عالمی یومِ صحت 2026: بزرگ افراد کی مربوط نگہداشت پر پالیسی ورکشاپ
پشاور: عالمی یومِ صحت 2026 کے موقع پر صوبائی وزیر صحت خلیق الرحمن کی قیادت میں محکمہ صحت خیبرپختونخوا نے بزرگ افراد کی صحت سے متعلق ایک ون ڈے پالیسی ورکشاپ کا انعقاد کیا، جس کا مقصد بزرگ شہریوں کے لیے مربوط اور جامع صحت خدمات کو صوبائی ہیلتھ فریم ورک میں شامل کرنا تھا۔
ورکشاپ کے دوران بزرگ افراد کی نگہداشت کے عالمی ماڈل آئی کوپ (ICOPE) کو فروغ دینے اور غیر متعدی امراض (این سی ڈیز) کے مؤثر انتظام کو صحت کے نظام کا حصہ بنانے پر تفصیلی غور کیا گیا۔ اس موقع پر ماہرین صحت، پالیسی سازوں اور شراکت دار اداروں کے نمائندوں نے شرکت کی اور بزرگ افراد کی صحت سے متعلق مختلف تجاویز پیش کیں۔
صوبائی وزیر صحت خلیق الرحمن نے اپنے پیغام میں کہا کہ حکومت خیبرپختونخوا بزرگ شہریوں کو باوقار، معیاری اور بروقت صحت سہولیات کی فراہمی کے لیے پُرعزم ہے۔ انہوں نے کہا کہ بدلتی ہوئی آبادیاتی صورتحال کے پیش نظر بڑھتی عمر کے افراد کو درپیش صحت کے مسائل کو ترجیحی بنیادوں پر حل کرنا وقت کی اہم ضرورت ہے۔
انہوں نے مزید کہا کہ آئی کوپ (ICOPE) اور این سی ڈیز مینجمنٹ کو صوبائی ہیلتھ فریم ورک میں شامل کرنے سے نہ صرف صحت کے نظام کو مضبوط بنایا جا سکے گا بلکہ کمیونٹی کی سطح پر صحت مند بڑھاپے کے فروغ میں بھی مدد ملے گی۔
ورکشاپ کے اختتام پر اس عزم کا اعادہ کیا گیا کہ اس موقع پر پیش کی گئی سفارشات کو صوبائی صحت پالیسی کا حصہ بنایا جائے گا تاکہ ایک جامع، پائیدار اور عوام دوست نظامِ صحت کو یقینی بنایا جا سکے، جبکہ شمولیتی نظام، مضبوط کمیونٹیز اور صحت مند بڑھاپے کے فروغ پر بھی زور دیا گیا۔
خیبرپختونخوا میں بائیک اور سکوٹر مالکان کے لیے فیول سبسڈی اسکیم کا اعلان
پشاور: وزیراعلیٰ خیبرپختونخوا محمد سہیل آفریدی نے صوبے میں رجسٹرڈ موٹر سائیکل اور سکوٹر مالکان کے لیے “احساس فیول سپورٹ اسکیم” کے تحت ماہانہ 2000 روپے فیول سبسڈی دینے کا اعلان کر دیا ہے۔ اس کے ساتھ ہی موٹر سائیکل اور سکوٹر کی ملکیت کی منتقلی کی فیس بھی معاف کرنے کا فیصلہ کیا گیا ہے تاکہ عوام کو مزید سہولت فراہم کی جا سکے۔
حکومتی اعلامیے کے مطابق یہ اقدام بڑھتی ہوئی مہنگائی اور پٹرول کی قیمتوں میں اضافے کے باعث عوام پر پڑنے والے مالی بوجھ کو کم کرنے کے لیے اٹھایا گیا ہے، جس سے صوبے بھر میں لاکھوں شہری براہِ راست مستفید ہوں گے۔
اس اسکیم کے تحت رجسٹرڈ موٹر سائیکل اور سکوٹر مالکان کو ماہانہ 2000 روپے کی سبسڈی فراہم کی جائے گی، جبکہ رقم براہِ راست جاز کیش کے ذریعے صارفین کو منتقل کی جائے گی۔ حکام کے مطابق صرف وہی افراد اس سہولت کے اہل ہوں گے جن کی موٹر سائیکل یا سکوٹر ان کے اپنے نام پر رجسٹرڈ اور تصدیق شدہ ہوگا۔
