ایبٹ آباد یونیورسٹی آف سائنس اینڈ ٹیکنالوجی (AUST) میں الخدمت فاؤنڈیشن ہزارہ اور یونیورسٹی انتظامیہ کے درمیان ایک اہم مشاورتی اجلاس منعقد ہوا۔ اجلاس کا مقصد فلسطینی طلباء کی پاکستان میں اعلیٰ تعلیم کے سلسلے میں داخلے، کفالت اور تعاون سے متعلق حکمت عملی طے کرنا تھا۔ اجلاس میں ایبٹ آباد یونیورسٹی کی جانب سے وائس چانسلر پروفیسر ڈاکٹر ملک مجدد الرحمٰن اور ایڈیشنل ڈائریکٹر اسٹوڈنٹ آفیئرز (انٹرنیشنل اسٹوڈنٹس) راشد محمود نے شرکت کی۔ الخدمت فاؤنڈیشن کی نمائندگی صدر ہزارہ غزن اقبال خان، سینئر نائب صدر ضلع ایبٹ آباد ڈاکٹر عبدالوحید علوی، ڈائریکٹر ایجوکیشنل پروجیکٹس پروفیسر رمضان شیرازی، ایگزیکٹو ممبر محمد وسیم ملک ایڈوکیٹ اور ڈپٹی سیکرٹری وجیہ اللہ خان نے کی۔
وائس چانسلر ڈاکٹر مجدد الرحمٰن نے شرکاء کو خوش آمدید کہتے ہوئے بتایا کہ ایبٹ آباد یونیورسٹی وہ پہلی جامعہ ہے جس نے فلسطینی طلباء کو مختلف بی ایس اور ایم ایس پروگرامز میں داخلے کی پیشکش کی ہے۔ 9 فلسطینی طلباء کا بیچ یونیورسٹی میں داخل ہو رہا ہے جو جلد ہی باقاعدہ کلاسز کا آغاز کریں گے جبکہ مستقبل میں مزید طلباء کے داخلے کا بھی منصوبہ ہے۔اس اقدام کو پاکستان اور فلسطین کے درمیان محبت و ہمدردی کا مظہر قرار دیتے ہوئے وائس چانسلر نے یقین دلایا کہ ایبٹ آباد یونیورسٹی ان طلباء کی نہ صرف تعلیمی بلکہ دیگر غیر تعلیمی ضروریات کو بھی بین الاقوامی معیار کے مطابق پورا کرے گی تاکہ انہیں یہاں محفوظ، باعزت اور گھر جیسا ماحول ملے۔
ڈاکٹر مجدد الرحمٰن کا کہنا تھا “یہ فلسطینی طلباء آج ہمارے مہمان ہیں لیکن کل کو یہ اپنے وطن واپس جا کر پاکستان کے سفیر بنیں گے اور یہاں کے عوام کی مہمان نوازی کو ہمیشہ یاد رکھیں گے۔” انہوں نے امید ظاہر کی کہ یونیورسٹی کا یہ قدم خیبر پختونخوا کی دیگر جامعات کیلئے بھی مشعلِ راہ ثابت ہوگا۔وائس چانسلر نے الخدمت فاؤنڈیشن کی تعلیمی و فلاحی خدمات کو سراہتے ہوئے فلسطینی طلباء کی مکمل کفالت اور ان کی تعلیمی استعداد کو بہتر بنانے کیلئے تعاون کی درخواست کی۔
الخدمت فاؤنڈیشن کے صدر غزن اقبال خان نے کہا کہ ان کا ادارہ ایبٹ آباد یونیورسٹی کے اس اہم انسانی اور تعلیمی مشن میں مکمل ساتھ دے گا۔ انہوں نے یقین دلایا کہ الخدمت فاؤنڈیشن نہ صرف ان طلباء کی کفالت کرے گی بلکہ معاشرتی اور نفسیاتی سطح پر بھی ان کی بھرپور رہنمائی اور مدد کرے گی۔اجلاس کے اختتام پر وائس چانسلر ڈاکٹر مجدد الرحمٰن نے تمام مہمانوں کا شکریہ ادا کیا اور امید ظاہر کی کہ یہ شراکت داری مستقبل میں مزید مضبوط اور مؤثر ثابت ہوگی۔
