BCLS training continues at Ayub Teaching Hospital

ایوب ٹیچنگ ہسپتال میں BCLS ٹریننگ کا سلسلہ جاری

ایوب ٹیچنگ ہسپتال میں نرسنگ اسٹاف کی پیشہ ورانہ صلاحیتوں میں اضافے کے لیے BCLS ٹریننگ کا سلسلہ جاری ہو گیا۔ ہمارا مشن ہے کہ ایوب ٹیچنگ ہسپتال کا ہر نرسنگ پروفیشنل جدید طبی علوم، بین الاقوامی معیارات اور بہترین کلینیکل پریکٹسز سے مکمل طور پر آگاہ ہو تاکہ مریضوں کو محفوظ، معیاری اور مؤثر طبی نگہداشت فراہم کی جا سکے۔
۔نرسنگ ڈائریکٹر مہتاب سکندر کا کہنا تھا انشاءاللہ مستقبل میں پاکستان کے نامور طبی اور تعلیمی اداروں کے تعاون سے مزید تربیتی پروگرام منعقد کیے جائیں گے تاکہ نرسنگ اسٹاف کی پیشہ ورانہ مہارتوں کو مزید بہتر بنایا جا سکے اور مریضوں کو اعلیٰ معیار کی طبی سہولیات اور بہترین نگہداشت فراہم کرنے کے ہدف کو یقینی بنایا جا سکے۔ تفصیلات کے مطابق ایوب ٹیچنگ ہسپتال میں مریضوں کو عالمی معیار کی طبی سہولیات فراہم کرنے کے عزم کے تحت نرسنگ ڈویژن اور ٹریننگ اینڈ ڈویلپمنٹ سیکشن ہیومن ریسورس ڈیپارٹمنٹ کے اشتراک سے بیسک کارڈیو ویسکیولر لائف سپورٹ (BCLS) ٹریننگ پروگرام کا انعقاد کیا گیا۔
اس تربیتی پروگرام میں اسٹاف نرسز اور نرسنگ انٹرنز کو امریکن ہارٹ ایسوسی ایشن (AHA) کے منظور شدہ اصولوں کے مطابق بیسک لائف سپورٹ اور ہنگامی طبی صورتحال سے نمٹنے کے جدید طریقہ کار کی عملی اور نظریاتی تربیت دی جا رہی ہے۔ یہ تربیت مریضوں کی جان بچانے بروقت طبی امداد فراہم کرنے اور ایمرجنسی صورتحال میں مؤثر ردعمل کو یقینی بنانے کے لیے انتہائی اہمیت کی حامل ہے۔
ایوب ٹیچنگ ہسپتال کی نرسنگ ڈائریکٹر مہتاب سکندر کی خصوصی دلچسپی اور وژن کے تحت نرسنگ اسٹاف کی مسلسل پیشہ ورانہ ترقی پر خصوصی توجہ دی جا رہی ہے۔ ان کا مشن ہے کہ ایوب ٹیچنگ ہسپتال کا ہر نرسنگ پروفیشنل جدید طبی علوم، بین الاقوامی معیارات اور بہترین کلینیکل پریکٹسز سے مکمل طور پر آگاہ ہو تاکہ مریضوں کو محفوظ معیاری اور مؤثر طبی نگہداشت فراہم کی جا سکے۔ اس موقع پر بتایا گیا کہ نرسنگ اسٹاف کی استعداد کار میں اضافہ ہسپتال کی اولین ترجیحات میں شامل ہے اور اسی مقصد کے تحت مختلف شعبوں میں جدید ٹریننگز ورکشاپس اور سکل ڈویلپمنٹ پروگرامز کا باقاعدگی سے انعقاد کیا جا رہا ہے۔

pakistan-railways-introduces-second-upgraded-rack-of-awam-express

پاکستان ریلوے نے عوام ایکسپریس کا دوسرا اپ گریڈڈ ریک متعارف کرادیا

پاکستان ریلوے نے پشاور اور کراچی کے درمیان چلنے والی عوام ایکسپریس کا دوسرا اپ گریڈڈ ریک متعارف کرا دیا ہے، جس کا مقصد مسافروں کو جدید اور معیاری سفری سہولیات فراہم کرنا ہے۔ نئی اپ گریڈڈ ٹرین سروس کا باقاعدہ افتتاح ڈویژنل سپرنٹنڈنٹ (ڈی ایس) پشاور عمران حیات نے دیگر ریلوے حکام کے ہمراہ اتوار کے روز کیا۔عید سے قبل بڑی خوشخبری اپ گریڈڈ عوام ایکسپریس شروع کرنے کا اعلان

پاکستان ریلوے کے مطابق نئے ریک میں جدید سہولیات، بہتر نشستوں کا انتظام اور مسافروں کے لیے زیادہ آرام دہ ماحول فراہم کیا گیا ہے، جس سے ملک کے دو بڑے شہروں، پشاور اور کراچی، کے درمیان سفر مزید خوشگوار اور سہل ہو جائے گا۔ ریلوے حکام کا کہنا ہے کہ عوام کو بہتر سفری تجربہ فراہم کرنے کے لیے ٹرینوں کی مرحلہ وار اپ گریڈیشن کا عمل جاری ہے اور اہم ریلوے روٹس پر سہولیات کو جدید تقاضوں سے ہم آہنگ کیا جا رہا ہے۔ دوسری جانب مسافروں نے پاکستان ریلوے کے اس اقدام کا خیرمقدم کرتے ہوئے اسے سفری معیار میں بہتری کی جانب ایک مثبت پیش رفت قرار دیا۔ ان کا کہنا تھا کہ جدید سہولیات سے آراستہ کوچز نہ صرف سفر کو زیادہ آرام دہ بنائیں گی بلکہ عوام کے ریلوے پر اعتماد میں بھی اضافہ ہوگا۔