رجسٹریشن کے لیے شہریوں کو دستک ایپ کے ذریعے درخواست دینا ہوگی۔ اس مقصد کے لیے صارفین کو ایپ گوگل پلے اسٹور یا ایپ اسٹور سے ڈاؤن لوڈ کر کے اکاؤنٹ بنانا ہوگا، جس کے بعد موٹر سائیکل یا سکوٹر کا رجسٹریشن نمبر اور چیسس نمبر درج کر کے شناختی کارڈ، بائیک کارڈ اور گاڑی کی تصاویر اپ لوڈ کرنا ہوں گی۔ درخواست جمع کرانے کے بعد قریبی مرکز پر بائیو میٹرک تصدیق مکمل کی جائے گی، جس کے بعد منظوری کی صورت میں ماہانہ سبسڈی فراہم کی جائے گی۔
حکومت کے مطابق یہ اسکیم عوامی ریلیف، سفری سہولت اور معاشی دباؤ میں کمی کے لیے ایک اہم قدم ہے۔ شہری مزید معلومات اور رجسٹریشن کے لیے دستک ایپ کے ذریعے درخواست جمع کرا سکتے ہیں۔
امریکا اور ایران فوری جنگ بندی پر متفق، اسلام آباد میں مذاکرات کی دعوت
اسلام آباد: وزیرِ اعظم پاکستان شہباز شریف نے اعلان کیا ہے کہ ایران اور امریکا نے اپنے اتحادیوں کے ساتھ مل کر فوری جنگ بندی پر اتفاق کر لیا ہے، جس کا اطلاق لبنان سمیت دیگر علاقوں میں بھی فوری طور پر ہوگا۔
وزیرِ اعظم نے اس پیش رفت کو خوش آئند قرار دیتے ہوئے دونوں ممالک کی قیادت کا شکریہ ادا کیا اور ان کے وفود کو 10 اپریل 2026 کو اسلام آباد آنے کی دعوت دی ہے، جہاں تمام تنازعات کے حتمی حل کے لیے مزید مذاکرات کیے جائیں گے۔
وزیرِ اعظم شہباز شریف نے سماجی رابطے کی ویب سائٹ ایکس پر اپنے پیغام میں کہا کہ انتہائی عاجزی کے ساتھ وہ یہ اعلان کرتے ہوئے خوشی محسوس کر رہے ہیں کہ ایران اور امریکا اپنے اتحادیوں کے ساتھ ہر جگہ فوری جنگ بندی پر متفق ہو گئے ہیں۔
انہوں نے اس فیصلے کو دانشمندانہ قرار دیتے ہوئے کہا کہ دونوں فریقین نے غیر معمولی بصیرت اور سمجھ بوجھ کا مظاہرہ کیا ہے اور امن و استحکام کے فروغ کے لیے مثبت اور تعمیری کردار ادا کیا ہے۔
وزیرِ اعظم کا کہنا تھا کہ پاکستان نے جنگ بندی کے بعد امریکا اور ایران کی مذاکراتی ٹیموں کو جمعہ، 10 اپریل کو اسلام آباد آنے کی دعوت دی ہے تاکہ بات چیت کے ذریعے تمام اختلافات کے پائیدار حل کی راہ ہموار کی جا سکے۔
انہوں نے امید ظاہر کی کہ مجوزہ “اسلام آباد مذاکرات” خطے میں دیرپا امن کے قیام میں اہم کردار ادا کریں گے اور آنے والے دنوں میں مزید مثبت پیش رفت سامنے آئے گی۔
اقوام متحدہ میں پاکستان کے مستقل مندوب عاصم افتخار احمد کا آبنائے ہرمز سے متعلق قرارداد پر وضاحتی بیان
نیویارک: اقوام متحدہ میں پاکستان کے مستقل مندوب سفیر عاصم افتخار احمد نے سلامتی کونسل میں آبنائے ہرمز سے متعلق قرارداد کے مسودے پر ووٹنگ کے بعد اپنے وضاحتی بیان میں کہا ہے کہ پاکستان خطے میں کشیدگی کے خاتمے اور پائیدار سفارتی حل کے لیے مکالمے اور سفارت کاری کو ناگزیر سمجھتا ہے۔
