پاکستان کے ایٹمی دھماکوں کو 27 سال مکمل، یوم تکبیر کل منایا جائے گا۔ پاکستان کے ایٹمی دھماکوں کو 27 سال مکمل ہوگئے، کل بھرپور جذبے سے یوم تکبیر منایا جائے گا۔ یومِ تکبیر اور معرکہ حق کی کامیابی پر اظہار تشکر کی مرکزی اور بڑی تقاریب پشاور اور میر پور آزاد جموں کشمیر میں منعقد ہوں گی۔ وفاقی وزیر امور کشمیر، گلگت بلتستان، سیفران و صدر پاکستان مسلم لیگ ن خیبر پختونخوا امیر مقام مہمان خصوصی ہوں گے۔
پاکستان میں عید الاضحیٰ کی تاریخ کے تعین کے لیے ذوالحج کا چاند دیکھنے کی غرض سے مرکزی رویتِ ہلال کمیٹی کا اہم اجلاس آج اسلام آباد میں منعقد ہو رہا ہے۔
تاہم، قومی خلائی ادارے سپیس اینڈ اپر ایٹماسفیئر ریسرچ کمیشن (سپارکو) نے آج شام چاند نظر آنے کا امکان انتہائی کم ظاہر کیا ہے۔ سپارکو کے مطابق، 27 مئی کو غروبِ آفتاب کے وقت چاند کی عمر تقریباً 11 گھنٹے ہوگی، جس بناء پر اس کا دکھائی دینا مشکل ہے۔
اس جائزے کی بنیاد پر، سپارکو کی پیشگوئی کے مطابق یکم ذوالحج 29 مئی کو متوقع ہے۔ اس حساب سے، پاکستان بھر میں عیدالاضحیٰ 7 جون کو ہونے کا امکان ہے۔
دوسری جانب، سعودی عرب میں بھی آج ذوالحج کا چاند دیکھنے کے لیے اجلاس منعقد ہوگا۔ سعودی ماہرینِ فلکیات اور متحدہ عرب امارات کے فلکیاتی مرکز نے آج اپنے اپنے علاقوں میں چاند نظر آنے کے امکانات ظاہر کیے ہیں۔ اگر چاند نظر آ جاتا ہے تو متحدہ عرب امارات میں عیدالاضحیٰ 6 جون کو منائی جا سکتی ہے۔ حتمی تاریخوں کا اعلان متعلقہ ممالک کے سرکاری ادارے کریں گے۔
پاکستان کے مایہ ناز مارشل آرٹسٹ اور ریکارڈ ساز ایتھلیٹ عرفان محسود نے مزید چار گنیز ورلڈ ریکارڈز کی منظوری حاصل کرکے اپنی کامیابیوں میں ایک اور سنگ میل عبور کرلیا ہے۔ اس شاندار کارنامے کے بعد ان کے کل گنیز ورلڈ ریکارڈز کی تعداد 150 ہوگئی ہے، اور وہ یہ اعزاز حاصل کرنے والے پہلے پاکستانی بن گئے ہیں۔
اپنے حالیہ کارناموں میں، عرفان محسود نے ایک ناروے اور تین اٹلی کے ریکارڈز توڑے ہیں۔ خاص طور پر، انہوں نے 80 پاؤنڈ وزن کے ساتھ ہاتھ کی انگلیوں پر 35 پش اپس کرکے ناروے کے 32 پش اپس کا عالمی ریکارڈ توڑ دیا۔
عرفان محسود نے عالمی سطح پر، بالخصوص پش اپس کیٹیگری میں خود کو منوایا ہے، جہاں وہ 70 عالمی ریکارڈز کے ساتھ سرفہرست ہیں۔ انہوں نے 100 پاؤنڈ وزن کے ساتھ بھی 40 عالمی ریکارڈز قائم کیے ہیں۔ ان کا غلبہ مختلف وزنی کیٹیگریز میں بھی ہے، اور وہ 100 پاؤنڈ، 80 پاؤنڈ، 60 پاؤنڈ اور 40 پاؤنڈ وزن کے ساتھ سب سے زیادہ عالمی ریکارڈز اپنے نام کر چکے ہیں۔
