خیبرپختونخوا کے سرحدی اضلاع سے تعلق رکھنے والی تاجر برادری کے جرگہ نے گورنر خیبرپختونخوا فیصل کریم کنڈی سے ملاقات کی۔ وفد کی قیادت FPCCI کی اسٹینڈنگ کمیٹی برائے تجارتی امور افغانستان و سنٹرل ایشیا کے چیئرمین شاہد شنواری نے کی، جبکہ وفد میں واجد علی شنواری، حضرت علی شنواری، شاہ خالد، قدیر اللہ وزیر، سبحان اللہ، قسیم خان اور دیگر نمائندگان شامل تھے۔ وفد نے گورنر کو بتایا کہ افغانستان کے ساتھ سرحد کی بندش سے کاروباری سرگرمیاں شدید متاثر ہیں۔ خیبرپختونخوا کے سرحدی اضلاع میں تجارت تقریباً ٹھپ ہو چکی ہے۔ جس کےحل کیلئے فوری حکومتی اقدامات ناگزیر ہیں۔
گورنر خیبرپختونخوا فیصل کریم کنڈی نے تاجروں کو یقین دلایا کہ صوبے میں امن کے بغیر تجارت اور معیشت کا پہیہ نہیں چل سکتا۔ انہوں نے کہا کہ بدامنی کے اکثر واقعات افغانستان سے جڑے ہیں اور مذاکرات کے دوران افغان انتظامیہ کا رویہ بھی تسلی بخش نہیں رہا۔ گورنر کا کہنا تھا کہ سیکورٹی فورسز، طلبہ، تاجر اور سیاستدان سب دہشت گردی کا نشانہ بنے۔ اس لئے امن کیلئے آپریشن انتہائی ضروری ہے۔ انہوں نے تاجروں کے مسائل کے حل کا یقین دلاتے ہوئے کہا کہ وہ صدرِ پاکستان اور وزیرِاعظم سے تاجروں کے جرگہ کی ملاقات کیلئے بھرپور کردار ادا کریں گے اور ان کے “وکیل اور پل” کا کردار ادا کریں گے۔ ملاقات میں غلام خان ٹریڈ شمالی وزیرستان کے صدر حاجی ملک عبداللہ خان اور جنرل سیکرٹری قمر زمان محسود بھی موجود تھے۔
