انڈر 16 گیمزکا باضابط افتتاح وزیراعلیٰ خیبرپختونخوا جمرود سپورٹس کمپلیکس میں کریں گے۔ گیمز میں کرکٹ، فٹ بال، والی بال، باسکٹ بال اور ہاکی کے مقابلے شامل ہیں۔ جس میں ایک ہزار سے زائد کھلاڑی مدمقابل ہوں گے۔ان خیالات کا اظہار ڈائریکٹر سپورٹس قبائلی اضلاع نے میڈیا سے گفتگو کرتے ہوئے کیا۔ انہوں نے کہا کہ پہلی مرتبہ قبائلی اضلاع کے کھلاڑیوں کیلئے انڈر 16 گیمز کا انعقاد کیا جا رہا ہے۔ جس کا بنیادی مقصد گراس روٹ لیول سے نوجوان کھلاڑیوں کو مواقع فراہم کرنا اور ان کی صلاحیتوں کو نکھارنا ہے تاکہ یہ کھلاڑی مستقبل میں ملک و قوم کا نام روشن کر سکیں۔انہوں نے مزید بتایا کہ دوسرے مرحلے میں مختلف کھیلوں کے ٹیلنٹ ہنٹ اور ٹیلنٹ گرومنگ پروگرامز کا بھی اجرا کیا جائے گا، جس کے ذریعے قبائلی اضلاع کے کھلاڑیوں کی پوشیدہ صلاحیتوں کو سامنے لا کر انہیں مزید بہتر انداز میں تیار کیا جائے گا۔عمر ارشد خان کا کہنا تھا کہ وزیر اعلیٰ خیبرپختونخوا محمد سہیل آفریدی کی خصوصی ہدایات پرمشیر کھیل خیبرپختونخوا تاج محمد ترندکی سربراہی میں تمام ضم اضلاع میں جدید سہولیات سے آراستہ سپورٹس کمپلیکسز پر کام جاری ہے، جن میں سے 6 سپورٹس کمپلیکس تقریباً مکمل ہو چکے ہیں جبکہ دو کو سالانہ ترقیاتی پروگرام (اے ڈی پی) میں شامل کیا گیا ہے۔ اسی طرح 39 مقامات پر مختلف کھیلوں کی سہولیات دستیاب ہیں۔انہوں نے کہا کہ مستقبل میں ضم اضلاع خواتین گیمز، انٹر مدارس گیمز اور مائنارٹی گیمز کا بھی انعقاد کیا جائے گا تاکہ تمام طبقات کو مساوی بنیادوں پر کھیلوں کے مواقع فراہم کیے جا سکیں۔ڈائریکٹر سپورٹس نے بتایا کہ ضم اضلاع انڈر 16 گیمز کے پہلے مرحلے میں تمام اضلاع میں مقابلے منعقد کیے گئے اور ڈویڑنل سطح پر باقاعدہ ٹرائلز کے ذریعے کھلاڑیوں کا شفاف انتخاب عمل میں لایا گیا۔انہوں نے مزید بتایا کہ انڈر 16 گیمز کے کرکٹ مقابلے حیات آباد سپورٹس کمپلیکس پشاور، فٹ بال مقابلے طہماس خان فٹ بال گراو ¿نڈ، ہاکی اور باسکٹ بال کے مقابلے پشاور سپورٹس کمپلیکس جبکہ والی بال کے مقابلے پی ایس بی ہال پشاور میں منعقد ہوں گے۔