ان کے متنوع ریکارڈز میں مارشل آرٹس پش اپس، اسکواٹس، جمپنگ جیکس، سٹیپ اپس، نی اسٹرائیکس، ایلبو اسٹرائیکس، سائیڈ جمپس، ہائی جمپس، اور اسٹار جمپس وغیرہ شامل ہیں۔
آج تک، عرفان محسود 20 مختلف ممالک کے ایتھلیٹس کے عالمی ریکارڈز توڑ چکے ہیں، جن میں امریکہ، برطانیہ، انڈیا، چین، ناروے، جرمنی، فرانس، فن لینڈ، فلپائن، اسپین، اٹلی، لبنان، مصر، عراق، شام اور خود پاکستان شامل ہیں۔
اپنی ذاتی کامیابیوں کے علاوہ، عرفان محسود ایک مخلص استاد بھی ہیں، اور ان کے 20 شاگرد بھی گنیز ورلڈ ریکارڈز بنا چکے ہیں۔ ان کی شاندار خدمات کے اعتراف میں، عرفان محسود کو 2023 میں صدارتی تمغہ برائے حسنِ کارکردگی سے بھی نوازا گیا تھا۔
جامعہ کوہاٹ برائے سائنس و ٹیکنالوجی (کسٹ) میں منعقدہ ایک اہم قومی سیمینار میں آپریشن بنیان مرصوص کی شاندار کامیابی پر افواجِ پاکستان کو زبردست خراجِ تحسین پیش کیا گیا۔ تقریب کا اہتمام شعبہ پولیٹیکل سائنس اور پاکستان اسٹڈیز کسٹ کے چیئرمین ڈاکٹر محمد ایاز کی زیر نگرانی کیا گیا۔
سیمینار میں وائس چانسلر پروفیسر ڈاکٹر سید ظفر الیاس، پرو وائس چانسلر، ڈینز، ڈائریکٹرز، شعبہ جات کے سربراہان، اساتذہ اور بڑی تعداد میں طلباء و طالبات نے شرکت کی۔
مہمانِ خصوصی جنرل آفیسر کمانڈنگ (جی او سی) 9 ڈویژن میجر جنرل ذوالفقار علی بھٹی نے اپنے خطاب میں نوجوانوں کو پاکستان کا “اصل سرمایہ” قرار دیا۔ انہوں نے کہا کہ دشمن پاکستان کے خلاف روایتی جنگ کے ساتھ ساتھ سائبر وار کے ذریعے عوام اور افواج میں دراڑ ڈالنے کی کوشش کر رہا ہے، مگر قوم نے ہمیشہ یکجہتی کا مظاہرہ کرتے ہوئے ان سازشوں کو ناکام بنایا ہے۔
وائس چانسلر پروفیسر ڈاکٹر سید ظفر الیاس نے کہا کہ آپریشن بنیان مرصوص ایک “معجزہ” تھا، جس کے بعد دشمن کی ہمت نہیں ہوگی کہ وہ پاکستان کی خودمختاری پر حملہ کرے۔ انہوں نے افواجِ پاکستان کو سلام پیش کیا اور تمام مہمانوں کا شکریہ ادا کیا۔
پروفیسر ڈاکٹر فخرالاسلام، ڈائریکٹر پاکستان اسٹڈی سینٹر، جامعہ پشاور نے کہا کہ کمزور معاشی حالات کے باوجود 2025 میں پاکستانی قوم نے قومی یکجہتی کا زبردست مظاہرہ کیا، جو خوش آئند ہے۔ انہوں نے حکومت سے مطالبہ کیا کہ اس قومی جذبے کو مزید فروغ دیا جائے۔
پروفیسر شکیلہ ناز، گورنمنٹ گرلز پوسٹ گریجویٹ کالج کوہاٹ نے کہا کہ اس سیمینار میں پاکستان کی تین بڑی طاقتیں – افواج، اساتذہ اور طلباء – ایک جگہ موجود تھیں، جو قومی وحدت کی علامت ہے۔ انہوں نے پاکستان کی جیو اسٹریٹیجک اہمیت پر بھی سیر حاصل گفتگو کی۔
