Daily Archives: August 4, 2026

تعلیمی بورڈ پشاور نے میٹرک کے سالانہ امتحانات 2026 کے نتائج کا باقاعدہ اعلان کر دیا ہے۔ نتائج کے اعلان کے ساتھ ہی ہزاروں طلبہ، والدین اور اساتذہ کا انتظار ختم ہو گیا۔ ہر سال کی طرح اس مرتبہ بھی امتحانات میں بڑی تعداد میں طلبہ نے حصہ لیا، جبکہ کامیابی حاصل کرنے والے طلبہ نے اپنی محنت کا ثمر پایا۔ دوسری جانب کچھ طلبہ مطلوبہ کامیابی حاصل نہ کر سکے، تاہم ان کے لیے بھی مستقبل میں بہتر کارکردگی دکھانے کے مواقع موجود ہیں۔ بورڈ انتظامیہ کے مطابق رواں سال نویں جماعت کے سالانہ امتحانات میں 97 ہزار 950 طلبہ نے حصہ لیا۔ امتحانات کے انعقاد کے بعد جو نتائج سامنے آئے، ان کے مطابق 57 ہزار 847 طلبہ اگلی جماعت میں پروموٹ ہونے میں کامیاب رہے۔ یہ اعداد و شمار ظاہر کرتے ہیں کہ طلبہ کی ایک بڑی تعداد نے کامیابی حاصل کی، جبکہ دیگر طلبہ کو اپنی تعلیمی کارکردگی بہتر بنانے کی ضرورت ہے۔

اسی طرح دسویں جماعت کے سالانہ امتحانات میں 95 ہزار 496 طلبہ شریک ہوئے۔ نتائج کے مطابق 66 ہزار 988 طلبہ نے امتحانات کامیابی سے پاس کیے، جبکہ 27 ہزار 788 طلبہ مطلوبہ نمبرز حاصل نہ کر سکے اور فیل قرار پائے۔ ان نتائج سے اندازہ ہوتا ہے کہ اگرچہ کامیاب طلبہ کی تعداد قابلِ ذکر ہے، لیکن ناکام ہونے والے طلبہ کی تعداد بھی خاصی زیادہ ہے، جس پر تعلیمی ماہرین اور والدین کو توجہ دینے کی ضرورت ہے۔ تعلیمی ماہرین کے مطابق امتحانی نتائج صرف طلبہ کی محنت ہی نہیں بلکہ تدریسی معیار، والدین کی رہنمائی اور تعلیمی ماحول کی بھی عکاسی کرتے ہیں۔ بہتر نتائج کے لیے ضروری ہے کہ اسکولوں میں معیاری تعلیم فراہم کی جائے، اساتذہ جدید تدریسی طریقوں کو اپنائیں اور طلبہ کو ذہنی دباؤ سے نکال کر مثبت انداز میں تعلیم کی طرف راغب کیا جائے۔

بورڈ انتظامیہ نے کامیاب ہونے والے تمام طلبہ کو مبارکباد پیش کی ہے اور امید ظاہر کی ہے کہ وہ مستقبل میں بھی اپنی تعلیمی کامیابیوں کا سلسلہ جاری رکھیں گے۔ ساتھ ہی ناکام ہونے والے طلبہ کو مایوس نہ ہونے کا مشورہ دیا گیا ہے، کیونکہ ناکامی زندگی کا اختتام نہیں بلکہ کامیابی کی جانب ایک نیا سبق ہوتی ہے۔ مسلسل محنت، درست منصوبہ بندی اور اساتذہ کی رہنمائی سے آئندہ امتحانات میں بہتر نتائج حاصل کیے جا سکتے ہیں۔ نتائج کے اعلان کے بعد بورڈ کی ویب سائٹ اور دیگر آن لائن ذرائع پر طلبہ کی بڑی تعداد نے اپنے نتائج چیک کیے۔ مختلف تعلیمی اداروں میں بھی کامیاب طلبہ کی حوصلہ افزائی کے لیے تقریبات منعقد کی جا رہی ہیں تاکہ ان کی کامیابی کو سراہا جا سکے اور دوسرے طلبہ کو بھی محنت کی ترغیب ملے۔ مجموعی طور پر تعلیمی بورڈ پشاور کے میٹرک امتحانات کے نتائج یہ ظاہر کرتے ہیں کہ صوبے میں تعلیم کے شعبے میں مزید بہتری کی گنجائش موجود ہیں

