سوات: کبل دھماکے میں حملے کے شواہد نہیں ملے، دھماکا شارٹ سرکٹ کا نتیجہ ہوسکتا ہے۔
ڈی پی او سوات شفیع اللہ گنڈاپور نے میڈیا سے بات کرتے ہوئے کہا کہ کبل دھماکے کی وجہ بظاہر شارٹ سرکٹ ہوسکتی ہے۔ گو کہ دوسرے عوامل کا بھی جائزہ لیا جارہا ہے۔
ماہرین نے کرائم سین کامعائنہ کیاہے، دھماکے میں کسی خودکش یاحملہ آورکے شواہد نہیں ملے۔ دوسری جانب کبل دھماکے کی تحقیقات کے لیے دو رکنی کمیٹی تشکیل دے دی گئی ہے۔
پولیس ذرائع کےمطابق دھماکے کی تحقیقات کے لیے قائم کمیٹی میں سیکرٹری داخلہ عابد مجید اور ڈی آئی جی اسپیشل برانچ شامل ہیں۔
تحقیقاتی کمیٹی جائے وقوعہ سے ملنے والے شواہد کا جائزہ لے گی اور کمیٹی کو تحقیقات جلد مکمل کرکے رپورٹ پیش کرنے کی ہدایت کی گئی ہے۔
نجی ٹی وی چینل سے گفتگو کرتے ہوئے ڈی پی او شفیع اللہ گنڈاپور نے کہا کہ سوات کے علاقے کبل میں سی ٹی ڈی تھانے میں ہونے والا دھماکا شارٹ سرکٹ کے باعث ہوا، ایک دھماکے کے 12منٹ بعد دوسرا دھماکا ہوا۔
واضح رہےکہ سوات کے علاقے کبل میں سی ٹی ڈی تھانے میں ہونے والے دھماکے سے سی ٹی ڈی کے 2 افسروں سمیت 15 افراد شہید جب کہ 57 زخمی ہوئے۔
