Daily Archives: November 5, 2025

ڈائریکٹر جنرل ریسکیو 1122 طیّب عبداللہ کی خصوصی ہدایت پر ضلع نوشہرہ میں ڈسٹرکٹ ایمرجنسی آفیسر ملک اشفاق حسین کی زیرِ نگرانی انٹر ڈسٹرکٹ فزیکل فٹنس اینڈ اسکل انہانسمنٹ (ریفریشر) ٹریننگ پروگرام کا باقاعدہ آغاز ہو گیا۔ ٹریننگ ونگ کے زیرِ اہتمام اس پروگرام کے پہلے روز تمام اہلکاروں نے شاندار نظم و ضبط، وقت کی پابندی اور ٹیم ورک کا مظاہرہ کیا۔ ٹریننگ کے سیشنز تجربہ کار انسٹرکٹرز ڈاکٹر سلیم الرحمٰن، ناصر علی اور وجے کمار کی زیرِ تربیت جاری ہیں۔ ٹریننگ کے دوران جسمانی فٹنس کے لیے رننگ اور پی۔ٹی ایکسرسائزز کروائی گئیں، جبکہ نظم و ضبط کے فروغ کے لیے ڈرل مشقیں بھی تمام ریسکیو ٹیم نے انجام دیں۔ مزید یہ کہ روزانہ کی بنیاد پر فائر، میڈیکل اور ڈیزاسٹر ریسپانس (DR) کلاسز بھی لی جائیں گی تاکہ اہلکاروں کی پیشہ ورانہ مہارت میں مزید نکھار پیدا کیا جا سکے۔ اس تربیتی پروگرام کا بنیادی مقصد ریسکیو اہلکاروں کی جسمانی فٹنس، ڈسپلن اور فیلڈ میں عملی کارکردگی کو مزید بہتر بنانا ہے تاکہ ایمرجنسی کی ہر صورتحال میں بروقت اور مؤثر خدمات کی فراہمی کو یقینی بنایا جا سکے۔

آج بابا گرو نانک دیو جی کے 556 یوم ولادت پر میں، پاکستان اور دنیا بھر میں بسنے والی سکھ برادری کو پرخلوص اور دلی مبارکباد پیش کرتا ہوں۔ بابا گرو نانک دیو جی کا شمار نہ صرف سکھوں کے اکابرین میں ہوتا ہے بلکہ وہ ایک ایسے نظریاتی آدمی تھے جنہوں نےساری انسانیت کے لئے امن و برابری اور تحمل و برداشت کو فروغ دینےکا درس دیا۔ بابا گرو نانک کی دائمی تعلیمات بشمول انسانیت سے محبت، بے لوث خدمت، بین المذاہب ہم آہنگی نسلوں کو رہنمائی فراہم کر رہی ہے۔ اور ان کا اتحاد و یگانگت اور رواداری کا پیغام ایک پرامن اور انصاف پسند دنیا کو قائم کرنے کے لیے مشعل راہ ہے۔ پاکستان کے لیے یہ باعث فخر ہے کہ پاکستان بابا گرو نانک دیو جی کی زندگی اور تعلیمات سے متعلقہ متعدد گوردواروں، بالخصوص گوردوارہ جنم آستان ننکانہ صاحب کی حفاظت کر رہا ہے۔ حکومت پاکستان تمام مذہبی اقلیتوں کے حقوق کی حفاظت کا غیر متزلزل عزم رکھتی ہے۔اسی عزم کے مطابق حکومت ان تمام مذہبی مقامات کی حفاظت اور خراج عقیدت کے لئے آنے والے زائرین کی رسائی میں ہر طرح کی سہولت بہم پہنچا رہی ہے۔ پاکستان ہر سال دنیا بھر سےآنے والے سکھ یاتریوں کو ان مقدس مقامات پر خوش آمدید کہتی ہے اور ہر ممکن سہولیات فراہم کرتی ہے۔ آئیے آج کے اس پر مسرت دن کو مناتے ہوئے بابا گرو نانک کے امن و رواداری اور باہمی ہم آہنگی کے پیغامات سے سبق حاصل کرتے ہوئے دنیا کو اتحاد ویگانگت، باہمی عزت اور امن کا گہوارہ بنائیں۔

ڈپٹی کمشنر مردان کی ہدایت پر اسسٹنٹ کمشنر مردان ڈاکٹر احمد شیر زمان ڈوگر کی سربراہی میں بینک روڈ سے پاکستان چوک اور پار ہوتی چوک تک تجاوزات کے خلاف بھرپور آپریشن کیا گیا۔ آپریشن کے دوران متعدد غیر قانونی ریڑھیاں قبضے میں لی گئیں، جبکہ پار ہٹی چوک میں بڑی تجاوزات کے مرتکب تین دکانوں کو سیل کر دیا گیا۔ اس موقع پر اسسٹنٹ کمشنر مردان ڈاکٹر احمد شیر زمان ڈوگر نے کہا کہ تجاوزات عوامی آمد و رفت میں رکاوٹ اور ٹریفک کے بہاؤ میں خلل کا باعث بنتی ہیں، اس لیے انہیں کسی صورت برداشت نہیں کیا جائے گا۔ عوامی سہولت اور شہر کی خوبصورتی برقرار رکھنے کے لیے ایسے آپریشنز آئندہ بھی جاری رہیں گے۔

ہدف کالج نے جناح کالج برائے خواتین پشاور یونیورسٹی کو ہراکر پشاور بورڈ کے زیر اہتمام انٹر کالجیٹ بیڈمنٹن ایونٹ جیت لیا۔ ہدف کالج کی جانب سے لینا، عمیمہ، سپوگمئی، ایمان اور زونیرہ نے بیڈمنٹن ایونٹ میں حصہ لیا۔ کاج پرنسپل فرح اسد نے کھلاڑیوں میں انعامات تقسیم کئے۔ ڈائریکٹریس گرلز سپورٹس مریم بشیر، کوچ زعفران اور ملک فراز بھی اس موقع پرموجود تھے۔ فرح اسد نے طالبات کی تعلیم کے ساتھ ساتھ کھیلوں کی سرگرمیوں میں حصہ لینے کو خوش ا?ئند قرار دیتے ہوئے کہا کہ کھیل کسی بھی صحت مند معاشرے اور افراد کے لئے زندگی کا ضروری جزو ہیں، طالبات کو تعلیم کے ساتھ ساتھ اسی طرح کھیلوں کی سرگرمیوں میں بھی بڑھ چڑھ کر حصہ لینا چاہئے جس سے ان میں اعتماد بڑھے گا، برداشت پیدا ہوگی اور وہ ایک اچھے معاشرے کی تشکیل میں بہترین کردار ادا کرسکیں گی۔ انہوں نے کالج کی طالبات کو ایونٹ جیتنے پر مبارکباد دی اور اس عزم کا اعادہ کیا کہ طالبات کو کھیلوں کے مواقع کی فراہمی کے لئے ہر ممکن اقدامات اٹھائے جائیں گے۔