Central Jail Sports Gala

سنٹرل جیل بنوں میں نئے سال کے موقع پر قیدیوں کے لیے اسپورٹس گالا

سنٹرل جیل بنوں میں نئے سال 2026 کی مناسبت سے قیدیوں کے لیے ایک پُر جوش اور رنگا رنگ اسپورٹس گالا منعقد کیا گیا۔ اس تقریب کا مقصد قیدیوں کی جسمانی اور ذہنی صحت کو بہتر بنانا اور انہیں مثبت سرگرمیوں کی طرف راغب کرنا تھا۔

تقریب کے مہمانِ خصوصی ڈی پی او بنوں یاسر آفریدی اور ڈپٹی کمشنر بنوں محمد فہیم خان تھے، جنہیں سنٹرل جیل کے سپرنٹنڈنٹ سمیع اللہ شینواری نے جیل پہنچنے پر پرتپاک انداز میں خوش آمدید کہا۔

اسپورٹس گالا میں مختلف کھیلوں کے مقابلے منعقد کیے گئے، جن میں قیدیوں نے بھرپور جوش و خروش کے ساتھ حصہ لیا۔ مہمانانِ خصوصی نے خطاب کرتے ہوئے اس قسم کی سرگرمیوں کو سراہا اور کہا کہ یہ قیدیوں کی اصلاح، حوصلہ افزائی اور معاشرے میں دوبارہ مثبت کردار ادا کرنے میں معاون ثابت ہوتی ہیں۔

آخر میں کامیاب کھلاڑیوں کو انعامات سے نوازا گیا جبکہ انتظامیہ کی جانب سے اسپورٹس گالا کے کامیاب انعقاد پر جیل انتظامیہ کی کوششوں کو بھی سراہا گیا۔

News

ریسکیو1122 نے 2025 میں لاکھوں شہریوں کو بروقت امداد فراہم

ریسکیو1122 خیبرپختونخوا کی سال 2025 کی سالانہ کارکردگی رپورٹ جاری کر دی گئی ہے، جس کے مطابق ریسکیو1122 نے صوبہ بھر میں 2 لاکھ 71 ہزار سے زائد ایمرجنسی واقعات میں بروقت اور مؤثر خدمات انجام دیں۔

ترجمان ریسکیو1122 بلال احمد فیضی کے مطابق گزشتہ سال کے دوران ریسکیو1122 نے 2 لاکھ 89 ہزار سے زائد زخمیوں اور مریضوں کو ابتدائی طبی امداد فراہم کرنے کے بعد مختلف ہسپتالوں میں منتقل کیا۔ رپورٹ کے مطابق سال 2025 میں 1 لاکھ 69 ہزار سے زائد میڈیکل ایمرجنسیز جبکہ 25 ہزار سے زائد ٹریفک حادثات میں امدادی کارروائیاں کی گئیں۔

ترجمان نے بتایا کہ ریسکیو1122 نے گزشتہ برس 5691 آتشزدگی کے واقعات، 780 ڈوبنے کے حادثات، 194 عمارتوں کے منہدم ہونے اور 93 مختلف نوعیت کے دھماکوں کے واقعات میں بھی ریسکیو خدمات فراہم کیں۔ اس کے علاوہ ہیلتھ ایمبولینس سروس (ریفرل) کے ذریعے 58 ہزار 800 شدید زخمیوں اور مریضوں کو مختلف اضلاع اور بڑے ہسپتالوں میں بروقت منتقل کیا گیا۔

رپورٹ کے مطابق مختلف ایمرجنسی واقعات کے دوران 6185 افراد جاں بحق ہوئے، تاہم ریسکیو1122 کی ٹیموں نے ہر ممکن امدادی اور حفاظتی اقدامات یقینی بنائے۔

ترجمان ریسکیو1122 کا کہنا تھا کہ ادارہ شہری علاقوں کے ساتھ ساتھ ضم شدہ اضلاع اور سابق فاٹا کے علاقوں میں بھی بلا امتیاز ایمرجنسی خدمات فراہم کر رہا ہے۔ انہوں نے مزید بتایا کہ سیاحتی مقامات پر عارضی ریسکیو پوائنٹس اور ریسکیو اسٹیشنز قائم کیے گئے ہیں، جہاں سیاحوں اور مقامی افراد کو فوری اور مؤثر امدادی سہولیات فراہم کی جا رہی ہیں۔

ترجمان کے مطابق ریسکیو1122 خیبر پختونخوا عوام کی جان و مال کے تحفظ کے لیے ہر وقت تیار ہے اور مستقبل میں بھی ایمرجنسی رسپانس نظام کو مزید مؤثر بنانے کے لیے اقدامات جاری رکھے جائیں گے۔

Editorial

2026 سے کونسی توقعات وابستہ ؟

عقیل یوسفزئی
فاینانشل ٹائمز نے ایک رپورٹ میں سال 2025 کو پاکستان کے لیے کامیاب سال قرار دیا ہے ۔ اس کے مقابلے میں اخبار نے اس برس کو بھارت کے لیے شرمندگی اور ناکامی کا سوال قرار دیا ہے ۔
دوسری جانب بلوم برگ نے ایک رپورٹ میں کہا ہے کہ پاکستان دفاعی صلاحیت سے مالامال ملک کے طور پر سامنے آیا ہے اور اب یہ ملک معاشی ترقی اور استحکام کی راہ پر گامزن ہے ۔
خیبرپختونخوا کے عوامی حلقوں نے ایک سروے میں فیلڈ مارشل سید عاصم منیر کو ” ہیرو” قرار دیا ہے اور کہا ہے کہ پاکستان فیلڈ مارشل کی قیادت میں محفوظ ہاتھوں میں ہے ۔
دوسری جانب ایک تھنک ٹینک نے اپنی رپورٹ میں کہا ہے کہ سال 2024 کے مقابلے میں 2025 کے دوران پاکستان میں دہشت گردی کے واقعات میں 73 فی صد اضافہ ہوا اور خیبرپختونخوا ، بلوچستان ان حملوں کی ذد میں رہے ۔کالعدم ٹی ٹی پی نے 2025 میں 3573 حملوں کا دعویٰ کرتے ہوئے تفصیلات جاری کی ہیں ۔ دعویٰ کیا گیا ہے کہ ان حملوں کے نتیجے میں 3000 سے زائد افراد کو شہید جبکہ اتنے ہی گرفتار کیا گیا ہے ۔ اموات سے متعلق اس دعوے کو تجزیہ کار غلط قرار دیتے ہیں تاہم اس تلخ حقیقت سے انکار نہیں کیا جاسکتا کہ اسی تسلسل میں 2026 کے ابتدائی چھ مہینوں دو طرفہ کارروائیوں کا سلسلہ جاری رہے گا حالانکہ فیلڈ مارشل سید عاصم منیر نے گزشتہ روز نیشنل ورکشاپ کے شرکاء سے خطاب کرتے ہوئے کہا کہ بلوچستان اور خیبرپختونخوا کے عوام کو ہر قیمت پر تحفظ فراہم کیا جائے گا اور دہشتگردوں کے علاؤہ عدم استحکام پیدا کرنے والے عناصر کے ساتھ بھی سختی کے ساتھ نمٹنے کا سلسلہ جاری رہے گا ۔
اس تمام صورتحال کے تناظر میں کہا جاسکتا ہے کہ 2026 ریاستی ، سیاسی ، سفارتی ، سیکیورٹی اور معاشی میدانوں یا شعبوں میں پاکستان کے لیے اہم ترین سال ثابت ہوگا ۔
( 2 جنوری 2026 )