سوات کے سیاحتی مقام کالام میں ائزور لاگون ریزارٹ کے زیرِ اہتمام اپر سوات ڈویلپمنٹ اتھارٹی، محکمہ سیاحت خیبر پختونخوا اور گرین ٹورازم کے تعاون سے منعقد پانچ روزہ سنو فیسٹیول اپنے فائنل مقابلوں کے ساتھ کامیابی سے اختتام پذیر ہو گیا۔ فائنل مقابلوں میں ائزور وِسپر مٹلتان اور ائزور لیک مٹلتان کی ٹیمیں آمنے سامنے آئیں جہاں رسی کشی اور سنو کبڈی کے انتہائی سنسنی خیز مقابلے لائیو سنو فال کے دوران کھیلے گئے۔ سخت اور کانٹے دار مقابلوں کے بعد ائزورلیک مٹلتان نے شاندار کارکردگی کا مظاہرہ کرتے ہوئے فتح اپنے نام کی۔ جیت کے بعد کھلاڑیوں نے لائیو برفباری میں روایتی بنگڑے ڈال کر خوشی کا بھرپور اظہار کیا جس سے فیسٹیول کا ماحول مزید دیدنی بن گیا۔
سنو مین مقابلوں میں اسلام آباد سے تعلق رکھنے والی زنیرہ نے پہلی پوزیشن حاصل کی جبکہ مینا، حمدا اور آمایا نے دوسری اور خیزر عمر اور ازلان نے تیسری پوزیشن حاصل کی۔ اختتامی تقریب کے مہمانِ خصوصی سیکرٹری ٹورازم خیبر پختونخوا سعادت حسین تھے جنہوں نے کامیاب کھلاڑیوں میں ٹرافیاں، شیلڈز اور نقد انعامات تقسیم کیے۔ اس موقع پر ڈائریکٹر جنرل اپر سوات ڈویلپمنٹ اتھارٹی شوزب عباس، ڈپٹی ڈائریکٹر احمد شیر خان اور ائزور لاگون کے چیف ایگزیکٹو آفیسر حمید خان بھی موجود تھے۔
سیکرٹری ٹورازم خیبر پختونخوا نے کہا کہ وزیرِاعلیٰ خیبر پختونخوا اور چیف سیکرٹری خیبر پختونخوا کے ویژن کے مطابق صوبائی حکومت سیاحت کے فروغ، خصوصاً ونٹر ٹورازم کے لیے مؤثر اور دیرپا اقدامات کر رہی ہے۔ انہوں نے کہا کہ اس نوعیت کے فیسٹیول نہ صرف سوات کی قدرتی خوبصورتی کو اجاگر کرتے ہیں بلکہ مقامی معیشت کو فروغ دینے نوجوانوں کو مثبت سرگرمیوں کی جانب راغب کرنے اور ملکی و غیرملکی سیاحوں کو سردیوں کے موسم میں سوات کی جانب متوجہ کرنے میں بھی اہم کردار ادا کرتے ہیں۔ انہوں نے مزید کہا کہ اپر سوات ڈویلپمنٹ اتھارٹی کا قیام اسی وژن کا عملی مظہر ہے، جس کا مقصد سوات کو سال بھر سیاحت کا ایک نمایاں اور پائیدار مرکز بنانا ہے۔