سلامتی کونسل میں خطاب کرتے ہوئے انہوں نے کہا کہ پاکستان اس مشکل وقت میں بحرین، سعودی عرب، قطر، کویت، متحدہ عرب امارات، عمان اور اردن سمیت خلیجی ممالک کے ساتھ مکمل یکجہتی کا اظہار کرتا ہے، جو مشرق وسطیٰ میں جاری تنازعے کے براہ راست فریق نہ ہونے کے باوجود اس کے اثرات برداشت کر رہے ہیں۔ انہوں نے کہا کہ پاکستان خطے کے تمام برادر ممالک کی خودمختاری، علاقائی سالمیت اور سلامتی کی حمایت جاری رکھے گا۔
سفیر عاصم افتخار احمد نے کہا کہ آبنائے ہرمز عالمی تجارت اور توانائی کی ترسیل کے لیے نہایت اہم بحری گزرگاہ ہے، لہٰذا پاکستان جہازوں اور عملے کی سلامتی کو یقینی بنانے اور شہری بحری جہازوں کی محفوظ اور بلا تعطل آمدورفت کی بحالی کا مطالبہ کرتا ہے۔
انہوں نے خبردار کیا کہ آبنائے ہرمز کی موجودہ صورتحال کے اثرات صرف مشرق وسطیٰ تک محدود نہیں بلکہ عالمی معیشت اور بالخصوص ترقی پذیر ممالک کو متاثر کر رہے ہیں۔ ان کے مطابق جنوبی ایشیا، جہاں دنیا کی تقریباً ایک چوتھائی آبادی رہتی ہے، اس صورتحال سے شدید متاثر ہو رہا ہے جبکہ توانائی کی فراہمی میں رکاوٹیں جدید تاریخ کے بڑے جھٹکوں میں سے ایک بن سکتی ہیں۔ اس کے ساتھ ساتھ کھاد اور دیگر ضروری اشیاء کی فراہمی متاثر ہونے سے خوراک کے تحفظ، مہنگائی اور کمزور طبقات کی معاشی مشکلات میں اضافہ ہو رہا ہے۔
پاکستانی مندوب نے کہا کہ بحرین کی جانب سے قرارداد کے مسودے کی تیاری اور وسیع مشاورت قابل تحسین ہے اور پاکستان اس امر سے متفق ہے کہ آبنائے ہرمز کو جلد از جلد کھولنا اور حالات کو معمول پر لانا انتہائی ضروری ہے۔ انہوں نے یاد دلایا کہ پاکستان گزشتہ ماہ خلیجی تعاون کونسل (جی سی سی) کی حمایت سے بحرین کی جانب سے پیش کردہ قرارداد 2817 کی بھی حمایت کر چکا ہے۔
تاہم انہوں نے زور دیا کہ موجودہ بحران کے حل کے لیے جاری سفارتی کوششوں کو وقت اور موقع فراہم کرنا ضروری ہے۔ ان کا کہنا تھا کہ اقوام متحدہ کے سیکرٹری جنرل اور سلامتی کونسل کے ارکان کی جانب سے سفارتی اقدامات کی حوصلہ افزائی کی جا رہی ہے۔
سفیر عاصم افتخار نے بتایا کہ پاکستان خطے میں کشیدگی کم کرنے کے لیے فعال سفارتی کردار ادا کر رہا ہے۔ گزشتہ ہفتے نائب وزیراعظم و وزیر خارجہ سینیٹر اسحاق ڈار نے اسلام آباد میں مصر، سعودی عرب اور ترکی کے وزرائے خارجہ کی میزبانی کی تاکہ بحران کے پرامن حل کے لیے سفارتی روابط کو فروغ دیا جا سکے۔
انہوں نے مزید کہا کہ چین کے وزیر خارجہ وانگ یی کے ساتھ بیجنگ میں ملاقات کے بعد پاکستان اور چین نے پانچ نکاتی مشترکہ پہل کا اعلان کیا ہے، جس میں فوری جنگ بندی، جامع امن مذاکرات کا آغاز، شہریوں اور اہم تنصیبات کا تحفظ، آبنائے ہرمز میں بحری سلامتی کی بحالی اور اقوام متحدہ کے چارٹر اور بین الاقوامی قانون کی بنیاد پر پائیدار سیاسی حل کی حمایت شامل ہے۔
