وزیر اعظم پاکستان اور چیف آف آرمی اسٹاف فیلڈ مارشل سید عاصم منیر نے آج بنوں کا اہم دورہ کیا، جہاں انہوں نے دہشت گردی کے حالیہ واقعات اور ان کے خلاف جاری آپریشنز کے حوالے سے اعلیٰ سطحی اجلاس میں شرکت کی۔ اجلاس میں صوبے میں امن و امان کی صورتحال، دہشت گردی کی نئی لہر اور اس کے تدارک کے لیے کیے جانے والے اقدامات کا تفصیلی جائزہ لیا گیا۔
سیکیورٹی ذرائع کے مطابق وزیر اعظم اور آرمی چیف نے جنوبی وزیرستان میں دہشت گردوں کے خلاف آپریشن کے دوران شہید ہونے والے 12 جوانوں کی نمازِ جنازہ میں بھی شرکت کی اور شہداء کو شاندار خراجِ عقیدت پیش کیا۔
وزیر اعظم نے اس موقع پر اپنے خطاب میں کہا کہ دہشت گردی کے خلاف ریاست بھرپور طاقت کے ساتھ کارروائی جاری رکھے ہوئے ہے اور اس سلسلے میں کسی قسم کے ابہام یا رعایت کی گنجائش نہیں۔ انہوں نے مزید کہا کہ شہداء کی عظیم قربانیاں وطن عزیز کا سب سے قیمتی سرمایہ ہیں اور پاکستان کی سلامتی، امن اور ترقی کے لیے تمام وسائل بروئے کار لائے جائیں گے۔
