خیبر پختونخوا میں تین ہفتوں پر مشتمل صفائی مہم کا آغاز

وزیر اعلیٰ خیبر پختونخوا کی ہدایات پر ضلعی انتظامیہ نے تین ہفتوں پر مشتمل صفائی مہم کا آغاز کیا، جس کا مقصد شہریوں میں صفائی کی اہمیت اجاگر کرنا اور عوامی ایجنڈے کے تحت شہریوں کو بہترین میونسپل سروسز، کوڑا کرکٹ کے بروقت اٹھاؤ اور صاف ستھری آب و ہوا کی فراہمی کو یقینی بنانا ہے۔کاغان ڈویلپمنٹ اتھارٹی نے بھی اس مہم میں حصہ لیتے ہوئے ڈائریکٹر جنرل شبیر خان کی ہدایات پر کے ڈی اے ٹورسٹ فیسلیٹیشن سنٹر سے صفائی کا آغاز کیا، جو راجوال کاغان تک جاری رہے گی۔ اس مہم کے دوران وادی میں سڑک کنارے کوڑا کرکٹ کی صفائی کی جائے گی اور اسے مقررہ ڈمپنگ پوائنٹس پر منتقل کیا جائے گا۔ صفائی مہم سے نہ صرف علاقے کی آب و ہوا اور ماحول کو صاف رکھنے میں مدد ملے گی بلکہ وادی کے قدرتی حسن کے تحفظ کو بھی یقینی بنایا جا سکے گا