Daily Archives: February 14, 2025

صوبے بھر سے منتخب نوجوانوں کیلئےایک غیر سرکاری تنظیم سینٹر فار گورننس اینڈ پبلک اکاونٹیبلٹی (سی جی پی اے) کے زیر اہتمام “یوتھ لیڈرشپ پروگرام” میں رائٹ ٹو پبلک سروسز (RTS) کمیشن کی نمائندگی کی۔ کمشنر آر ٹی ایس جج محمد عاصم امام نے نوٹیفائیڈ پبلک سروسز تک رسائی کو یقینی بنانے میں آر ٹی ایس ایکٹ اور کمیشن کے اہم کردار پر زور دیا۔ انہوں نے بتایا کہ یہ کس طرح سماجی بدامنی کو روکنے میں مدد کرتا ہے۔ انہوں نے اس بات کی بھی نشاندہی کی کہ صوبے میں ترقی کے لیے عوامی اداروں کا شفاف طریقے سے کام کرنا اور جوابدہ ہونا کتنا ضروری ہے۔ جب انصاف پسندی کو برقرار نہیں رکھا جاتا اور عوامی معاملات میں ناانصافی ہوتی ہے تو یہ تشدد اور انتہا پسندی کو جنم دیتا ہے۔ صوبے میں خوشحالی اور ترقی کو فروغ دینے کے لیے خدمات کے حق کے قانون کی مضبوطی انتہائی ضروری ہے۔ رائٹ ٹو پبلک سروسز کمیشن کے پی کی ضرورت کو دیکھتے ہوئے، انہوں نے سی جی پی اے سمیت شامل تمام افراد کے ساتھ مل کر کام کرنے کی ضرورت پر زور دیا۔

جسٹس عتیق شاہ پشاور ہائیکورٹ کے قائمقام چیف جسٹس تعینات کر دیئے گئے۔ اعلامیہ جاری کر دیا گیا۔ گورنر خیبر پختونخوا فیصل کریم کنڈی نے جسٹس ایس ایم عتیق شاہ سے بطور قائمقام چیف جسٹس پشاور ہائیکورٹ انکے عہدہ کا حلف لیا۔ تقریب حلف برداری میں وزیراعلٰی خیبرپختونخوا سردار علی امین خان گنڈاپور بھی شریک تھے۔  تفصیلات کے مطابق سپریم کورٹ میں 6 ججز کی تعیناتی کے اعلامیہ کے بعد ہائی کورٹس کے چیف جسٹس کا بھی اعلان کر دیا گیا۔ اس حوالے سے جاری نوٹیفکیشن میں بتایا گیا ہے کہ جسٹس عتیق شاہ پشاور ہائیکورٹ کے قائمقام چیف جسٹس تعینات کر دیئے گئے ہیں، ان کے علاوہ جسٹس سرفراز ڈوگر اسلام آباد ہائیکورٹ ، جسٹس اعجاز سواتی بلوچستان ہائیکورٹ جبکہ جسٹس جنید غفار سندھ ہائیکورٹ کے قائم مقام چیف جسٹس مقرر کئے گئے ہیں۔اعلامیہ کے مطابق سینئر قانون دان قاضی انور ایڈووکیٹ کو ایک بار پھر آئی ایل ایف خیبرپختونخوا کا صدر مقرر کر دیا گیا ہے۔

کمشنر ملاکنڈ ڈویژن عابد وزیر نے ریجنل پولیس آفیسر ملاکنڈ ریجن شیر اکبر کے ہمراہ کمشنر آفس سیدو شریف کے سبزہ زار میں دیودار کا پودا لگا کر موسم بہار شجر کاری مہم کا باقاعدہ افتتاح کر دیا۔ اس دوران چیف کنزرویٹر آف فارسٹ ملاکنڈ اصغر خان، ڈویژنل فارسٹ آفیسر، انتظامی اور محکمہ جنگلات کے دیگر آفیسران موجود تھے۔ اس موقع پر کمشنر ملاکنڈ کا کہنا تھا کہ موسمیاتی تغیراتی تبدیلیوں پر قابو پانے کیلئے زیادہ سے زیادہ پودے لگانے کی ضرورت ہے۔ تاکہ مستقبل کو محفوظ بنایا جا سکے۔

