سائبر کرائم کے بڑھتے ہوئے خطرات کے پیش نظر، حکومتِ پاکستان نے ایف آئی اے کے سابقہ سائبر کرائم ونگ کو ایک خود مختار ادارے کی حیثیت دے دی ہے۔ نیا ادارہ’’ نیشنل سائبر کرائم انوسٹیگیشن ایجنسی‘‘ کے نام سے قائم کیا گیا ہے۔ جسے ملک بھر میں سائبر کرائم کی روک تھام، تحقیقات اور کارروائیوں کیلئے مکمل اختیار حاصل ہے۔ آن لائن دھوکہ دہی، ہراسانی، ڈیجیٹل بلیک میلنگ، جعلی ویب سائٹس، شناخت کی چوری، سوشل میڈیا کرائم اور دیگر سائبر سرگرمیوں کے خلاف مؤثر اقدامات کرے گا۔ اس کے ساتھ ہی سائبر کرائمز کی تحقیقات اور شکایات کے لیے ایف آئی اے کا سائبر کرائم ونگ ختم کر دیا گیا ہے اور سائبر کرائمز سے متعلق تمام معاملات کیلئے نیشنل سائبر کرائم انوسٹیگیشن ایجنسی (NCCIA) کو ذمہ داری سونپی گئی ہے۔ اب سائبر کرائمز کی تحقیقات اور شکایات کیلئے ایف آئی اے کی بجائےآپ ’’نیشنل سائبر کرائم انوسٹیگیشن ایجنسی‘‘ سے رابطہ کر سکتے ہیں۔ عوام الناس سے گزارش ہےکہ اگر آپ کو کسی بھی قسم کے سائبر کرائم یا مشکوک آن لائن سرگرمی کی شکایت یا معلومات ہوں۔ فوری طور پر نیشنل سائبر کرائم انوسٹیگیشن ایجنسی کی ہیلپ لائن نمبر 0519106691 یا ای میل helpdesk@nr3c.gov.pk پر رابطہ کریں۔ سائبر کرائم کے حوالے سے تحقیقات و شکایات کا ’’ایف آئی اے‘‘ سے کوئی تعلق نہیں۔ سائبر کرائم کی شکایات سے متعلق رہنمائی اور تعاون کے لیے قریبی NCCIA سرکل وزٹ کریں۔