پاک فوج کی جانب سے سپیشل بچوں کیلئے قائم “امید اسپیشل ایجوکیشن سکول (USES)” میں سالانہ اسپورٹس گالا کا انعقاد کیا گیا۔ جس میں مختلف اداروں کے خصوصی بچوں نے بھرپور حصہ لیا۔ تقریب کے مہمان خصوصی کور کمانڈر پشاور تھے۔ سپورٹس گالا میں امید اسپیشل سکول پشاور، آشیانہ اسپیشل ایجوکیشن سکول کوہاٹ، ایف جی سکول پشاور، اے پی ایس پشاور اور بیت الیتامہ اسکول کے اسپیشل بچوں نے کرکٹ، بیڈمنٹن، رسہ کشی اور فٹبال سمیت متعدد کھیلوں میں حصہ لیا۔
تقریب میں خصوصی بچوں نے خوبصورت ٹیبلوز بھی پیش کیے جنہیں حاضرین نے بے حد سراہا۔ امید اسپیشل سکول پشاور میں اس وقت 188 خصوصی بچے زیرِ تعلیم ہیں۔ جہاں انہیں تعلیم کیساتھ ساتھ تربیت، نگہداشت اور بحالی کی سہولیات فراہم کی جاتی ہیں۔ اسکول میں قوتِ بینائی، قوتِ سماعت، جسمانی اور ذہنی معذوری کے شکار بچوں کی خصوصی ضروریات کے مطابق تعلیم و تربیت کا جامع نظام موجود ہے۔ انتظامیہ کے مطابق اسکول کے تین ہونہار طلبہ بین الاقوامی مقابلوں میں بھی حصہ لے چکے ہیں۔ جو ادارے کی معیاری تعلیم و تربیت کا واضح ثبوت ہے۔ تقریب کے اختتام پر مہمانِ خصوصی نے خصوصی بچوں میں تحائف تقسیم کئے اور ان کی محنت، ہمت اور کارکردگی کو سراہتے ہوئے کہا کہ ایسے پروگرام خصوصی بچوں میں اعتماد اور آگے بڑھنے کی صلاحیت پیدا کرتے ہیں۔