انہوں نے سرکاری و نیم سرکاری اداروں، طلبہ، سول سوسائیٹی سے اس شجر کاری مہم میں اپنا اپنا حصہ ڈالنے کی اپیل کی۔ ساتھہ ہی ساتھ تحصیل لیول دفاتر، پولیس سٹیشنز، سکولوں، ہسپتالوں اور دیگر سرکاری عمارات میں شجر کاری یقینی بنانے کی ہدایت کی۔ محکمہ جنگلات اس شجر کاری مہم کے دوران پورے ملاکنڈ ڈویژن میں تقریبا 384000 مختلف انواع و اقسام کے پودوں کی شجر کاری کریگا۔ اس شجر کاری مہم میں محکمہ جنگلات سرکاری اداروں اور عوام الناس کو مفت پودے فراہم کریگا۔ چیف کنزرویٹر آف فارسٹ ملاکنڈ نے کمشنر ملاکنڈ کو یادگاری شیلڈ پیش کی۔

پشاور یونیورسٹی کے بزنس انکیوبیشن سینٹر (BIC) نے ایک اور تاریخی سنگ میل عبور کرتے ہوئے اپنے پہلے سٹارٹ اپ کوہورٹ کا آغاز کر دیا اس سلسلے میں منعقدہ تقریب میں معزز مہمانوں، صنعت کے رہنماؤں، اور ابھرتے ہوئے کاروباری افراد نے شرکت کی، جس سے خطے میں جدت اور کاروباری ترقی کے ایک نئے دور کا آغاز ہوا۔ بزنس انکیوبیشن سینٹر کے سربراہ، ڈاکٹر شکیل خان نے افتتاحی خطاب میں اس سینٹر کے قیام کے مقاصد پر روشنی ڈالی اور اس کی اہمیت کو اجاگر کیا، کہ کس طرح یہ سینٹر نوجوان کاروباری افراد کی صلاحیتوں کو پروان چڑھانے میں کلیدی کردار ادا کرے گا۔وزیر اعلیٰ کے مشیر برائے صنعت و تجارت عبد الکریم خان نے اس موقع پر شرکاء سے خطاب کیا اور سٹارٹ اپس کے لیے حوصلہ افزا الفاظ کہے۔ انہوں نے حکومت کی جانب سے کاروباری ماحول کو فروغ دینے کے عزم کا اظہار کیا۔ ان کے بعد چیمبر آف کامرس کے سابق صدر فواد اسحاق نے خطاب کرتے ہوئے انکیوبیشن سینٹر کی مکمل حمایت کا اعلان کیا اور نوآموز کاروباری اداروں کے لیے رہنمائی اور معاونت کی پیشکش کی۔تقریب سے وائس چانسلر، پروفیسر ڈاکٹر محمد نعیم قاضی نے بھیر سٹارٹ اپس کا خیرمقدم کرتے ہوئے اس سنگ میل کو یونیورسٹی کے لیے ایک بڑی کامیابی قرار دیا۔ اپنے خطاب میں انہوں نے یونیورسٹی آف پشاور کے اس عزم کو دہرایا کہ تعلیمی ادارے کو صرف تعلیم ہی نہیں بلکہ کاروباری جدت طرازی اور تحقیق کا مرکز بھی بنانا ہے۔زکری گروپ آف کمپنیز کے سی ای او، جناب ایوب زکری نے اپنی مکمل رہنمائی اور علم کی منتقلی کے مواقع فراہم کرنے کی یقین دہانی کرائی، جبکہ مکہ ایجنسی کے سی ای او، جناب عاطف شہزاد نے نوجوان کاروباری افراد کی ترقی میں اپنی دلچسپی کا اعادہ کیا۔سرحد چیمبر آف کامرس کے صدر فضل مقیم خان نے تقریب میں شرکت کرتے ہوئے تعلیمی اداروں اور صنعت کے درمیان تعلقات کو مضبوط کرنے کی ضرورت پر زور دیا۔ مزید برآں، برٹش کونسل کی نمائندہ، محترمہ طاہرہ کلیم نے نوجوان کاروباری افراد کے لیے عالمی سطح پر تعاون اور جدت کے مواقع فراہم کرنے میں اپنی معاونت کی یقین دہانی کرائی۔پہلے کوہورٹ میں 25 ابھرتے ہوئے سٹارٹ اپس شامل ہیں، جو مختلف صنعتوں جیسے کہ ماحولیاتی تحفظ، ایڈٹیک، فِن ٹیک اور دیگر ترقی پذیر شعبوں میں کام کر رہے ہیں۔ خاص طور پر، اس کوہورٹ میں 10 سے زائد سٹارٹ اپس ماحولیاتی استحکام پر مرکوز ہیں، جو کہ بزنس انکیوبیشن سینٹر کی ذمہ دار اور مثبت کاروباری حکمت عملی کی عکاسی کرتے ہیں۔اگلے چھ ماہ کے دوران، یہ سٹارٹ اپس ایک مربوط انکیوبیشن پروگرام میں حصہ لیں گے، جس میں انہیں ماہرین کی رہنمائی، کاروباری ترقی کی تربیت، اور نیٹ ورکنگ کے مواقع فراہم کیے جائیں گے۔