National Junior Championship begins in Peshawar with colorful ceremony

نیشنل جونیئر چیمپئن شپ کا پشاور میں رنگا رنگ تقریب میں آغاز

پشاور ڈائریکٹریٹ آف سپورٹس خیبرپختونخوا کے زیراہتمام نیشنل جونیئر چیمپئن شپ کا پشاور سپورٹس کمپلیکس میں ایک شاندار اور رنگا رنگ افتتاحی تقریب کے ساتھ آغاز ہوگیا چیمپئن شپ میں ملک بھر سے ایک ہزار سے زائد کھلاڑی بیڈمنٹن، سکواش، ایتھلیٹکس، والی بال، ٹیبل ٹینس اور کراٹے کے مقابلوں میں حصہ لے رہے ہیں۔افتتاحی تقریب کے مہمانان خصوصی صوبائی وزیر اطلاعات شفیع اللہ جان اور مشیر برائے کھیل و امور نوجوانان تاج محمد ترند تھے اس موقع پر معاون خصوصی ہمایون خان، ممبر صوبائی اسمبلی میاں شرافت، سیکرٹری سپورٹس آصف خان، ڈائریکٹر جنرل سپورٹس تاشفین حیدر اور دیگر شخصیات بھی موجود تھیں۔تقریب میں چاروں صوبوں ،اسلام آباد اور مختلف ڈیپارٹمنٹس کےدستوں نے شاندار مارچ پاسٹ پیش کیا جبکہ آتش بازی کے دلکش مظاہرے کو شرکائ نے انجوئے کیا،تقریب سے خطاب کرتے ہوئے صوبائی وزیر اطلاعات شفیع اللہ جان نے ملک بھر سے آنے والے کھلاڑیوں اور آفیشلز کو خوش آمدید کہا اور امید ظاہر کی کہ چیمپئن شپ میں اعلیٰ معیار کے مقابلے دیکھنے کو ملیں گے انہوں نے کہا کہ کھیل نوجوانوں کو سپورٹس مین شپ، نظم و ضبط اور برداشت کا درس دیتے ہیں، کھیل میں ہار جیت معمول کی بات ہے اصل کامیابی اپنی غلطیوں سے سیکھ کر آگے بڑھنے میں ہے۔انہوں نے کہا کہ صوبائی حکومت مرد و خواتین کھلاڑیوں کو مساوی مواقع فراہم کرنے کے لیے عملی اقدامات کر رہی ہے اور کھیلوں کے فروغ کے لیے متعدد منصوبوں پر کام جاری ہے۔ بعد ازاں انہوں نے نیشنل جونیئر چیمپئن شپ کے باقاعدہ آغاز کا اعلان کیا۔مشیر برائے کھیل و امور نوجوانان تاج محمد ترند نے اپنے خطاب میں کہا کہ اس نوعیت کے قومی ایونٹس مختلف علاقوں کے نوجوانوں کو ایک دوسرے کے قریب لاتے ہیں اور قومی یکجہتی کو فروغ دیتے ہیں انہوں نے کہا کہ حکومت آئندہ بھی ایسے مقابلوں کا انعقاد جاری رکھے گی تاکہ نوجوان کھلاڑیوں کو اپنی صلاحیتوں کے اظہار کے مزید مواقع میسر آسکیں۔انہوں نے کہا کہ وزیراعلیٰ خیبرپختونخوا سہیل آفریدی، بانی پی ٹی آئی عمران خان کے وڑن کے مطابق کھیلوں کے فروغ پر خصوصی توجہ دے رہے ہیں جس کے نتیجے میں صوبے بھر میں کھیلوں کی سرگرمیوں کا سلسلہ جاری ہے۔تاج محمد ترند نے کہا کہ حالیہ عرصے میں انڈر 21 خیبرپختونخوا گیمز کا کامیاب انعقاد کیا گیا جس میں آٹھ ہزار سے زائد کھلاڑیوں نے شرکت کی، اس کے علاوہ یتیم اور بے سہارا بچوں، خصوصی افراد، اقلیتوں، خواجہ سراو¿ں، مدارس کے طلبہ اور رمضان المبارک کے دوران مختلف کھیلوں کے مقابلوں کا انعقاد بھی کیا گیا جبکہ چترال میں آئس ہاکی ایونٹ کا بھی کامیاب انعقاد کیا گیا۔انہوں نے کھلاڑیوں اور آفیشلز کو یقین دلایا کہ وہ صوبے کے مہمان ہیں اور انہیں کسی بھی قسم کی دشواری پیش آئے تو ان کے دفتر کے دروازے ہر وقت کھلے ہیں۔ انہوں نے کھلاڑیوں پر زور دیا کہ وہ مقابلوں میں بھرپور جوش و جذبے، محنت اور کھیل کے بہترین اصولوں کے ساتھ حصہ لیں اور اس ایونٹ کو یادگار بنائیں۔