سکواش پلیئر ابراہیم محب کی انڈر 19میں پہلی پوزیشن

پاکستان آرمی کے باصلاحیت کھلاڑی نیشنل چیمپئن ابراہیم محب انڈر19 نمبرون پوزیشن مستحکم کرکے سکواش کھیل میں عروج کی جانب گامزن ہیںوہ اپنی زبردست کارکردگی اور مستقل محنت کی بدولت نیشنل رینکنگ میں انڈر 19 میںپہلی پوزیشن پر براجمان ہیں‘ پاکستان سکواش فیڈریشن کی جاری کردہ حالیہ نئی رینکنگ کے مطابق ابرہیم محب نے سب کو پیچھے چھوڑتے ہوئے ٹاپ پوزیشن سنبھال لی ہے۔ یہ واحد کھلاڑی ہیں جو تسلسل کے ساتھ اپنی کارکردگی میں نکھار لا رہے ہیں‘ جنہوں نے اپنی صلاحیتوں کا لوہا آسٹریلیا اور جاپان کی جونیئر چیمپئن شپ میں بھی منوایا ہے۔ابرہیم محب پاکستان نمبرون اورنیشنل انڈر 17 چیمپئن بھی ہیں ‘ابرہیم محب نے بات چیت کرتے ہوئے کہا کہ وہ کھیل کے ساتھ اپنی جسمانی فٹنس پر بھی بھرپور توجہ دیتے ہیں۔ ان کے دن کا آغاز صبح کے وقت ایک سے دو گھنٹے کی سخت ورزش سے ہوتا ہے جس کے بعد وہ سکواش کورٹس میں بھرپور ٹریننگ کرتے ہیں۔ اس کے بعد دوپہر کو دوبارہ ٹریننگ کرتے ہیں تاکہ ان کی جسمانی و ذہنی صلاحیتوں کیساتھ انکے کھیل میں مزید نکھار پیدا ہو سکے۔ ان کا کہنا ہے کہ سکواش کے سابق عالمی چیمپئنز جان شیر خان، جہانگیر خان، محب اللہ خان، اور قمر زمان جیسے لیجنڈز ان کے لیے ایک تحریک ہیں، اور وہ ان عظیم کھلاڑیوں کی طرح عالمی چیمپئن بننا چاہتے ہیں جس کے لئے وہ شبانہ روز محنت کررہے ہیں‘ابرہیم محب کی تربیت میں ان کے کوچز کا کردار بھی ناقابلِ فراموش ہے، جو نہ صرف ان کی تکنیکی مہارتوں کو بہتر بناتے ہیں بلکہ ان کے حوصلے اور عزم کو بھی بڑھاتے ہیں۔ ان کا کہنا تھا کہ وہ ایک روز ضرور عالمی چیمپئن بننے میں کامیاب ہوں گے‘ وہ اس سال دسمبر میں سکاٹش جونیئر چیمپئن شپ میں شرکت کا ارادہ رکھتے ہیں اور امید ہے کہ وہ اس میں بھی کامیاب ہوں گے۔