خیبرپختونخوا کے سیلاب سے متاثرہ اضلاع شانگلہ اور بونیر میں پاکستان آرمی کے انجینئرز کور کی امدادی سرگرمیاں بدستور جاری ہیں۔ فوجی جوان اور بھاری مشینری مسلسل متاثرہ علاقوں میں عوام کی سہولت اور آمدورفت کی بحالی کے لیے کام کر رہے ہیں۔
مقامی ذرائع کے مطابق پیر بابا بائی پاس کو ہر قسم کی ٹریفک کے لیے کھول دیا گیا ہے جبکہ پیر بابا بازار میں ملبہ ہٹانے کا عمل رات بھر جاری رہا تاکہ شہریوں کو زیادہ سے زیادہ سہولت فراہم کی جا سکے۔ اس کے علاوہ گاؤں گوکند جانے والی مرکزی سڑک کو تین مختلف مقامات پر لینڈ سلائیڈنگ ہٹا کر ٹریفک کے لیے بحال کر دیا گیا ہے۔
آرمی انجینئرز کی بھاری مشینری نے آلوچ پران روڈ سے بھی لینڈ سلائیڈز کو صاف کرکے راستہ کھول دیا ہے۔ دوسری جانب اربن سرچ اینڈ ریسکیو ٹیمیں بیسونی اور قادر نگر کے علاقوں میں بھاری مشینری کی مدد سے مسلسل سرچ آپریشن میں مصروف ہیں۔ اب تک بیشونی کے قریب نالے سے پانچ افراد کی لاشیں نکال لی گئی ہیں۔
