پولیس افسران کے لیے صنفی بنیاد پر تشدد کے حوالے سے تربیتی سیشن
جمعہ کے روز ڈسٹرکٹ پبلک پراسیکیوٹر آفس چارسدہ کی جانب سے جناب سنگین شاہ ڈسٹرکٹ پبلک پراسیکیوٹر چارسدہ کی سرپرستی میں ضلع چارسدہ کے پولیس افسران کے لیے ایک خصوصی ٹریننگ سیشن کا انعقاد کیا گیا۔ جس میں ڈی ایس پی سرکل چارسدہ کے ہمراہ ایس ایچ او پولیس اسٹیشن پڑانگ، سی آئی او پولیس اسٹیشن ن، پڑانگ، ترناب اور سٹی نے شرکت کی۔
سیشن میں صنفی بنیاد پر تشدد (Gender-Based Violence) کے مقدمات پر تفصیلی بریفنگ دی گئی، جس میں بالخصوص اینٹی ریپ ایکٹ 2021 اور اینٹی ریپ انویسٹیگیشن رولز 2022 پر جامع گفتگو کی گئی۔ شرکاء کو اینٹی ریپ مقدمات کے اندراج کے طریقۂ کار، متاثرہ فریق کی شناخت کے تحفظ اور ریپ کیسز میں شواہد کے مؤثر و قانونی حصول کے حوالے سے باقاعدہ تربیت فراہم کی گئی۔
اس سیشن کا مقصد پولیس افسران کو اینٹی ریپ مقدمات کی پیشہ ورانہ اندراج اور تفتیش کے حوالے سے حساس بنانا اور قانون کے مطابق معیاری و مؤثر تفتیش کو یقینی بنانا تھا۔
ڈسٹرکٹ پبلک پراسیکیوٹر آفسچارسدہ قانون کی بالادستی، انصاف کی فراہمی اور متاثرین کے حقوق کے تحفظ کے لیے پولیس کے ساتھ باہمی تعاون کے تحت ایسے تربیتی اقدامات جاری رکھے گا۔
کرنل شیر خان کیڈٹ کالج میں تقریری مقابلے اور اسپورٹس گالا
کرنل شیر خان کیڈٹ کالج صوابی میں پاکستان کے مختلف کیڈٹ کالجز کے مابین تقریری مقابلوں اور اسپورٹس گالا کا انعقاد کیا گیا۔ سپورٹس گالا میں مختلف کیڈٹ کالجز کے کیڈٹس نے تقریری مقابلوں کے علاوہ کھیلوں کے مقابلوں میں بھی بڑھ چڑھ کے حصہ لیا۔ گالا کے آخری دن اختتامی تقریب میں کھیلوں اور تقاریر کے فائنل مقابلوں کا انعقاد کیا گیا۔
کور کمانڈر پشاور لیفٹیننٹ جنرل عمر احمد بخاری مرکزی تقریب کے مہمان خصوصی تھے۔ انہوں نے مختلف مقابلوں میں حصہ لینے والے کیڈٹس کی جسمانی فٹنس، نظم و ضبط اور کھیلوں میں دلچسپی کو سراہا۔
بعد ازاں کور کمانڈر نے تقریری مقابلوں میں حصہ لینے والے طلبہ کی فکری، علمی اور تحلیقی صلاحیتوں کی بھرپور تعریف کی۔
تقریب میں نمایاں کارکردگی دکھانے والے کیڈٹس میں ٹرافیاں اور انعامات تقسیم کیے گئے ۔
یاد رہے کہ کرنل شیر خان کیڈٹ کالج صوابی کا قیام 2011 میں عمل میں آیا اور یہ ادارہ اپنے تعلیمی معیار کے لیے ملک میں نمایاں مقام رکھتا ہے ۔
پشاور زلمی کا رحمان اللہ گرباز کو ڈائریکٹ سائن کرنے کا اعلان
پشاور: پشاور زلمی نے ایچ بی ایل پاکستان سپر لیگ کے گیارہویں سیزن سے قبل افغانستان کے اسٹار وکٹ کیپر بیٹر رحمان اللہ گرباز کو ڈائریکٹ سائن کرنے کا باضابطہ اعلان کر دیا ہے۔
