خیبرپختونخوا ویمن بیڈمنٹن چیمپئن شپ مانسہرہ میں شروع

خیبرپختونخوا ویمن بیڈمنٹن چیمپئن شپ مانسہرہ میں شروع ہوگئی۔ جس میں صوبے بھر سے خواتین کھلاڑی شرکت کررہی ہیں۔ چیمپئن شپ کا باضابطہ افتتاح ڈپٹی کمشنر مانسہرہ خالد اقبال خٹک نے کیا ان کے ہمراہ خاتون اسسٹنٹ کمشنر مانسہرہ منیبہ فاطمہ، اسسٹنٹ کمشنر بالاکوٹ بشارت شاہ ،صوبائی بیڈمنٹن ایسوسی ایشن کے سیکرٹری محمد امجد خان ، آرگنائزنگ سیکرٹری بشریٰ ، کوچز حیات اﷲ ، ندیم خان ، فنانس سیکرٹری میاں صداقت شاہ سمیت دیگر اہم شخصیات موجود تھیں ۔ کمشنر ہزارہ ظہیر السلام کی خصوصی ہدایت پر ضلعی انتظامیہ ، ڈسٹرکٹ سپورٹس آفس مانسہرہ اور صوبائی بیڈمنٹن ایسوسی ایشن کے باہمی اشتراک سے خیبرپختونخوا ویمن بیڈمنٹن چیمپئن شپ ضلع مانسہرہ میں شروع ہوگئی ہے چیمپیئن شپ میں خیبر پختونخوا کے مختلف اضلاع سے خواتین کھلاڑی حصہ لے رہی ہیں۔ جن میں پشاور ، چارسدہ ، سوات ، مردان ، نوشہرہ ، کوہاٹ ، صوابی ، ایبٹ آباد ، ہری ہور ، اور مانسہرہ کے کھلاڑی شامل ہیں۔ مانسہرہ کی تاریخ میں پہلی مرتبہ خواتین کے اتنے بڑے ایونٹ کا انعقاد کیا گیا ہے۔۔ چیمپیئن شپ کے ریفری کے فرائض محمد امجد خان سیکریٹری جنرل خیبرپختونخوا بیڈمنٹن ایسوسی ایشن سر انجام دے رہے ہیںجبکہ چیف ایمپائر کے فرائض زرک خان سر انجام دے رہے ہیں۔ چیمپیئن شپ کا فائنل 15 نومبر کو کھیلا جائے گا۔ چیمپیئن شپ میں خواتین کے سنگلز اور ڈبلز کے مقابلے منعقد کرائے جائیں گے۔