نوشہرہ 4 اگست یومِ شہدائے پولیس کے موقع پر پاکستان ہیومن رائٹس آرگنائزیشن ضلع نوشہرہ کے صدر عابد سلطان نے رسالپور کے صحافیوں کوانٹرویو دیتے ہوئے اپنے خصوصی پیغام میں کہا ہے کہ خیبر پختونخوا پولیس شہداء اور غازیوں کا محکمہ ہے، جس کے افسران اور جوانوں نے امن و امان کے قیام، دہشت گردی کے خاتمے اور عوام کے جان و مال کے تحفظ کے لیے بے شمار لازوال قربانیاں دی ہیں۔انہوں نے کہا کہ یومِ شہدائے پولیس ہمیں ان عظیم سپوتوں کی یاد دلاتا ہے جنہوں نے وطن کی سلامتی اور عوام کے تحفظ کی خاطر اپنی جانوں کا نذرانہ پیش کیا۔ شہداء کی قربانیاں پوری قوم کا قیمتی سرمایہ ہیں، جنہیں کبھی فراموش نہیں کیا جا سکتا۔عابد سلطان نے مزید کہا کہ خیبرپختونخوا پولیس نے دہشت گردی کے خلاف جنگ میں مثالی بہادری، جرات اور پیشہ ورانہ صلاحیتوں کا مظاہرہ کیا ہے۔ آج امن کی بحالی میں شہداء اور غازیوں کی قربانیوں کا بنیادی کردار ہے، جس پر پوری قوم انہیں خراجِ تحسین پیش کرتی ہے۔انہوں نے حکومتِ خیبر پختونخوا اور پولیس حکام سے مطالبہ کیا کہ شہداء کے اہل خانہ کی ہر سطح پر بھرپور سرپرستی، فلاح و بہبود اور مسائل کے حل کو یقینی بنایا جائے تاکہ انہیں یہ احساس رہے کہ پوری قوم ان کے ساتھ کھڑی ہے۔آخر میں انہوں نے تمام شہدائے پولیس کے درجات کی بلندی، غازیوں کی سلامتی اور ملک میں دائمی امن و استحکام کے لیے دعا کی۔

ضلع خیبر میں یومِ شہداء پولیس کے سلسلے میں ایک پروقار واک کا انعقاد کیا گیا، جس میں پولیس افسران، قومی مشران اور شہداء کے ورثاء نے بڑی تعداد میں شرکت کی۔اس موقع پر شرکاء نے شہداء پولیس کی لازوال قربانیوں کو خراجِ عقیدت پیش کرتے ہوئے اس عزم کا اظہار کیا کہ شہداء کی قربانیوں کو ہمیشہ یاد رکھا جائے گا۔واک سے خطاب کرتے ہوئے ایس پی بادشاہ خان اور ایس ایچ او صدیق آفریدی نے کہا کہ یومِ شہداء منانے کا مقصد وطن کی خاطر جانوں کا نذرانہ پیش کرنے والے پولیس اہلکاروں کو خراجِ عقیدت پیش کرنا ہے۔ انہوں نے کہا کہ شہداء زندہ ہیں اور ان کی قربانیوں کو کبھی فراموش نہیں کیا جا سکتا۔ ایس پی جمرود نے اپنے خطاب میں کہا کہ آج ہم جس امن اور سکون کی زندگی گزار رہے ہیں، وہ انہی شہداء کی بے مثال اور لازوال قربانیوں کا ثمر ہے۔ انہوں نے کہا کہ پولیس شہداء کی خدمات اور قربانیوں کو ہمیشہ عزت و احترام کی نگاہ سے دیکھا جائے گا۔