Daily Archives: April 24, 2025

پہلگام حملہ: بھارت کا ایک اور فالس فلیگ آپریشن؟

مقبوضہ کشمیر کے علاقے پہلگام میں حالیہ دہشت گرد حملے نے ایک بار پھر بھارتی انتہاپسندی اور پاکستان دشمنی کے عزائم کو بے نقاب کر دیا ہے۔ اس دلخراش واقعے میں 27 سیاحوں کو نشانہ بنایا گیا، جن میں دو غیر ملکی بھی شامل تھے۔ افسوسناک امر یہ ہے کہ حملے کے چند منٹ بعد ہی بھارتی میڈیا اور انتہاپسند سیاستدانوں نے بغیر کسی تحقیق کے روایتی روش اختیار کرتے ہوئے الزام پاکستان پر دھر دیا۔

یہ بھارت کا پرانا وطیرہ ہے کہ جب بھی وہاں کسی قسم کا دہشت گردی کا واقعہ پیش آتا ہے، تو بغیر کسی ثبوت کے اس کی ذمہ داری پاکستان پر ڈال دی جاتی ہے۔ حالانکہ خود پاکستان اس وقت دہشت گردی کا شکار ہے اور بھارتی حمایت یافتہ گروہ اس کے معصوم شہریوں کو نشانہ بنا رہے ہیں۔ گزشتہ ماہ بلوچستان میں جعفر ایکسپریس پر حملے کے پیچھے بھی بھارت اور افغانستان کے روابط کے شواہد موجود ہیں۔ متعدد بین الاقوامی رپورٹس اور تھنک ٹینکس اس بات کی تصدیق کر چکے ہیں کہ بھارت دہشت گرد گروہوں کو مالی و عسکری مدد فراہم کر رہا ہے۔

داعش جیسے بین الاقوامی دہشت گرد گروہ کے ساتھ بھارت کے تعلقات اب کوئی ڈھکی چھپی بات نہیں رہی۔ حتیٰ کہ کینیڈا میں سکھ رہنماؤں کی ٹارگٹ کلنگ کے پیچھے بھارتی خفیہ ایجنسی راء کے کردار پر کھل کر انگلیاں اٹھائی جا چکی ہیں۔

پہلگام واقعے کے محض تین منٹ بعد بھارتی میڈیا، ریٹائرڈ فوجی افسران اور سیاستدانوں نے بیک زبان پاکستان پر الزام عائد کیا، حالانکہ یہ سوچنا بھی حیران کن ہے کہ آٹھ لاکھ فوج کی موجودگی میں چند افراد چار سو کلومیٹر کا فاصلہ طے کرکے اتنی بڑی کارروائی کیسے کر سکتے ہیں؟

حقیقت یہ ہے کہ بھارت پاکستان کی بڑھتی ہوئی عالمی پذیرائی، دہشت گردی کے خلاف مؤقف کی قبولیت اور معاشی بہتری کو ہضم نہیں کر پا رہا۔ ایسے میں اس کے انتہاپسند عناصر فالس فلیگ آپریشنز کے ذریعے پاکستان کو بدنام کرنے کی ناکام کوشش کرتے ہیں۔

بھارت کی یہ پالیسی کوئی نئی نہیں۔ ماضی میں بھی کئی بار ایسے واقعات میں بھارت کی بدنیتی سامنے آ چکی ہے، جیسے ابھی نندن کی گرفتاری اور منہ کی کھانے والا واقعہ، جو انتہاپسند بھارتی قیادت کیلئے ایک واضح سبق ہونا چاہیے تھا۔

بھارت کی جانب سے پہلگام حملے کو بنیاد بنا کر نہ صرف پاکستان پر حملے کی دھمکیاں دی گئیں بلکہ سندھ طاس معاہدے کو معطل کرنے، واہگہ-اٹاری بارڈر بند کرنے، پاکستانیوں کو دو دن میں بھارت چھوڑنے اور سفارتی عملے کی واپسی جیسے اقدامات کئے جا رہے ہیں۔

اگر بھارت واقعی سنجیدہ ہے تو اسے چاہیے کہ وہ پاکستان کی طرف سے دی گئی مشترکہ تحقیقات کی پیشکش کو قبول کرے تاکہ حقائق منظر عام پر آ سکیں۔ محض الزامات لگانے سے سچ چھپایا نہیں جا سکتا۔