رحمان اللہ گرباز جدید ٹی ٹوئنٹی کرکٹ کے سب سے پُرجوش اور خطرناک بیٹرز میں شمار ہوتے ہیں۔ وہ اپنے ٹی ٹوئنٹی کیریئر میں 145 کے شاندار اسٹرائیک ریٹ کے ساتھ 6,244 رنز بنا چکے ہیں۔ ٹاپ آرڈر میں جارحانہ بیٹنگ اور وکٹوں کے پیچھے بہترین کارکردگی کی بدولت وہ کسی بھی میچ کا نقشہ بدلنے کی بھرپور صلاحیت رکھتے ہیں۔
گرباز کی شمولیت سے پشاور زلمی اسکواڈ کو قیمتی بین الاقوامی تجربہ حاصل ہوگا، جو ٹیم کی مجموعی کارکردگی کو مزید بہتر بنانے میں اہم کردار ادا کرے گا۔
اس موقع پر چیئرمین پشاور زلمی جاوید آفریدی نے افغان اسٹار کو خوش آمدید کہتے ہوئے کہا:
“زلمی فیملی میں خوش آمدید! ہم فخر کے ساتھ رحمان اللہ گرباز کو اپنی ٹیم میں شامل کر رہے ہیں۔ ہمیں امید ہے کہ آپ اپنی آمد سے ٹیم کا نام روشن کریں گے اور میدان میں شاندار کارکردگی دکھائیں گے۔”
انہوں نے مزید کہا کہ گرباز کی شمولیت سے ٹیم مزید مضبوط ہو گئی ہے اور شائقین کو آنے والے سیزن میں سنسنی خیز مقابلے دیکھنے کو ملیں گے۔
اس سائننگ کے ساتھ پشاور زلمی نے اپنی ٹیم کو مزید مستحکم بنا لیا ہے، جبکہ رحمان اللہ گرباز جیسے متحرک اور میچ وننگ کھلاڑی کی شمولیت شائقین کے لیے دلچسپ لمحات اور ٹیم کے لیے نمایاں کامیابیوں کا سبب بن سکتی ہے۔
ازبکستان کے صدر شوکت مرزیوئیف کا جی آئی ڈی ایس کا دورہ
اسلام آباد: صدر جمہوریہ ازبکستان شوکت مرزیوئیف نے سینئر وزراء کے ہمراہ اپنے دورۂ پاکستان کے ایک حصے کے طور پر گلوبل انڈسٹریل اینڈ ڈیفنس سلوشنز (GIDS) کا سرکاری دورہ کیا۔ فیلڈ مارشل سید عاصم منیر، NI (M) HJ، چیف آف آرمی اسٹاف اور چیف آف ڈیفنس اسٹاف نے معزز صدر اور ان کے وفد کا پرتپاک استقبال کیا اور دورے کے دوران ان کی میزبانی کی۔
دورے کے موقع پر صدر ازبکستان کو جی آئی ڈی ایس کے متنوع اور جدید پورٹ فولیو کے بارے میں تفصیلی بریفنگ دی گئی، جس میں جدید دفاعی حل، صنعتی صلاحیتیں اور تکنیکی اختراعات شامل تھیں۔ وفد نے مختلف اہم تنصیبات کا دورہ کیا اور دفاعی مصنوعات کا مشاہدہ کیا جو مقامی دفاعی پیداوار اور صنعتی ترقی میں پاکستان کی بڑھتی ہوئی مہارت کی عکاسی کرتی ہیں۔
اس موقع پر پاکستان اور ازبکستان کے درمیان دفاع، ٹیکنالوجی اور صنعتی شعبوں میں تعاون کو مزید فروغ دینے کے عزم کا اعادہ کیا گیا۔ دونوں ممالک نے شراکت داری، علم کے تبادلے اور مشترکہ منصوبوں کو وسعت دینے کی اہمیت پر زور دیا۔
دورے کے دوران اس بات پر بھی اتفاق کیا گیا کہ باہمی تعاون کے ذریعے دونوں ممالک کی دفاعی اور صنعتی صلاحیتوں کو مزید مضبوط بنایا جائے گا۔ قیادت نے مستقبل میں مشترکہ منصوبوں اور سرمایہ کاری کے مواقع تلاش کرنے پر آمادگی ظاہر کی۔
یہ دورہ پاکستان اور جمہوریہ ازبکستان کے درمیان دو طرفہ تعلقات کو مضبوط بنانے اور مختلف شعبوں میں تعاون کے نئے امکانات پیدا کرنے کی جانب ایک اہم پیش رفت قرار دیا جا رہا ہے۔