سٹی ٹریفک پولیس پشاور نے من پسند کرایوں کے خلاف کارروائی کرتے ہوئے 102 ٹرانسپورٹرز کو چالان کر دیا۔ یہ کارروائی چیف ٹریفک آفیسر ہارون رشید خان کی ہدایت پر شہر کے مختلف سیکٹروں میں ناکہ بندیوں کے دوران کی گئی، جہاں گاڑیوں میں سفر کرنے والے مسافروں سے کرایہ جات سے متعلق معلومات حاصل کی گئیں۔
ترجمان کے مطابق، زائد کرایہ وصول کرنے والے ٹرانسپورٹرز کے خلاف بلا امتیاز کارروائی کی جا رہی ہے۔ چیف ٹریفک آفیسر ہارون رشید خان نے کہا کہ حکومت اور ریجنل ٹرانسپورٹ اتھارٹی (RTA) کی جانب سے مقرر کردہ کرایہ نامہ پر عملدرآمد نہ کرنے والوں کو کسی صورت رعایت نہیں دی جائے گی۔
انہوں نے مزید کہا کہ زائد کرایہ لینا نہ صرف غیر قانونی بلکہ عوام کے ساتھ سراسر زیادتی ہے۔ آر ٹی اے کا مقرر کردہ کرایہ نامہ مسافروں اور ٹرانسپورٹرز دونوں کے مفاد میں ہے، اور اس پر سختی سے عملدرآمد یقینی بنایا جائے گا۔
چیف ٹریفک آفیسر نے خبردار کیا کہ اگر ٹرانسپورٹرز نے اپنا رویہ درست نہ کیا تو ان کے خلاف مزید سخت قانونی کارروائی کی جائے گی۔ انہوں نے عوام سے بھی اپیل کی کہ زائد کرایہ وصول کرنے کی صورت میں فوری طور پر ٹریفک پولیس کو اطلاع دیں تاکہ بروقت ایکشن لیا جا سکے۔
