مردان میں 2ماہ کیلئے پتنگ بازی پر پابندی عائد، دفعہ 144نافذ

مردان ۔ڈپٹی کمشنر مردان ڈاکٹر عظمت اللہ وزیر نے ضلع میں پتنگ بازی پر مکمل پابندی عائد کرتے ہوئے دو ماہ کے لیے دفعہ 144 نافذ کر دی ہے۔ اس حکم نامے کے تحت پتنگ بنانے، فروخت کرنے، خریدنے اور اڑانے پر مکمل پابندی ہوگی۔ ضلعی انتظامیہ کے مطابق یہ اقدام شہریوں کی حفاظت اور امن و امان کی صورتحال کو برقرار رکھنے کے لیے اٹھایا گیا ہے، کیونکہ پتنگ بازی کے دوران کیمیکل والی ڈور اور دھاتی تار کے استعمال سے قیمتی جانوں کو خطرہ لاحق ہو سکتا ہے۔ ڈپٹی کمشنر نے کہا کہ دفعہ 144 کی خلاف ورزی کرنے والوں کے خلاف سخت قانونی کارروائی کی جائے گی اور متعلقہ تھانوں کو ہدایت دی گئی ہے کہ وہ خلاف ورزی کرنے والوں کے خلاف فوری ایکشن لیں۔ ضلعی پولیس اور انتظامیہ عوام سے تعاون کی اپیل کرتے ہوئے کہا کہ وہ قانون پر عمل کریں اور کسی بھی مشکوک سرگرمی کی اطلاع متعلقہ حکام کو دیں۔ یہ پابندی دو ماہ کے لیے نافذ رہے گی، اور بعد ازاں اس میں توسیع یا نرمی کا فیصلہ حالات کے مطابق کیا جائے گا۔