مولانا محمد طیب قریشی نے کہا کہ پوری قوم سانحہ اے پی ایس میں ملوث درندوں کو کبھی معاف نہیں کرے گی۔ انہوں نے کہا کہ شہید ہونے والے بچے صرف ان کے والدین کے نہیں بلکہ پوری قوم کے بچے تھے، یہی وجہ ہے کہ آج پوری پاکستانی قوم ان ننھے شہداء اور انہیں بچانے والے فوجی جوانوں کی یاد میں یہ دن منا رہی ہے۔ ہمیں اے پی ایس کے معصوم شہداء کے ساتھ ساتھ پاک فوج اور دیگر سیکیورٹی اداروں کے ان جوانوں کو بھی یاد رکھنا چاہیے جنہوں نے اپنی جانوں کا نذرانہ دے کر بچوں کی جانیں بچائیں۔ انہوں نے کہا کہ پوری قوم شہداء کے خاندانوں کے غم میں برابر کی شریک ہے اور ان کے حوصلے اور استقامت کو سلام پیش کرتی ہے۔
انہوں نے قوم سے اپیل کی کہ دہشتگردی کے خلاف متحد ہو کر کھڑے ہوں اور پاک فوج اور سیکیورٹی اداروں کے دست و بازو بنیں۔ انہوں نے کہا کہ ملک کے لیے پاک فوج، پولیس اور دیگر سیکیورٹی اداروں کی قربانیاں قابلِ فخر ہیں اور مدارس و علماء کرام پاک فوج کے شانہ بشانہ کھڑے ہیں اور کھڑے رہیں گے۔ پوری قوم افواجِ پاکستان خصوصاً فیلڈ مارشل سید عاصم منیر کی شکر گزار ہے جن کی قیادت میں معرکۂ حق اور آپریشن بنیان مرصوص میں اللہ کے فضل سے پاکستان کو دشمن پر فتح نصیب ہوئی، جس کا اعتراف دنیا بھر میں کیا جا رہا ہے، اور آج ہر پاکستانی اپنے پاکستانی ہونے پر فخر محسوس کر رہا ہے۔