سٹی ٹریفک پولیس پشاور کے رضا کار فورس کے ممبران نے شہریوں کو ٹریفک قوانین سے متعلق آگاہی دی۔ سٹی ٹریفک پولیس پشاور کی ایجوکیشن ٹیم اور دیگر ٹریفک حکام بھی موجود تھے ۔ اس سلسلے میں سٹی ٹریفک پولیس پشاور کے رضا کار فورس کے ممبران نے شہریوں کو ٹریفک قوانین سے متعلق آگاہی دی اور باقاعدہ شہریوں میں ٹریفک قوانین پر مشتمل پمفلٹس تقسیم کئے ۔ چیف ٹریفک آفیسر ہارون رشید خان نے کہا کہ شہر میں ٹریفک قوانین پر عملدرآمد یقینی بنانے اور شہریوں کو ٹریفک حادثات سے بچانے کے لئے رضا کار فورس تشکیل دی گئی ہے جس میں طلبا و طالبات شامل ہیں جو سٹی ٹریفک پولیس پشاور کی ایجوکیشن ٹیموں کے ہمراہ پشاور کی شاہراہوں پر شہریوں کو ٹریفک قوانین سے متعلق آگاہی دینگے تاکہ شہر میں ٹریفک کی روانی یقینی ہو اور ٹریفک حادثات پر قابو پایا جائے ۔ چیف ٹریفک آفیسر ہارون رشید خان نے کہا کہ شہریوں کی جانب سے ٹریفک قوانین پر عملدرآمد نہ کرنے سے ٹریفک نظام میں خلل پڑتا ہے لہٰذا شہری ٹریفک قوانین پر عملدرآمد کو یقینی بنائیں تاکہ ٹریفک نظام میں خلل نہ پڑے ۔ انہوں نے مزید کہا کہ ٹریفک قوانین سے متعلق آگاہی مہم سے ٹریفک کی روانی یقینی ہوگی اور جان لیوا حادثات بھی کم ہوں گے سٹی ٹریفک پولیس پشاور کی جانب سے آگاہی کیلئے رضا کارس فورس کی تشکیل سے طلبا و طالبات کو مثبت سرگرمیوں کیلئے پلیٹ فارم بھی مل گیا ہے انہوں نے کہا کہ طلبا و طالبات کی جانب سے آگاہی دینے کے باعث شہری ٹریفک قوانین کی طرف راغب ہوں گے ۔

