Daily Archives: August 20, 2025

وزیر اعلی خیبر پختونخوا علی امین گنڈاپور کی زیر صدارت صوبائی کابینہ کا 37 واں اجلاس ہوا ۔ سیلاب سے شہید ہونے والوں کی درجات کی بلندی کے دعا اور فاتحہ خوانی۔ کابینہ کو سیلاب سے ہونے والی نقصانات،  ریلیف اور بحالی کی سرگرمیوں پر تفصیلی بریفنگ۔حالیہ سیلاب میں ضلعی انتظامیہ اور ریسکیو اداروں نے بہترین ریسکیو آپریشن کیا۔دیگر تمام متعلقہ محکموں اور اداروں نے بروقت اور بہترین رسپانس دیا۔ اس بہترین کارکردگی پر تمام ادارے اور محکمے تعریف کے حقدار ہیں۔ پہلے مرحلے میں ریسکیو آپریشن مکمل ہوگیا ہے، تاہم لاپتہ افراد کی تلاش جاری ہے۔ شہداء کے اہل خانہ اور زخمیوں کو معاوضوں کی ادائیگی جاری ہے۔ متاثرین اطمینان رکھیں، سب کو معاوضے ملیں گی، کوئی بھی محروم نہیں رہے گا۔ متاثرہ علاقوں میں مراکز صحت کو فوری طور پر فعال بنایا جائے۔ ان مراکز صحت ضروری ادویات کی دستیابی یقینی بنائی جائے۔ ان علاقوں میں موبائل ہسپتالوں کی دستیابی بھی یقینی بنائی جائے۔ متاثرہ علاقوں میں وبائی امراض پھیلنے کے ممکنہ خدشے کے پیش نظر پیشگی احتیاطی تدابیر اپنائی جائیں۔ ان علاقوں میں مال مویشیوں کے لئے چارہ کی فراہمی اور انہیں بیماریوں سے بچانے کے لئے بھی اقدامات کئے جائیں۔ متاثرہ علاقوں میں مکمل صفائی کے لئے خصوصی مہم شروع کیا جائے۔

سیلاب زدہ علاقوں میں پینے کے پانی ٹیوب ویلز وغیرہ کو جلد بحال کیا جائے۔ان علاقوں تک تمام رابطہ سڑکوں کی بحالی کے کام کو تیز کیا جائے۔متاثرہ علاقوں میں املاک کے نقصانات کا ڈیٹا اکھٹا کیا جا رہا ہے۔جن جن کے گھر تباہ ہوئے ہیں،  انہیں گھر بنا کر دیں گے۔لائیو اسٹاک کے نقصانات کا بھی معاوضہ دیا جائے گا۔اسی طرح جن کے کاروبار متاثر ہوئے ہیں،  انہیں بھی بھر پور پیکیج دیا جائے گا۔متاثرہ اضلاع میں ریلیف اور بحالی کے کاموں کو تیز کرنے کے لئے مزید افسران تعینات کئے جائیں۔صوبائی حکومت اس پوزیشن میں ہے کہ اپنے لوگوں کو دوبارہ اپنے پاؤں پر کھڑا کر سکے۔ تاہم لوگ متاثرین کی مدد کے لئے صوبائی حکومت سے رابطہ کر رہے ہیں۔ لوگوں کے عطیات کو حقداروں تک پہنچانے اور اس میں بھر پور شفافیت کے لئے خصوصی اکاونٹ کھولا جارہا ہے۔ متاثرہ علاقوں میں بحالی اور امداد کے لئے تین ارب روپے کے علاوہ مزید دو ارب روپے جاری کئے گئے۔

 تھانہ لوندخوڑ میں ڈسپیوٹ ریزولوشن کونسل (ڈی آر سی) کے نئے دفتر کا افتتاح ریجنل پولیس آفیسر مردان جواد قمر (ستارہ شجاعت، کیو پی ایم) نے کر دیا۔ اس موقع پر ڈسٹرکٹ پولیس آفیسر مردان ظہور بابر آفریدی، ایس پی صدر ڈویژن انعام جان خان، دیگر پولیس افسران، ڈی آر سی چیئرمین اور ممبران بھی موجود تھے۔ افتتاحی تقریب کے دوران آر پی او مردان ریجن جواد قمر نے نومنتخب ڈی آر سی کابینہ سے حلف بھی لیا اور ان پر زور دیا کہ وہ عوامی مسائل کے حل میں غیر جانبداری، دیانت داری اور شفافیت کو یقینی بنائیں۔

ریجنل پولیس آفیسر مردان جواد قمر نے اپنے خطاب میں کہا کہ ڈسپیوٹ ریزولوشن کونسل عوامی تنازعات کے حل کا ایک مؤثر فورم ہے، جس کے ذریعے تھانوں اور عدالتوں پر بوجھ کم ہو رہا ہے اور شہریوں کو بروقت انصاف مل رہا ہے۔ انہوں نے مزید کہا کہ ڈی آر سی اپنی کردار اور خدمات کی بدولت آج ایک ناگزیر ضرورت بن چکی ہے۔ ڈی آر سی ممبران کی کاوشوں سے قتل مقاتلوں کی پرانی دشمنیاں اور دیگر سنگین نوعیت کے تنازعات خوش اسلوبی سے حل ہو رہے ہیں، جو نہ صرف علاقائی امن و امان کے ضامن ہیں بلکہ فریقین کے مابین صلح سے اللہ تعالیٰ کی خوشنودی بھی حاصل ہوتی ہے۔

ڈی پی او مردان ظہور بابر آفریدی نے اپنے پیغام میں کہا کہ ڈی آر سی کمیٹیاں پولیس اور عوام کے درمیان اعتماد کی فضا قائم کرنے میں کلیدی کردار ادا کر رہی ہیں، اور اس فورم کے ذریعے چھوٹے چھوٹے تنازعات مقامی سطح پر مشاورت سے حل ہو رہے ہیں۔ شرکاء نے بھی ڈی آر سی دفتر کے قیام اور نومنتخب کابینہ کی تشکیل کو خوش آئند قرار دیتے ہوئے امید ظاہر کی کہ اس اقدام سے عوامی مسائل کے حل میں مزید تیزی آئے گی