صوبائی ڈیزاسٹر مینجمنٹ اتھارٹی (پی ڈی ایم اے) نے گزشتہ دو روز کے دوران ہونے والی شدید بارشوں اور فلش فلڈ کے باعث خیبرپختونخوا کے مختلف اضلاع میں جانی و مالی نقصانات کی ابتدائی رپورٹ جاری کر دی ہے۔ رپورٹ کے مطابق مختلف حادثات میں اب تک 13 افراد جاں بحق اور 3 زخمی ہوئے ہیں۔ جاں بحق افراد میں 9 بچے، 3 خواتین اور ایک مرد شامل ہے، جبکہ زخمی ہونے والوں میں 2 بچے اور ایک خاتون شامل ہے۔ پی ڈی ایم اے کے مطابق بارشوں اور سیلاب کے نتیجے میں مجموعی طور پر 19 مکانات متاثر ہوئے، جن میں سے 17 کو جزوی جبکہ 2 کو مکمل نقصان پہنچا۔ یہ حادثات سوات، بونیر، باجوڑ، تورغر، اپر کوہستان، مردان، کرم، ہری پور، مانسہرہ، اپر چترال، ملاکنڈ اور شانگلہ کے اضلاع میں پیش آئے۔
ادارے کے مطابق شدید بارشوں کا یہ سلسلہ 25 جولائی تک وقفے وقفے سے جاری رہنے کا امکان ہے، جس کے پیش نظر تمام ضلعی انتظامیہ کو پہلے سے مراسلہ ارسال کیا گیا تھا۔ پی ڈی ایم اے نے تمام متعلقہ اداروں کو ہدایت کی ہے کہ امدادی سرگرمیاں تیز کی جائیں اور متاثرہ افراد کو فوری ریلیف فراہم کیا جائے۔ ساتھ ہی سیاحتی مقامات پر بند سڑکوں اور رابطہ شاہراہوں کی بحالی کے لیے تمام وسائل بروئے کار لانے کی ہدایات بھی دی گئی ہیں۔ سیاحوں کو موسمی صورتحال سے باخبر رکھنے اور احتیاطی تدابیر اپنانے کی ہدایت جاری کی گئی ہے۔ ڈی جی پی ڈی ایم اے کے مطابق تمام ضلعی انتظامیہ، امدادی ٹیمیں، ریسکیو 1122 اور دیگر ادارے رابطے میں ہیں اور صورتحال پر مسلسل نظر رکھی جا رہی ہے۔ پی ڈی ایم اے کا ایمرجنسی آپریشن سنٹر مکمل طور پر فعال ہے اور عوام کسی بھی ناخوشگوار واقعے یا موسمی صورتحال سے متعلق معلومات کے لیے ہیلپ لائن 1700 پر رابطہ کر سکتے ہیں۔