یہ بات روز روشن کی طرح عیاں ہے کہ بھارت کی انتہاپسند قیادت نہ صرف پاکستان کو نیچا دکھانے کی خواہاں ہے بلکہ خطے میں امن و ترقی کی راہ میں سب سے بڑی رکاوٹ بھی ہے۔ جنگ و جدل سے کبھی کوئی مسئلہ حل نہیں ہوا، اور نہ ہی ہمسائے بدلے جا سکتے ہیں۔ بھارت کو چاہیے کہ ہوش کے ناخن لے اور پاکستان سے دیرینہ مسائل کو مذاکرات کے ذریعے حل کرے۔

پہلگام واقعہ ایک اور فالس فلیگ آپریشن ہے جس کا مقصد دنیا کو گمراہ کرنا اور پاکستان کو عالمی برادری میں بدنام کرنا ہے۔ لیکن اب دنیا بدل چکی ہے۔ ایسے خود ساختہ ڈرامے اب مزید کامیاب نہیں ہو سکتے۔ وقت آ گیا ہے کہ بھارت اس حقیقت کو تسلیم کرے اور نفرت و دشمنی کی بجائے امن و ترقی کے سفر میں پاکستان کا ساتھ دے۔

سیاست، جمہوریت اور قومی ترقی

دنیا کے وہ ممالک جہاں جمہوریت رائج ہے، وہاں سیاستدان بھی موجود ہوتے ہیں، سیاست بھی ہوتی ہے اور سیاست چمکانے کا کوئی موقع ہاتھ سے جانے نہیں دیا جاتا۔ جہاں سیاستدان دانشمندی، تدبر اور حب الوطنی کو اپنا نصب العین بناتے ہیں، وہاں نہ صرف جمہوریت مضبوط ہوتی ہے بلکہ وہ ممالک ترقی اور خوشحالی کی منازل بھی طے کرتے ہیں۔ وہاں کے عوام کو بنیادی سہولیات میسر آتی ہیں اور ان کی زندگی بہتر ہوتی ہے۔

اس کے برعکس جہاں سیاستدان ذاتی انا کے خول میں قید، عقل و شعور سے عاری اور حب الوطنی کے مفہوم سے ناواقف ہوتے ہیں، وہاں نہ صرف جمہوریت کمزور ہوتی ہے بلکہ ترقی بھی ایک خواب بن کر رہ جاتی ہے۔ ایسے ممالک کے عوام نہ صرف سہولیات سے محروم رہتے ہیں بلکہ معاشی اعتبار سے بھی پیچھے رہ جاتے ہیں، قرضوں تلے دبے ہوتے ہیں اور آمدن کا بڑا حصہ سود کی نذر ہو جاتا ہے۔

جمہوریت کو انتقال اقتدار کا بہترین ذریعہ اسی لیے سمجھا گیا کہ ہوش و حواس کے ساتھ کیے گئے فیصلے عوام کی فلاح کا باعث بنتے ہیں، مگر افسوس کہ ہمارے وطن عزیز میں اب تک سیاستدان وہ بالغ نظری نہیں دکھا سکے جو قوم کی تقدیر بدلنے کے لیے درکار ہے۔

آبی وسائل اور سیاسی رویے

افسوس ناک حقیقت یہ ہے کہ پاکستان جیسے ملک میں جہاں گلیشیئرز اور دریا قدرت کا عطیہ ہیں، وہاں پانی کی بچت اور استعمال کے لیے ڈیمز اور بیراج جیسے منصوبوں پر سیاستدان متفق نہیں ہو پاتے۔ جب کبھی حکومت کسی ڈیم کی تعمیر کا ارادہ کرتی ہے، تو اس کے سامنے مشکلات کا پہاڑ کھڑا کر دیا جاتا ہے۔

بارشوں کے موسم میں بے شمار پانی ضائع ہو کر سمندر میں جا گرتا ہے، حالانکہ اگر اس پانی کو محفوظ کرنے کے لیے ڈیمز اور دیگر انتظامات کیے جائیں تو کئی سالوں کی ضروریات پوری کی جا سکتی ہیں۔ گلیشیئرز سے پگھلنے والا پانی بھی ضائع ہو جاتا ہے، کیونکہ ہم اس سے استفادہ کرنے کے لیے کوئی مؤثر نظام نہیں بنا سکے۔

