pakistan-cricket-team-1-600x353

پریذیڈنٹ ٹرافی گریڈ ون شیڈول اور سکواڈز کا اعلان

پشاور: پاکستان کرکٹ بورڈ کی جانب سے پریذیڈنٹ ٹرافی گریڈ ون فرسٹ کلاس ٹورنامنٹ کے شیڈول اور ٹیموں کے سکواڈز کا اعلان کر دیا گیا ہے۔ ٹورنامنٹ میں آٹھ ڈیپارٹمنٹل ٹیمیں شرکت کریں گی اور مقابلوں کا آغاز 12 ستمبر سے ہوگا۔

ٹورنامنٹ کے میچز پشاور، ایبٹ آباد، اسلام آباد اور راولپنڈی میں کھیلے جائیں گے۔ مقابلوں کے لیے عمران خان سٹیڈیم پشاور، ایبٹ آباد کرکٹ سٹیڈیم، ڈائمنڈ کرکٹ گراؤنڈ اسلام آباد اور شعیب اختر کرکٹ سٹیڈیم راولپنڈی کو وینیوز مقرر کیا گیا ہے۔

پریذیڈنٹس ٹرافی گریڈ ون میں مجموعی طور پر سات راؤنڈز کھیلے جائیں گے، جبکہ ہر راؤنڈ میں چار فرسٹ کلاس میچز ہوں گے۔ ٹورنامنٹ میں 28 چار روزہ اور ایک پانچ روزہ فرسٹ کلاس میچ کھیلا جائے گا۔

ٹورنامنٹ کا فائنل پوائنٹس ٹیبل کی ٹاپ دو ٹیموں کے درمیان 24 سے 28 اکتوبر تک کھیلا جائے گا۔

ٹورنامنٹ میں غنی گلاس، کے آر ایل، کنگز مین اکیڈمی، ایم آئی ٹی سلوشنز، او جی ڈی سی ایل، پی ٹی وی، اسٹیٹ بینک آف پاکستان (ایس بی پی) اور سوئی ناردرن گیس پائپ لائن لمیٹڈ (ایس این جی پی ایل) کی ٹیمیں حصہ لیں گی۔

Substandard spices, meat and milk confiscated by Food Authority

پشاور اور مانسہرہ میں جعلی مصالحہ جات اور غیر معیاری گوشت و دودھ ضبط

پشاور: خیبرپختونخوا فوڈ سیفٹی اینڈ حلال فوڈ اتھارٹی کی فوڈ سیفٹی ٹیموں نے پشاور اور مانسہرہ میں کارروائیاں کرتے ہوئے جعلی برانڈڈ مصالحہ جات، غیر معیاری دودھ اور گوشت سمیت بڑی مقدار میں مضرِ صحت اشیاء ضبط کر لیں۔

فوڈ اتھارٹی کے ترجمان کے مطابق پشاور میں فوڈ سیفٹی ٹیم نے جعلی برانڈڈ مصالحہ جات اور کسٹرڈ کی پیکنگ کرنے والی ایک یونٹ پر چھاپہ مارا۔ کارروائی کے دوران تقریباً 2 ہزار کلوگرام مختلف اشیاء، مصالحہ جات، اسٹارچ، پیکنگ میٹریل، رولز اور دیگر سامان تحویل میں لے لیا گیا۔

ترجمان کے مطابق جعلی اور غیر معیاری اشیاء کی پیکنگ میں ملوث یونٹ کے خلاف مزید قانونی کارروائی شروع کر دی گئی ہے۔

دوسری جانب مانسہرہ میں فوڈ سیفٹی ٹیم نے داخلی راستوں پر علی الصبح ناکہ بندی کرتے ہوئے خوراک لے جانے والی گاڑیوں کی چیکنگ کی۔ جدید موبائل فوڈ ٹیسٹنگ لیبارٹری کے ذریعے موقع پر دودھ اور دیگر اشیائے خورونوش کے نمونوں کی جانچ بھی کی گئی۔

کارروائی کے دوران 150 لیٹر ملاوٹ شدہ دودھ کی نشاندہی ہوئی جسے موقع پر تلف کر دیا گیا، جبکہ پنجاب سے مانسہرہ لایا جانے والا 415 کلوگرام غیر معیاری گوشت بھی پکڑ کر تلف کر دیا گیا۔ ترجمان کے مطابق یہ گوشت ضلع مانسہرہ کے مختلف علاقوں میں سپلائی کیا جانا تھا۔

فوڈ اتھارٹی کے مطابق خلاف ورزی کے مرتکب افراد کے خلاف قانونی کارروائی عمل میں لائی گئی اور بھاری جرمانے بھی عائد کیے گئے۔

Mardan Crackdown

مخالف سمت سے آنے والی گاڑیوں کے خلاف ٹریفک پولیس کا کریک ڈاؤن

مردان: ٹریفک وارڈن پولیس مردان نے ون وے کی خلاف ورزی کرنے والی گاڑیوں کے خلاف کارروائی کرتے ہوئے متعدد گاڑیوں کے چالان کر دیے۔

ٹریفک پولیس کے مطابق ڈی ایس پی ٹریفک کی زیرِ قیادت ٹریفک وارڈن پولیس نے پی ایس او یوٹرن، نزد ایم سی ہسپتال، پر خصوصی کارروائی کی۔ اس دوران مخالف سمت سے آنے اور ٹریفک قوانین کی خلاف ورزی کرنے والی متعدد گاڑیوں کے چالان کیے گئے۔

