چارسدہ – فاروقِ اعظم چوک میں چنگ چی رکشہ ڈرائیورز نے ٹی ایم اے کے نئے روڈ ٹیکس کے خلاف شدید احتجاج کیا اور چوک کو ہر قسم کی ٹریفک کے لیے مکمل بند کر دیا۔
مظاہرین نے 100 روپے روڈ ٹیکس کو مہنگائی کے دور میں ناقابل برداشت قرار دیتے ہوئے کہا کہ “ایک طرف مہنگائی، دوسری طرف ٹی ایم اے کا ظالمانہ ٹیکس، ہم کہاں جائیں؟”
مظاہرین کا کہنا تھا کہ ہم بمشکل ایک وقت کی روٹی کما سکتے ہیں، ٹیکس کہاں سے دیں؟ ٹریفک پولیس پر بھی سخت نعرے بازی کی گئی۔ “720 روپے کے چالان دیے جاتے ہیں، ہم یہ کیسے ادا کریں؟”
رکشہ ڈرائیورز نے منتخب نمائندوں کو بھی آڑے ہاتھوں لیا، کہ وہ صرف ووٹ لینے کے دن نظر آتے ہیں، بعد میں غائب ہو جاتے ہیں۔ مظاہرین نے مطالبہ کیا کہ ٹی ایم اے یہ ظالمانہ روڈ ٹیکس فوری واپس لے، ورنہ احتجاج جاری رہے گا۔