جی او سی میجر جنرل ذوالفقار علی بھٹی نے دہرایا کہ پاکستان کے سائنسدان اور نوجوان ہی اس جنگ کے اصل ہیروز ہیں۔ انہوں نے مزید کہا کہ آپریشن بنیان مرصوص اس بات کی دلیل ہے کہ پاکستان دفاعی طور پر نہ صرف مستحکم ہے بلکہ جدید ٹیکنالوجی کی جانب بھی پیش قدمی کر رہا ہے۔
تقریب کے اختتام پر سوال و جواب کے سیشن میں طلباء و طالبات نے بھرپور دلچسپی کا مظاہرہ کیا، جس پر جی او سی نے طلباء کو تاریخ کے حوالے سے تحقیقی گروپس تشکیل دینے اور معلومات کا تبادلہ کرنے کی دعوت دی۔
ایبٹ آباد – عوامی ادبی تنظیم “سخن سلسلہ” ایبٹ آباد کے زیرِ اہتمام نواں یادگار مشاعرہ جلال بابا آڈیٹوریم میں منعقد ہوا۔ تقریب کے مہمانِ خصوصی شفقت حسین جعفری تھے جبکہ شاعرِ شام سعداللہ سورج تھے۔ مشاعرے کی صدارت ضیاء شاہد نے کی۔
گزشتہ شام منعقد ہونے والے اس مشاعرے کی نظامت کے فرائض کامران خلوص نے انجام دیے۔ اس موقع پر جن شعراء نے اپنا کلام پیش کیا ان میں زاہد جدون، توقیر نصیروی، حمزہ طفیل، زاہد علی، کامران خلوص، مدنی اعجاز مدنی، سعداللہ سورج اور ضیاء شاہد کے نام شامل ہیں۔
اس سے قبل معروف ثناء خوان مصطفی سید تنویر حسین شاہ نے بارگاہِ رسالت میں ہدیہ نعت پیش کر کے حاضرین کے دلوں کو گرمایا۔
مہمانِ خصوصی شفقت حسین جعفری نے آئندہ پروگرام میں نثری نشست کی ضرورت پر زور دیا، جسے حاضرین نے سراہتے ہوئے عملدرآمد کی یقین دہانی کروائی۔ انہوں نے پروین شاکر کی شاعری سے کلام بھی پیش کیا۔
مانسہرہ میں پانچ روزہ انسدادِ پولیو مہم کا آغاز، سیکیورٹی کیلئے 2002 پولیس افسران و جوان تعینات
مانسہرہ – ضلع مانسہرہ میں پانچ روزہ انسدادِ پولیو مہم کا آغاز ہوگیا ہے، جس کے پرامن انعقاد اور پولیو ٹیموں کی سیکیورٹی کے لیے سخت ترین انتظامات کیے گئے ہیں۔ پولیو ٹیموں کے تحفظ کے لیے 2002 پولیس افسران و جوان سیکیورٹی کے فرائض سر انجام دے رہے ہیں۔
ڈسٹرکٹ پولیس آفیسر (ڈی پی او) مانسہرہ نے تفصیلات بتاتے ہوئے کہا کہ پولیو ٹیموں کا تحفظ اولین ترجیح ہے۔ انسدادِ پولیو مہم کے دوران ضلع کے تمام داخلی و خارجی راستوں پر ناکہ بندی کی گئی ہے۔ ڈی پی او مانسہرہ نے تمام ایس پیز، ڈی ایس پیز اور ایس ایچ اوز کو احکامات جاری کرتے ہوئے کہا کہ تمام افسران بذات خود پولیو ٹیموں کی نگرانی کریں۔ انہوں نے پولیس افسران و جوانان کو اپنی حفاظت کے لیے بلٹ پروف جیکٹ اور ہیلمٹ کا استعمال یقینی بنانے کی بھی ہدایت کی۔