حال ہی میں وفاقی حکومت نے دریائے سندھ سے نہریں نکالنے کا منصوبہ بنایا جس کی قوم پرست جماعتوں نے مخالفت شروع کر دی۔ اس منصوبے کا مقصد ضائع ہوتے پانی کو کارآمد بنانا تھا مگر ہم شاید وہ قوم ہیں جسے پانی کو ضائع کرنے میں سکون ملتا ہے۔

ترقیاتی منصوبے سیاست کی نذر

جب حکومت کوئی بڑی شاہراہ بنانے کا منصوبہ بناتی ہے، تو سیاستدان اس کی مخالفت میں سامنے آ جاتے ہیں۔ نہری نظام ہو یا مائنز اینڈ منرلز بل، ہر ترقیاتی منصوبے کو سیاست زدہ کر کے متنازعہ بنا دیا جاتا ہے۔ سیاستدانوں کے بیانات اور حرکات سے یوں محسوس ہوتا ہے جیسے قومی ترقی ان کا مقصد نہیں بلکہ صرف اپنی سیاست چمکانا ہی اصل ترجیح ہے۔

ہم بلند آواز میں کہتے ہیں کہ پاکستان قدرتی وسائل سے مالا مال ہے، مگر حقیقت یہ ہے کہ ہم ان وسائل کو بروئے کار لانے میں ناکام رہے ہیں۔ اگر بیرونی سرمایہ کاری اور مہارت سے فائدہ اٹھایا جائے تو خوشحالی ممکن ہے، مگر ہم ان منصوبوں کی راہ میں رکاوٹیں کھڑی کر کے خود اپنے پاؤں پر کلہاڑی مار رہے ہیں۔

زراعت، معدنیات اور خودساختہ دشمنی

اگر ہم پانی کو مؤثر انداز میں استعمال نہیں کریں گے تو زراعت کس طرح ممکن ہو سکے گی؟ ہم ایک زرعی ملک ہونے کے باوجود زرعی ترقی کے لیے مطلوبہ اقدامات نہیں کر رہے۔ ہماری زمینوں کے نیچے جو معدنیات چھپی ہوئی ہیں، اگر انہیں نکالنے کے لیے بیرونی کمپنیوں کی مدد نہ لی گئی تو وہ نعمتیں ہمارے کسی کام نہیں آئیں گی۔

دوسری طرف، ہمارے سیاستدان بین الاقوامی مالیاتی اداروں کو خطوط لکھ کر مدد سے روکنے کی کوشش کرتے ہیں، نہری منصوبوں پر شور مچاتے ہیں اور ڈیمز کی تعمیر کی مخالفت کرتے ہیں۔ بعض سیاستدان تو دہشت گردوں کی حمایت میں بھی بیانات دیتے نظر آتے ہیں تاکہ اپنی سیاسی ساکھ برقرار رکھ سکیں۔

خودکشی پر مبنی طرز سیاست

یہ طرز سیاست نہ صرف ملکی مفاد کے خلاف ہے بلکہ قومی سلامتی کے لیے بھی خطرہ ہے۔ جب سیاست اس حد تک خود غرضی کا شکار ہو جائے تو کسی بیرونی دشمن کی ضرورت نہیں رہتی۔ دشمنی ہم خود اپنے ہی وطن سے کر رہے ہوتے ہیں۔

ایسی سیاست کے نتیجے میں غیر جمہوری قوتوں کو مداخلت کا موقع ملتا ہے، اور جب وہ مداخلت کرتی ہیں تو یہی سیاستدان ان کے آلہ کار بن کر اقتدار کے مزے لوٹتے ہیں۔ اس طرز سیاست سے نہ تو جمہوریت کو فائدہ پہنچتا ہے اور نہ ہی عوام کو۔

اگر ہم واقعی اپنے ملک کو ترقی کی راہ پر گامزن دیکھنا چاہتے ہیں تو ہمیں اس نرالے طرز سیاست کو خیرباد کہنا ہوگا۔ ورنہ وہ وقت دور نہیں جب ’’تمہاری داستان تک نہ ہو گی داستانوں میں‘‘۔