پیر اپلیجک سینٹر پشاور کے زیراہتمام دو روزہ اے سی ٹی بیسک کلب فٹ ٹریٹمنٹ پرووائیڈر ورکشاپ کا کامیاب انعقاد کیا گیا۔ مجموعی طور پر 8 طبی ماہرین کو جامع تربیت دی گئی جن میں 5 نئے ڈاکٹروں اور فزیو تھرآپسٹس کا تعلق ڈی ایچ کیو ٹیچنگ ہسپتال ہری پور اور 3 کا پیر اپلیجک سینٹر پشاور سے تھا۔ اس تربیت پروگرام کا مقصد طبی ماہرین کی مہارت میں اضافہ کرنا ہے تاکہ کلب فٹ عارضہ کے شکار بچوں کا بالکل مفت مگر اعلیٰ معیار کا علاج کیا جا سکے۔ پیراپلیجک سینٹر پشاور کے چیف ایگزیکٹیو ڈاکٹر سید محمد الیاس نے سنٹر کے سی پی ایم آر سیمینار ہال میں منعقدہ سادہ مگر پروقار تقریب میں تربیتی کورس مکمل کرنے والے شرکاء کو اسناد دیئے۔ انہوں نے فارغ التحصیل ماہرین کے سیکھنے کی لگن کو سراہتے ہوئے امید ظاہر کی کہ وہ ہری پور میں نئے قائم کردہ کلب فٹ کلینک میں متاثرہ بچوں کا سو فیصد مفت اور مؤثر علاج یقینی بنائیں گے۔ ڈاکٹر الیاس سید کا کہنا تھا کہ حالیہ اقدام پیراپلیجک سینٹر پشاور اور میریکل فیٹ کے وسیع تر ملک گیر مشترکہ تعاون کا حصہ ہے جس کا مقصد ضلع ہری پور اور اس کے گرد و نواح میں کلب فٹ کلینک کے ذریعے مفت علاج کی سہولیات فراہم کرنا ہے۔ انہوں نے مزید کہا کہ اس پروگرام کو پہلے ہی خیبرپختونخوا کے بڑے شہروں بشمول پشاور، ایبٹ آباد، سوات اور صوابی کے علاوہ وفاقی دارالحکومت اسلام آباد اور مظفرآباد (آزاد کشمیر) میں کامیابی سے متعارف کرایا جا چکا ہے جبکہ مستقبل میں اسے ڈیرہ اسماعیل خان، بنوں اور ضم شدہ اضلاع تک توسیع دینے کا منصوبہ ہے۔ ڈاکٹر عامر زیب، صوبائی کوآرڈینیٹر کلب فٹ پروگرام اور نمائندہ پیر اپلیجک سینٹر پشاور نے تربیتی ورکشاپ کے دوران بتایا کہ ہم کلب فٹ کے شکار بچوں کے جامع علاج کیلئے پرعزم ہیں اور یہ تربیتی ورکشاپ ہمارے وسیع تر مشن کا اہم قدم ہے۔ ہم میریکل فیٹ کے تعاون کے شکر گزار ہیں اور اس شراکت کو جاری رکھتے ہوئے بچوں اور انکے اہل خانہ کی زندگی بہتر بنانے کیلئے کوشاں ہیں۔ انہوں نے کہا کہ پیراپلیجک سینٹر پشاور اور میریکل فیٹ کا مشترکہ وژن ہے کہ کلب فٹ کے شکار ہر بچے کا بروقت اور معیاری علاج یقینی بنایا جائے۔ حالیہ اقدام کے ذریعے اس مشترکہ مشن کا اہم سنگ میل عبور کیا گیا ہے۔ یہ بات قابل ذکر ہے کہ اے سی ٹی (افریقہ کلب فٹ ٹریننگ) پروگرام بنیادی سطح کا تربیتی پروگرام ہے جو سب صحارا افریقہ میں کلب فٹ کے علاج کے نظام کو مضبوط بنانے میں کلیدی کردار ادا کر رہا ہے۔ 2015 سے 2017 کے دوران اس پروگرام کے ذریعے 18 ممالک میں نئے قومی سطح کے ٹرینرز کو تربیت دی گئی جس سے شراکت داری کو فروغ دینے اور علاج کے نتائج کو بہتر بنانے میں مدد ملی۔ افریقہ کلب فٹ ٹریننگ پروگرام کو تین تدریجی مراحل میں ترتیب دیا گیا ہے جن میں بیسک کلب فٹ ٹریٹمنٹ پرووائیڈر کورس، ایڈوانسڈ کلب فٹ ٹریٹمنٹ پرووائیڈر کورس اور ٹرین دی ٹرینر (ٹی ٹی ٹی) پروگرام شامل ہیں۔ یہ تربیتی پروگرام طبی ماہرین کو پونسیٹی طریقہ کے مؤثر اطلاق کیلئے تیار کرتا ہے تاکہ ہر بچے کو بروقت اور معیاری علاج فراہم کیا جا سکے۔