ایبٹ آباد معذوری کے شکار افراد کے عالمی دن کے حوالے سے سوشل ویلفیئر ڈیپارٹمنٹ ایبٹ آباد کے زیر اہتمام محکمہ تعلیم اور یونیسیف کے تعاون سے تقریب منعقد کی گئی۔ تقریب میں کمشنر ہزارہ ڈویژن سید ظہیر الاسلام نے بطور مہمان خصوصی شرکت کی۔ جبکہ ڈپٹی کمشنر ایبٹ آباد کیپٹن (ر) ثناء اللہ خان بھی ان کے ہمراہ تھے۔پروگرام میں سوشل ویلفیئر ڈیپارٹمنٹ کے زیر انتظام خصوصی بچوں نے شرکت کی اور پرسن ود ڈس ایبیلٹیز کے حوالے سے آگاہی پیغامات پیش کیے، جنہیں حاضرین نے خوب سراہا۔ اس تقریب میں ڈپٹی کمشنر ایبٹ آباد، ڈسٹرکٹ پولیس آفیسر، سوشل ویلفیئر آفیسر، یونیسیف کے عہدیداران اور مختلف شعبہ جات کے نمائندے بھی موجود تھے۔کمشنر ہزارہ سید ظہیر الاسلام نے اس موقع پر کہا کہ معذور افراد ہمارے معاشرے کا لازمی حصہ ہیں اور ان کی فلاح و بہبود کے لیے اجتماعی کوششوں کی ضرورت ہے۔ انہوں نے کہا کہ ایسے افراد کو مواقع اور سہولیات فراہم کرنا ہماری ذمہ داری ہے تاکہ وہ اپنی صلاحیتوں کو بروئے کار لاتے ہوئے معاشرے میں مثبت کردار ادا کر سکیں۔تقریب کے دوران خصوصی بچوں کی کارکردگی نے شرکائ کو متاثر کیا، جبکہ معذور افراد کے حقوق کے حوالے سے آگاہی پیغامات نے حاضرین کو ان کی فلاح و بہبود کے لیے مزید اقدامات پر غور کرنے کی ترغیب دی۔ تقریب کے شرکائ نے اس عزم کا اظہار کیا کہ معذور افراد کے مسائل کے حل اور ان کی زندگی میں بہتری کے لیے ایسے پروگرامز کا سلسلہ جاری رہنا چاہیے۔