پولیو ڈیوٹی پر جانے سے قبل ڈی پی او مانسہرہ کے احکامات پر تمام تھانوں اور سرکلز میں ایس پیز کی زیر نگرانی ڈی ایس پیز اور ایس ایچ اوز نے نفری کو بریفنگ بھی دی۔
عوام کے نام اپنے پیغام میں ڈی پی او مانسہرہ نے کہا، “اپنے بچوں کو پولیو سے بچاؤ کے قطرے پلوانا ہم سب کا قومی فریضہ ہے۔ انسداد پولیو ٹیموں کے ساتھ تعاون کریں اور اپنے 5 سال تک کے بچوں کو پولیو کے قطرے پلائیں، تاکہ ان کو جسمانی معذوری سے بچایا جاسکے۔”
پی ڈی ایم اے کا الرٹ: خیبرپختونخوا کے بیشتر اضلاع میں آج شام سے بارشوں اور آندھی کا امکان، انتظامیہ کو ہدایات جاری
پشاور – پراونشل ڈیزاسٹر مینجمنٹ اتھارٹی (پی ڈی ایم اے) خیبرپختونخوا نے صوبے کے بیشتر اضلاع میں آج شام سے گرج چمک اور آندھی کے ساتھ بارش کی پیشگوئی کی ہے۔ بارش کا یہ سلسلہ ہفتے کے روز تک وقفے وقفے سے جاری رہنے کا امکان ہے۔
پی ڈی ایم اے کے مطابق، متاثر ہونے والے ممکنہ اضلاع میں چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، ہری پور، مالاکنڈ، بونیر، باجوڑ، مہمند، خیبر، اورکزئی، کرم، وزیرستان، پشاور، چارسدہ، نوشہرہ، صوابی، بنوں، کرک اور کوہاٹ شامل ہیں۔
پی ڈی ایم اے نے تمام ضلعی انتظامیہ کو بارشوں کے باعث کسی بھی ناخوشگوار واقعے سے پیشگی نمٹنے کے لیے مراسلہ جاری کیا ہے، جس میں چھوٹی بڑی مشینری کی دستیابی یقینی بنانے کی ہدایت کی گئی ہے۔
عوام کو ہدایت کی گئی ہے کہ بارش کے دوران بجلی کی تاروں، بوسیدہ عمارتوں و تعمیرات، سائن بورڈز اور بل بورڈز سے دور رہیں۔ کسان حضرات موسمیاتی پیش گوئی کو مدنظر رکھتے ہوئے اپنے معمولات ترتیب دیں۔ حساس بالائی علاقوں میں سیاحوں اور مقامی آبادی کو موسمی حالات سے باخبر رہنے اور احتیاطی تدابیر اپنانے کی ہدایت کی گئی ہے۔
حساس اضلاع میں ضلعی انتظامیہ کو مقامی آبادی تک پیغامات مقامی زبانوں میں پہنچانے کی بھی ہدایت کی گئی ہے۔ کسی بھی ہنگامی صورتحال میں تمام متعلقہ ادارے روڈ لنکس کی بحالی میں چوکس رہیں گے اور سڑک کی بندش کی صورت میں ٹریفک کے لیے متبادل راستے فراہم کیے جائیں گے۔
ڈی جی پی ڈی ایم اے نے ہدایت کی ہے کہ سیاح موسمی صورتحال اور سڑکوں کی بندش کے پیش نظر سیاحتی مقامات کا رخ کرنے سے پہلے پی ڈی ایم اے کی ہیلپ لائن 1700 پر رابطہ کریں۔ پی ڈی ایم اے کے ترجمان کے مطابق، ایمرجنسی آپریشن سینٹر مکمل طور پر فعال ہے اور عوام کسی بھی ناخوشگوار واقعے کی اطلاع پی ڈی ایم اے کی فری ہیلپ لائن 1700 پر دے سکتے ہیں۔
