معاشرے میں امن و امان کے قیام کے موضوع پر ایگریکلچر یونیورسٹی اور گورنمنٹ ڈگری کالج ڈی آئی خان میں منگل کے روز دو مختلف سیمینارز کا انعقاد کیا گیا۔ ان سیمینارز میں طلباء سمیت مختلف مکاتب فکر سے تعلق رکھنے والے سینکڑوں افراد نے شرکت کی۔
دونوں تقاریب میں اسلامک ریسرچ انسٹی ٹیوٹ اسلام آباد کے ڈاکٹر منیر احمد، ہری پور یونیورسٹی کے پروفیسر ڈاکٹر عبدالمہیمن اور بنوں میڈیکل کالج کے ریٹائرڈ کرنل ناصر نے مہمانان خصوصی کے طور پر شرکت کی۔
سیمینارز سے خطاب میں مقررین نے بنیادی انسانی اقدار، نوجوانوں کا قیام امن میں کردار، قرآن و سنت کی روشنی میں تنازعات کے دوران اخلاقی معیار، اور اساتذہ کا ملک میں باہمی ہم آہنگی کے لئے کردار پر روشنی ڈالی۔
مقررین نے زور دیا کہ ذاتی پسند و ناپسند کو نفرت انگیز اور اشتغال انگیز تقاریر میں بدلنے سے گریز کیا جائے جبکہ ہم سب کو مل کر خیبر پختونخوا سمیت پورے ملک میں امن کی ترویج کے لئے کام کرنا چاہیئے۔
