جنوبی وزیرستان میں یومِ دفاع و شہداء کی تقریبات، طلباء کا جوش و خروش، ہتھیاروں کی نمائش اور ملی نغمے جنوبی وزیرستان: یومِ دفاع و شہداء 2025 کے موقع پر جنوبی وزیرستان کے مختلف علاقوں میں تقاریب کا انعقاد کیا گیا۔ ملک عبدالخالق شہید پبلک اسکول وانا، شیر نواز شہید پبلک اسکول سراروغہ، فالکن پبلک اسکول بی بی رغزئی اور پیر روشان پبلک اسکول کانیگرم سمیت مختلف تعلیمی اداروں میں خصوصی پروگرامز منعقد ہوئے۔
اس موقع پر طلباء کے لیے “ایک دن پاک آرمی کے ساتھ” جیسی سرگرمیوں کا اہتمام کیا گیا، جن میں چھوٹے اور بڑے ہتھیاروں کی نمائش رکھی گئی۔ طلباء نے ہتھیاروں کے بارے میں معلومات حاصل کیں اور فوجی جوانوں کے ساتھ براہِ راست تبادلہ خیال کیا۔ پاک فوج کے افسران اور جوانوں نے بھی ان پروگراموں میں شرکت کی اور بچوں کی حوصلہ افزائی کی۔ تقاریب کے دوران طلباء نے پاک فوج کے ساتھ مل کر پرچم کشائی کی اور ملکی سلامتی کے لیے اجتماعی دعا کی۔ اس کے علاوہ ملی جذبے سے لبریز نغمے اور خوبصورت ٹیبلوز بھی پیش کیے گئے جنہیں حاضرین نے بے حد سراہا۔ پروگرامز کا اختتام نمایاں کارکردگی دکھانے والے طلباء میں انعامات کی تقسیم اور پاکستان زندہ باد کے فلک شگاف نعروں کے ساتھ ہوا۔
