مقامی آبادی کے ایک دیرینہ مطالبے کو پورا کرتے ہوئے، خیبر پختونخواہ حکومت نے قبائلی ضلع جنوبی وزیرستان کو باضابطہ طور پر دو الگ الگ انتظامی علاقوں میں تقسیم کر دیا ہے جو محسود اور احمد زئی وزیر قبائل کی علیحدہ آبادیاتی اداروں کی نمائندگی کرتے ہیں۔
ایک سرکاری نوٹیفکیشن میں کہا گیا ہے کہ جنوبی وزیرستان کو دو اضلاع میں تقسیم کر دیا گیا ہے۔ جنوبی وزیرستان اپر اور جنوبی وزیرستان لوئر۔یہ فیصلہ لینڈ ریونیو ایکٹ 1967 کے تحت لیا گیا ہے۔ نوٹیفکیشن کے مطابق جنوبی وزیرستان اپر دو سب ڈویژنز سرواکئی اور لدھا پر مشتمل ہوگا۔ لوئر جنوبی وزیر ستان وانا،شکئی،بیرمال اور ٹول خولا کی تحصیلوں پر مشتمل ہوگا۔وانا لوئرجنوبی وزیرستان کا سب ڈویژن ہوگا جبکہ اپر جنوبی وزیرستان کا ہیڈکوارٹر سپینکئی رغزئی ہوگا۔
جنوبی وزیرستان کی تقسیم کے ساتھ اب خیبرپختونخوا میں 36 اضلاع ہیں۔ صوبائی کابینہ نے تقریباً چار ماہ قبل جنوبی وزیرستان ضلع کی تقسیم کی منظوری دی تھی۔
