ڈپٹی کمشنر مردان کی ہدایت پر آج ایڈیشنل ڈپٹی کمشنر جناب عید نواز شیرانی کی زیر صدارت موبائل نیٹ ورک فرنچائزز کے نمائندوں کے ساتھ ایک اہم اجلاس منعقد ہوا، جس میں یوفون، جاز، ٹیلی نار اور زونگ سمیت بڑی کمپنیوں کے حکام شریک ہوئے۔ اجلاس میں اسسٹنٹ ڈائریکٹر ایف آئی اے اور ڈی ایس پی سٹی مردان نے بھی شرکت کی۔ اجلاس کا بنیادی ایجنڈا عوام کو سم کارڈ کے اجراء میں درپیش مسائل کے حل اور اس عمل میں شفافیت کو یقینی بنانا تھا۔ اجلاس میں مجوزہ حل پر تفصیل سے بات چیت کی گئی اور موجودہ نظام میں پائے جانے والے چیلنجز اور خامیوں کا جائزہ لیا گیا۔ ایڈیشنل ڈپٹی کمشنر نے تمام اسٹیک ہولڈرز کو بوگس سموں کے اجراء سے ہر حال میں بچنے کی سخت ہدایات جاری کیں اور بائیو میٹرک تصدیق کے طریقہ کار پر مکمل عمل درآمد کی ضرورت پر زور دیا۔ انہوں نے واضح کیا کہ کسی بھی قسم کی غفلت یا خلاف ورزی کی صورت میں سخت قانونی کارروائی کی جائے گی۔ اجلاس کے اختتام پر تمام شرکاء نے اس عزم کا اظہار کیا کہ قانون نافذ کرنے والے ادارے اور موبائل فرنچائزز باہمی تعاون کو مزید مضبوط کریں گے تاکہ سموں کے غلط استعمال کی حوصلہ شکنی کی جا سکے اور مجموعی سیکیورٹی نظام کو مزید مؤثر بنایا جا سکے۔