ضلعی انتظامیہ اور فرنٹیئر کور نارتھ کے تعاون سے لال قلعہ میں سات روزہ سپورٹس فیسٹیول اختتام پذیر ہو گیا۔ سپورٹس فیسٹیول میں کرکٹ، والی بال، باسکٹ بال، فٹ بال، رسہ کشی، کراٹے اور میراتھن کے مقابلے منعقد ہوئے۔ جس میں 46 ٹیموں سمیت 600 کھلاڑیوں نے شرکت کی۔ اختتامی تقریب میں ضلعی انتظامیہ اور فرنٹیئر کور نارتھ کے اعلی حکام نے بطور مہمان خصوصی شرکت کی مختلف سپورٹس ایونٹس میں پہلی اور دوسری پوزیشن لینے والے کھلاڑیوں کو ٹرافیاں اور شیلڈز دیں۔ دیر کی تاریخ میں پہلی مرتبہ سب ڈویژن لال قلعہ میں 7 روزہ سپورٹس ایونٹس کا انعقاد کیا گیا۔ سپورٹس فیسٹول کے انعقاد سے علاقے کے مثبت پہلو کے ساتھ ساتھ نیا ٹیلنٹ بھی سامنے آئے گا۔ سپورٹس فیسٹول کو بڑی تعداد میں علاقہ کے نوجوانوں نے دیکھا۔ اختتامی تقریب کے موقع پر نوجوانوں نے منتظمین کا شکریہ ادا کرتے ہوئے کہا کہ اس طرح کے فیسٹیول کا انعقاد پورا سال جاری رکھا جائے تاکہ نوجوانوں کو صحت مند سرگرمیوں میں حصہ لینے کا موقع ملے۔