اپنے بیان کے اختتام پر انہوں نے کہا کہ پاکستان کا مقصد واضح ہے کہ دشمنی کا مستقل خاتمہ ہو، تنازع مزید نہ پھیلے اور شہریوں کی جان و مال کے نقصان سے بچا جا سکے۔ انہوں نے کہا کہ پاکستان خطے اور عالمی شراکت داروں کے ساتھ مل کر پائیدار امن کے قیام کے لیے تعمیری کردار ادا کرتا رہے گا۔
باجوڑ میں پوست کی کاشت کے خاتمے کیلئے کریک ڈاؤن جاری
باجوڑ: ضلع باجوڑ میں افیون/کوکنار کی کاشت کے خاتمے کیلئے ضلعی پولیس اور ضلعی انتظامیہ کی جانب سے کریک ڈاؤن بدستور جاری ہے، جس کے دوران مزید 8 کنال اراضی پر کاشت کی گئی پوست/کوکنار کی فصل کو تلف کر دیا گیا۔
ضلعی پولیس کے مطابق ضلع بھر میں پوست کی کاشت کے مکمل خاتمے کیلئے کارروائیاں جاری ہیں۔ اس سلسلے میں ڈسٹرکٹ پولیس آفیسر باجوڑ محمد خالد کی قیادت اور براہِ راست نگرانی میں پولیس اور ضلعی انتظامیہ مشترکہ طور پر مختلف علاقوں میں آپریشن کر رہی ہے۔
آج ہونے والی کارروائی کے دوران ایس ایچ او تھانہ برنگ احسان اللہ نے علاقہ برنگ میں کارروائی کرتے ہوئے مقامی مشران کی موجودگی میں پوست/کوکنار کی فصل کو رضاکارانہ طور پر تلف کر دیا۔
ڈی پی او باجوڑ محمد خالد نے واضح کیا ہے کہ پوست کی کاشت میں ملوث افراد کے خلاف سخت قانونی کارروائی عمل میں لائی جائے گی، جس میں گرفتاریاں اور منشیات ایکٹ کے تحت مقدمات کا اندراج بھی شامل ہوگا۔
حکام کے مطابق ضلع بھر میں موجود پوست کی فصل کے مکمل خاتمے تک یہ کارروائیاں بلا تعطل جاری رکھی جائیں گی۔
پی ایس ایل 11: پشاور زلمی نے حیدر آبادکنگز مین کو دلچسپ مقابلےکے بعد 4 وکٹوں سے ہرادیا
کراچی میں کھیلےگئے میچ میں پشاور زلمی نے ٹاس جیت کر پہلے فیلڈنگ کا فیصلہ کیا۔ حیدرآباد کنگزمین کی ٹیم پشاور زلمی کے خلاف 145 رن بنا کر آؤٹ ہوگئی۔ حیدرآباد کنگزمین کی جانب سےکوشل پریرا 58 اور مارنس لبوشین 27 رن بناکر نمایاں رہے۔ پشاور زلمی کی جانب سے سفیان مقیم اور افتخار احمد نے چار چار کھلاڑیوں کو آؤٹ کیا۔ پشاور زلمی نے 146 رنز کا ہدف 6 وکٹوں کے نقصان پر آخری گیند پر حاصل کرلیا۔
پشاور زلمی کی جانب سے بابر اعظم 46،کوشل مینڈس 27 اور بریسول 25 رنز بناکر نمایاں رہے۔ حیدرآباد کنگزمین کے صائم ایوب نے 19 رنز دیکر دو کھلاڑیوں کو آؤٹ کیا۔ میچ سے قبل پاکستان سپر لیگ کے سی ای او سلمان نصیر نے ٹاس کے موقع پر علامتی طور پر امن کی فاختہ اڑائی۔ اس موقع پر بابر اعظم، مارنش لبوشین اور میچ ریفری روشن ماہنامہ بھی موجود تھے۔ ایران امریکا جنگ بندی میں پاکستان حکومت کےکردار کو خراج تحسین پیش کیا گیا۔