یومِ یکجہتی کشمیر کے موقع پر وزیراعلیٰ خیبرپختونخوا نے کشمیری عوام کے ساتھ بھرپور یکجہتی کا اظہار کرتے ہوئے کہا ہے کہ کشمیری عوام کا حقِ خودارادیت ان کا بنیادی اور مسلمہ حق ہے۔ جسے طاقت کے زور پر دبایا نہیں جا سکتا۔ انہوں نے کہا کہ 1947 سے آج تک کشمیری عوام بھارتی جبر، محاصرے اور انسانی حقوق کی سنگین پامالیوں کا سامنا کر رہے ہیں، جبکہ مقبوضہ کشمیر میں ماورائے عدالت قتل اور جبری گمشدگیاں بین الاقوامی قوانین کی کھلی خلاف ورزی ہیں۔ وزیراعلیٰ نے کہا کہ خیبرپختونخوا کی حکومت اور عوام ہر فورم پر اپنے کشمیری بھائیوں کے ساتھ شانہ بشانہ کھڑے ہیں اور ان کی سیاسی، اخلاقی اور سفارتی حمایت جاری رکھیں گے۔ انہوں نے اقوامِ متحدہ سے مطالبہ کیا کہ وہ اپنی قراردادوں کے مطابق کشمیری عوام کو حقِ خودارادیت دلانے کے لیے عملی اور مؤثر اقدامات کرے۔ سہیل آفریدی نے کہا کہ خطے کا پائیدار امن مسئلہ کشمیر کے منصفانہ اور پرامن حل سے وابستہ ہے، اور جب تک کشمیری عوام کو ان کا حق نہیں ملتا، خطے میں مکمل امن ممکن نہیں۔ وزیراعلیٰ نے سابق وزیراعظم عمران خان کے کردار کو سراہتے ہوئے کہا کہ عمران خان نے عالمی فورمز پر کشمیر کا مقدمہ جرات اور مؤثر انداز میں پیش کیا، جس سے عالمی سطح پر اس مسئلے کو اجاگر کرنے میں مدد ملی۔