پولیس حکام کا کہنا ہے کہ مذکورہ یوٹرن پر ون وے کی خلاف ورزی کے باعث حادثات اور ٹریفک کی روانی میں خلل کے مسائل پیدا ہو رہے تھے، جس کے تدارک اور شہریوں کی جان و مال کے تحفظ کے لیے کارروائی عمل میں لائی گئی۔

ٹریفک وارڈن پولیس نے شہریوں سے اپیل کی ہے کہ ون وے سمیت تمام ٹریفک قوانین کی پابندی کریں اور محفوظ سفر کو یقینی بنانے کے لیے پولیس کے ساتھ تعاون کریں۔

One Man Commission meeting in Peshawar

اقلیتی حقوق کے تحفظ میں خیبرپختونخوا کی پیش رفت قابلِ تعریف ہے، ڈاکٹر شعیب سڈل

پشاور، 10 ستمبر 2026: اقلیتی برادری کے آئینی و قانونی حقوق اور انہیں حاصل سہولیات سے متعلق ون مین کمیشن کا اہم اجلاس پشاور میں منعقد ہوا، جس کی صدارت ون مین کمیشن کے چیئرمین ڈاکٹر محمد شعیب سڈل نے کی۔ اجلاس میں اقلیتی برادری کے نمائندوں، انتظامی سیکرٹریز اور پولیس حکام نے شرکت کی۔

اجلاس سے خطاب کرتے ہوئے ڈاکٹر محمد شعیب سڈل نے کہا کہ اقلیتی برادری کو آئینی و قانونی حقوق کی فراہمی کے حوالے سے خیبرپختونخوا نے نمایاں پیش رفت کی ہے۔ انہوں نے اقلیتی حقوق سے متعلق سپریم کورٹ کی ہدایات پر عملدرآمد میں صوبے کی کارکردگی کو قابلِ تعریف قرار دیا۔

اجلاس میں اقلیتی برادری کے لیے مختص پانچ فیصد سرکاری ملازمتوں کے کوٹے پر عملدرآمد کا بھی جائزہ لیا گیا۔ حکام نے اجلاس کو بریفنگ دیتے ہوئے بتایا کہ صوبے میں اقلیتی برادری کے لیے مجموعی طور پر 3,380 سرکاری آسامیاں مختص ہیں، جن میں سے 1,282 اہل امیدواروں کو پانچ فیصد کوٹے کے تحت بھرتی کیا جا چکا ہے، جبکہ 2,106 آسامیاں تاحال خالی ہیں۔

ڈاکٹر شعیب سڈل نے خالی آسامیوں پر اقلیتی امیدواروں کی بروقت بھرتی کے لیے مزید آسانیاں پیدا کرنے کی ہدایت کی۔ انہوں نے کہا کہ مطلوبہ اہلیت رکھنے والے امیدوار دستیاب نہ ہونے کی صورت میں اقلیتی روزگار کوٹے پر عملدرآمد کے لیے متبادل طریقہ کار اور دیگر آپشنز پر غور کیا جائے۔

اجلاس میں اقلیتی نوجوانوں کی استعدادِ کار بڑھانے کے لیے ایک اکیڈمی قائم کرنے کی تجویز بھی پیش کی گئی۔ ڈاکٹر شعیب سڈل نے کہا کہ ایسی اکیڈمی اقلیتی نوجوانوں کو روزگار کے مواقع سے مؤثر طور پر فائدہ اٹھانے میں معاون ثابت ہو سکتی ہے۔

سرکاری جامعات میں اقلیتی طلبہ کے لیے مختص دو فیصد کوٹے پر عملدرآمد بھی اجلاس کا اہم موضوع رہا۔ حکام نے بتایا کہ تمام سرکاری جامعات نے آئندہ داخلوں میں دو فیصد اقلیتی طلبہ کوٹے پر مکمل عملدرآمد کی یقین دہانی کرائی ہے۔

اجلاس کو بریفنگ میں بتایا گیا کہ گوردوارہ سارا گڑھی سنگھ سبھا، ہنگو کو سیکیورٹی فراہم کر دی گئی ہے۔ حکام کے مطابق گوردوارے کی رجسٹریشن مکمل ہوتے ہی مزید ضروری اقدامات کیے جائیں گے۔ ڈاکٹر شعیب سڈل نے متعلقہ حکام کو رجسٹریشن کے عمل میں تعاون کی ہدایت کی۔

اجلاس میں اقلیتی ملازمین کی تقرری اور تبادلوں کے لیے ایک کمیٹی تشکیل دینے کا فیصلہ بھی کیا گیا، جس کی سربراہی ڈاکٹر محمد شعیب سڈل کریں گے۔ کمیٹی اقلیتی ملازمین کی تقرری اور تبادلوں کے عمل کے لیے واضح پالیسی اور رہنما اصول مرتب کرے گی۔

اجلاس میں اس عزم کا اظہار کیا گیا کہ اقلیتی برادری کے حقوق کے تحفظ، انہیں آئینی و قانونی سہولیات کی فراہمی اور عملی مسائل کے حل کے لیے اقدامات جاری رکھے جائیں گے۔ شرکاء نے کہا کہ اقلیتی برادری کے آئینی و قانونی حقوق کا تحفظ حکومت کی ترجیحات میں شامل ہے۔