تحصیل رزڑ کے گاؤں یعقوبی میں امن و امان کے قیام، منشیات کے خاتمے اور نوجوان نسل کے محفوظ و روشن مستقبل کے لیے ایک پُرامن ریلی نکالی گئی، جس میں گاؤں کے معزز مشران، نوجوانوں سمیت سماجی، سیاسی اور اصلاحی شخصیات نے کثیر تعداد میں شرکت کی۔
ریلی کے شرکاء نے امن، بھائی چارے اور منشیات کے خلاف نعرے درج بینرز اور پلے کارڈز اٹھا رکھے تھے۔ ریلی گاؤں کے مختلف راستوں سے ہوتی ہوئی اختتام پذیر ہوئی، جس کے بعد ایک مختصر اجتماع کا انعقاد کیا گیا۔
اجتماع سے خطاب کرتے ہوئے گاؤں کے مشران اور سماجی رہنماؤں نے کہا کہ منشیات نوجوان نسل کو تباہی کی طرف دھکیل رہی ہیں، جس کے خلاف اجتماعی اور منظم جدوجہد وقت کی اہم ضرورت ہے۔ مقررین نے اس بات پر زور دیا کہ امن و امان کے بغیر ترقی اور خوشحالی ممکن نہیں، اور گاؤں کو منشیات سے پاک کرنا ہم سب کی مشترکہ ذمہ داری ہے۔
اس موقع پر گاؤں کے مشران اور عوام نے متفقہ طور پر عہد کیا کہ وہ منشیات فروشوں کے خلاف آواز بلند کریں گے، نوجوانوں کو مثبت اور تعمیری سرگرمیوں کی جانب راغب کریں گے اور اپنے علاقے میں امن و امان کو ہر صورت یقینی بنائیں گے۔
ریلی کے شرکاء نے متعلقہ اداروں سے مطالبہ کیا کہ منشیات کے خلاف کارروائیاں مزید تیز کی جائیں اور نوجوانوں کے بہتر مستقبل کو یقینی بنانے کے لیے عملی اور مؤثر اقدامات اٹھائے جائیں۔
