پشاور: 34 ویں نیشنل گیمز کی مشعل باچا خان انٹر نیشنل ایئر پورٹ پر پہنچ گئی جس کو ہاکی اولمپین رحیم خان،خیبرپختونخوا اولمپک ایسوسی ایشن کےعہدیداروں سمیت قومی کھلاڑیوں نے وصول کیا۔
مشعل کو بعد ازاں پشاور سپورٹس کمپلیکس لایا گیا جہاں وزیر اعلیٰ کے مشیر برائے کھیل ڈاکٹر ریاض انور نے مشعل وصول کی جہاں رنگارنگ تقریب کا انعقاد کیاگیا۔
وزیر اعلی ٰ کے مشیر برائے کھیل ڈاکٹر ریاض انور نے کہا کہ کھیل ترجیحات میں سرفہرست ہیں، اور نیشنل گیمز کیلئے مطلوبہ فنڈ کی منظور ی دی جاچکی ہے، انہوں نے اعلان کیا کہ گیمز کے میڈلز ونرز کو نقدانعامات سے نوازا جائیگا۔
صوبائی اولمپک ایسوسی ایشن کے صدر سید عاقل شاہ نے کہا کہ ہمارا دستہ ان گیمز میں بھرپور شرکت کررہا ہے اور کھلاڑی میڈلز جیت واپس آئیں گے ان کو تمام بہترین سہولتیں فراہم کی جارہی ہیں، مشعل آج‘ آٹھ مئی کو پی اے ایف ہیڈ کوارٹر پشاور میں لائی جائے گی جہاں سے دوبارہ پشاور سپورٹس کمپلیکس جائے گی اور وہاں سے تانگوں کے ذریعے مشعل کو پورے پشاور شہر میں مختلف بازاروں میں لے جایا جائے گا جس کا مقصد عوام کو قائداعظم محمد علی جناح کی جانب سے شروع کی جانیوالی گیمز کے بارے میں آگاہی پیدا کرنا ہے پشاور کے مختلف مقامات سے ہوتی ہوئی یہ مشعل گورنر ہاؤس اورآخر میں پشاور سپورٹس کمپلیکس آئے گی نو مئی کو مشعل خیرآباد پل پر پنجاب اولمپک ایسوسی ایشن کے حوالے کی جائے گی‘خیبرپختونخوا کا پہلا دستہ گیمز میں شرکت کیلئے گیارہ مئی کوئٹہ روانہ ہوگا جبکہ دوسرا دستہ بیس مئی کو کوئٹہ جائیگا۔
