صدر مملکت آصف علی زرداری اور وزیر اعظم پاکستان شہباز شریف نے نئے سال کے موقع پر پوری قوم کو مبارکباد دیتے ہوئے ملک کی ترقی، خوشحالی اور استحکام کے لیے نیک تمناؤں کا اظہار کیا ہے۔ صدر مملکت آصف علی زرداری نے اپنے پیغام میں کہا کہ پاکستان کو مختلف چیلنجز کا سامنا ہے، تاہم قوم بے بس نہیں، اتحاد، استقامت، تخلیقی صلاحیت اور پختہ یقین کے ذریعے تمام مشکلات پر قابو پایا جا سکتا ہے۔ انہوں نے کہا کہ بحیثیت قوم اور ریاست کے نگہبان ہونے کے ناطے ہمیں اپنی ذمہ داریوں کی تجدید کرنا ہوگی تاکہ درپیش چیلنجز کا مؤثر انداز میں مقابلہ کیا جا سکے۔
وزیر اعظم شہباز شریف نے نئے سال کے موقع پر قوم کو مبارکباد دیتے ہوئے دعا کی کہ نیا سال ملک کے لیے خوشحالی، ترقی اور استحکام کی نوید ثابت ہو۔ انہوں نے کہا کہ سال 2025 دفاعِ وطن کے حوالے سے تاریخ میں سنہری حروف میں لکھا جائے گا اور پوری قوم اپنی بہادر مسلح افواج کے شانہ بشانہ کھڑے ہو کر ملک کے دفاع کے لیے سیسہ پلائی دیوار بنے گی۔
