خیبر پختونخوا میں مون سون صفائی مہم کا باقاعدہ آغاز صوبائی حکومت کی احکامات ٹی ایم اے ایبٹ آباد کی مون سون اسپیشل صفائی مہم بھرپور انداز میں جاری ہے۔ ٹی ایم اے ایبٹ آباد کا صفائی عملہ شہر کے مختلف مقامات پر نالوں، برساتی گزرگاہوں، سیوریج لائنوں اور دیگر عوامی مقامات کی صفائی میں مصروف ہے، جبکہ بھاری مشینری کے ذریعے ملبہ اور کچرا فوری طور پر ہٹایا جا رہا ہے تاکہ بارشوں کے دوران نکاسیٔ آب کا مؤثر نظام برقرار رہے اور شہریوں کو ہر ممکن سہولت فراہم کی جا سکے۔
سوات: خیبر پختونخوا فل کنٹیکٹ کراٹے ایسوسی ایشن کے زیرِ اہتمام، ریجنل سپورٹس آفس سوات اور کراؤن مائیکرو سولر سسٹم کے تعاون سے آل پاکستان فل کنٹیکٹ کراٹے چیمپئن شپ اور ٹریننگ کیمپ کا انعقاد 24 سے 26 جولائی تک سوات اور کالام میں کیا جائے گا۔
منتظمین کے مطابق چیمپئن شپ کے فائنل مقابلے 24 جولائی کو منگورہ میں ہوں گے، جبکہ 25 اور 26 جولائی کو کالام اور مہوڈنڈ جھیل میں آل پاکستان فل کنٹیکٹ کراٹے ٹریننگ کیمپ منعقد کیا جائے گا۔
میڈیا سے گفتگو کرتے ہوئے شیہان صاحبزادہ الہادی، جو ورلڈ کراٹے آرگنائزیشن (جاپان) کے نمائندے اور انٹرنیشنل ریفری ہیں، نے بتایا کہ قومی سطح کے اس ایونٹ میں سندھ، بلوچستان، پنجاب، اسلام آباد اور خیبر پختونخوا سے مختلف فل کنٹیکٹ کراٹے تنظیموں کے صدور، عہدیدار، کوچز اور کھلاڑی شرکت کریں گے۔
انہوں نے کہا کہ ایونٹ کے تمام انتظامات مکمل کر لیے گئے ہیں اور شائقین کو سنسنی خیز اور اعلیٰ معیار کے مقابلے دیکھنے کو ملیں گے۔ ان کا کہنا تھا کہ شریک کھلاڑی اور کوچز سوات، کالام اور مہوڈنڈ کی قدرتی خوبصورتی اور خوشگوار ماحول سے بھی لطف اندوز ہوں گے۔
منتظمین کے مطابق یہ چیمپئن شپ ملک بھر کے باصلاحیت کھلاڑیوں کو اپنی صلاحیتوں کے اظہار کا بہترین موقع فراہم کرے گی، جبکہ نوجوانوں میں کھیلوں کے فروغ، مثبت سرگرمیوں کے رجحان اور صحت مند معاشرتی ماحول کے قیام میں بھی اہم کردار ادا کرے گی۔
پشاور: چھٹی پشاور اوپن جونیئر تائیکوانڈو چیمپئن شپ کا انعقاد اسپورٹس ولیج، ڈی ایچ اے روڈ پر کیا گیا، جس میں پشاور، بنوں اور کوہاٹ ریجن سمیت مختلف اضلاع اور کلبوں سے تعلق رکھنے والے سینکڑوں مرد و خواتین کھلاڑیوں نے شرکت کی۔
چیمپئن شپ کے دوران مختلف ویٹ کیٹیگریز میں مقابلے ہوئے، جن میں کھلاڑیوں نے اعلیٰ درجے کی مہارت کا مظاہرہ کرتے ہوئے شائقین سے بھرپور داد وصول کی۔
مقابلوں کے مجموعی نتائج کے مطابق پشاور ریجن نے پہلی پوزیشن حاصل کر کے چیمپئن ہونے کا اعزاز اپنے نام کیا، جبکہ بنوں ریجن دوسرے اور آئی ٹی ایف حیات آباد کلب پشاور تیسرے نمبر پر رہا۔
اختتامی تقریب کے مہمانِ خصوصی الیاس آفریدی تھے، جنہوں نے کامیاب کھلاڑیوں میں میڈلز اور نمایاں کارکردگی دکھانے والی ٹیموں میں ٹرافیاں تقسیم کیں۔
اس موقع پر الیاس آفریدی نے کہا کہ اس نوعیت کے مقابلوں سے نوجوان کھلاڑیوں کو اپنی صلاحیتوں کے اظہار کا بہترین موقع ملتا ہے اور خیبر پختونخوا میں تائیکوانڈو کے فروغ میں بھی اہم کردار ادا ہوتا ہے۔ انہوں نے منتظمین کی کاوشوں کو سراہتے ہوئے اس عزم کا اظہار کیا کہ مستقبل میں بھی ایسے ایونٹس کا انعقاد جاری رکھا جائے گا تاکہ نئے ٹیلنٹ کو قومی سطح پر آگے آنے کے مزید مواقع میسر آ سکیں۔
