خیبرپختونخوا ٹورازم اتھارٹی کے زیر اہتمام 2025-26 کو “تریچ میر سال” کے طور پر منانے کا آغاز سیرینا ہوٹل اسلام آباد میں ایک پروقار تقریب سے ہوا۔ یہ اقدام تریچ میر کی پہلی کامیاب کوہ پیمائی کے 75 سال مکمل ہونے پر کیا گیا۔ صوبائی مشیر خزانہ مزمل اسلم نے کوہ پیماؤں کے لیے اگلے دو سال تک رائلٹی فیس ختم کرنے کا اعلان کیا اور بتایا کہ 70 افراد کو حکومت مکمل معاونت فراہم کرے گی۔ ناروے کے ڈپٹی ہیڈ آف مشن تھامس ڈار نے تقریب میں شرکت کی اور دونوں ممالک کے تعلقات کو سراہا۔ تقریب میں 1950 کی پہلی مہم جوئی اور 1991 کی پاکستانی ٹیم کی کوہ پیمائی پر مبنی ڈاکومنٹری بھی پیش کی گئی۔
