صوابی میں سپیشل سروسز گروپ فاؤنڈیشن کے تعاون سے فری میڈیکل کیمپ کا انعقاد

صوابی کے گاؤں پرمولو میں مقامی نوجوانوں کی تنظیم نے سپیشل سروسز گروپ فاؤنڈیشن کے تعاون سے ایک فری میڈیکل کیمپ کا انعقاد کیا۔ اس کیمپ میں 450 مریضوں کا معائنہ کیا گیا اور مفت ادویات دی گئیں۔ میڈیکل کیمپ میں آنے والوں میں زیادہ تر خواتین مریض تھیں۔ اس موقع پر ڈاکٹروں کا کہنا تھا کہ اس علاقے کے اکثر لوگ خوراک کی کمی اور لاعلمی کے باعث مختلف بیماریوں میں مبتلا ہو رہے ہیں۔ ڈاکٹر حیدر کے مطابق اس کیمپ میں کچھ ایسے بچے لائے گئے تھے جنہیں ناقص خوراک کی وجہ سے صحت کے مسائل تھے۔ میڈیکل کیمپ کے سربراہ ڈاکٹر مقدس نے کہا کہ وہ زیادہ تر دور دراز علاقوں کے غریب لوگوں کا علاج کرتے ہیں اور آئندہ بھی یہ کام جاری رکھیں گے۔