Daily Archives: August 6, 2026

بونیر: ضلع بونیر میں ورلڈ بریسٹ فیڈنگ منتھ کی تقریبات کا باقاعدہ آغاز کر دیا گیا۔ محکمہ صحت نے یونیسیف کے تعاون سے آگاہی واک اور سیمینار کا انعقاد کیا، جس کا مقصد ماں کے دودھ کی اہمیت، نومولود بچوں کی بہتر غذائیت اور صحت مند مستقبل کے حوالے سے عوام میں شعور بیدار کرنا تھا۔

افتتاحی تقریب میں ڈاکٹر حرا احسن، ڈاکٹر نثار خان، محکمہ صحت کے افسران، علما، صحافی، ریسکیو 1122 کے اہلکاروں، سماجی شخصیات اور شہریوں نے شرکت کی۔ تقریب سے قبل شرکا نے آگاہی واک میں حصہ لیا اور ماں کے دودھ کی افادیت سے متعلق بینرز اور پلے کارڈز اٹھا رکھے تھے۔

بعد ازاں منعقدہ سیمینار سے خطاب کرتے ہوئے مقررین نے کہا کہ ماں کا دودھ نومولود بچوں کے لیے بہترین، محفوظ اور مکمل غذا ہے، جو انہیں مختلف بیماریوں سے تحفظ فراہم کرنے کے ساتھ ساتھ جسمانی اور ذہنی نشوونما میں بھی اہم کردار ادا کرتا ہے۔ انہوں نے ماؤں پر زور دیا کہ پیدائش کے فوراً بعد بچوں کو دودھ پلایا جائے اور ابتدائی چھ ماہ تک صرف ماں کا دودھ ہی دیا جائے۔

اسسٹنٹ کمشنر ڈاکٹر حرا احسن نے کہا کہ صحت مند معاشرے کی بنیاد صحت مند بچے ہیں، جبکہ ڈسٹرکٹ ہیلتھ آفیسر ڈاکٹر نثار خان نے بتایا کہ ورلڈ بریسٹ فیڈنگ منتھ کے دوران ضلع بھر میں آگاہی مہم جاری رکھی جائے گی تاکہ اس اہم پیغام کو زیادہ سے زیادہ لوگوں تک پہنچایا جا سکے۔

ماہرین صحت کے مطابق ماں کے دودھ کے فروغ سے نہ صرف بچوں کی صحت بہتر بنائی جا سکتی ہے بلکہ مستقبل میں مختلف بیماریوں کے خطرات میں بھی نمایاں کمی لائی جا سکتی ہے۔