۔

پشاور انسٹیٹیوٹ آف میڈیکل سائنسز (پِمز) اور پاک انٹرنیشنل میڈیکل کالج (پِمک) میں ڈینگی سے بچاؤ کے حوالے سے ایک اہم آگاہی ورکشاپ کا انعقاد کیا گیا۔ یہ ورکشاپ ڈینگی کے بڑھتے ہوئے کیسز کے پیش نظرعوام میں شعور بیدار کرنے کیلئے منعقد کی گئی تھی۔ ورکشاپ میں ما ہرین صحت نے بھی شرکت کی۔ جن میں باچا خان میڈیکل کالج کے شعبہ عوامی صحت اور کمیونٹی میڈیسن کے چیئرمین ڈاکٹر افتخار الدین، پِمز کے چیئرمین پروفیسر ڈاکٹر طارق صافی، پِمز کے پرنسپل اور ڈین پروفیسر ڈاکٹر امین جان خان، اور سابق سینیٹر پروفیسر ڈاکٹر مہرتاج روغانی شامل تھے۔ افتتاحی تقریر میں پروفیسر ڈاکٹر امین جان خان نے ڈینگی کی بگڑتی ہوئی صورتحال کے پیش نظر عوامی آگاہی کی اشد ضرورت پر زور دیا۔ انہوں نے کہا، “ایسی ورکشاپس ڈینگی کے خلاف ہماری جنگ میں انتہائی اہمیت کی حامل ہیں، خاص طور پر جب یہ بیماری عروج پر ہو۔” انہوں نے صحت کے ماہرین اور کمیونٹی سے اپیل کی کہ وہ ڈینگی سے بچاؤ کے لیے فعال طور پر اقدامات کریں تاکہ عوامی صحت کا تحفظ ممکن بنایا جا سکے۔

ڈاکٹر افتخار الدین نے بیماری کی ممکنہ سنگینی پر روشنی ڈالی اور اس کے تدارک کے لیے احتیاطی تدابیر کی ضرورت پر زور دیا۔ انہوں نے کہا، “ہمیں چوکنا رہنے کی ضرورت ہے۔ ڈینگی ایک سنجیدہ خطرہ ہے اور اس کے پھیلاؤ کو روکنے کے لیے اجتماعی کوششیں ضروری ہیں۔” بروقت کارروائی اور کمیونٹی کی آگاہی ہی اس وبا کے پھیلاؤ کو روکنے کے لیے مؤثر ثابت ہو سکتی ہے۔ ورکشاپ میں بیماری کی علامات کی شناخت، مچھر کی افزائش کے مقامات کو ختم کرنے کی اہمیت، اور حفاظتی تدابیر کے حوالے سے معلوماتی سیشنز شامل تھے۔ ماہرین نے اس بات پر بھی زور دیا کہ مقامی حکام اور صحت کے ادارے بروقت ردعمل کو یقینی بنائیں تاکہ ڈینگی کی روک تھام کی   جا سکے۔ شرکاء نے عملی طور پر مچھر کی افزائش کو روکنے کے طریقے بھی سیکھے، جیسے کہ پانی کے ذخائر کو محفوظ رکھنا اور گھر میں صفائی کا خاص خیال رکھنا۔

حکومت نے آئندہ 15 روز کیلئے پیٹرولیم مصنوعات کی نئی قیمتوں کا اعلان کردیا۔ حکومت نے ہائی اسپیڈ ڈیزل کی قیمت میں اضافہ اور پیٹرول کی قیمت برقرار رکھی ہے۔ وزارت خزانہ نے پیٹرولیم مصنوعات کی نئی قیمتوں کا نوٹیفکیشن جاری کردیا جس کے مطابق ہائی اسپیڈ ڈیزل کی قیمت میں 5  روپے فی لیٹر اضافہ کر دیا گیا اور نئی قیمت  251 روپے 29 پیسے فی لیٹر مقرر کی گئی ہے۔ پیٹرول کی قیمت 247 روپے 3 پیسے فی لیٹر پر برقرار ہے۔

ڈپٹی کمشنر نوشہرہ عرفان اللہ محسود کے ہدایات پر ایڈیشنل اسسٹنٹ کمشنر I نوشہرہ عبدالقیوم خٹک نے یونیورسٹی آف ٹیکنالوجی نوشہرہ میں سپورٹس گالا کے اختتامی تقریب میں خصوصی طور پر شرکت کی۔ سپورٹس گالا یونیورسٹی آف ٹیکنالوجی اور ضلعی سپورٹس آفس کے تعاون سے منعقد ہوا۔ جس میں کرکٹ، بیڈ منٹن، والی بال اور کیرم بورڈ کے مقابلے شامل تھے۔ سپورٹس گالا کے اختتام پر ایڈیشنل اسسٹنٹ کمشنر I نوشہرہ اور دیگر مہمان خصوصی نے اچھی کارکردگی دکھانے والے طلباء میں انعامات تقسیم کئے۔ آخر میں ایڈیشنل اسسٹنٹ کمشنر I نوشہرہ نے طلباء سے اپنے خطاب میں کہا کہ پڑھائی کے ساتھ ساتھ ایسی سرگرمیاں طلباء کے لئے انتہائی اہم ہے۔ جو ان کی ذہنی اور جسمانی نشونما میں اضافہ کا سبب بنتا ہے۔