راولپنڈی: انٹر سروسز پبلک ریلیشنز (آئی ایس پی آر) کے مطابق 13 مارچ 2026 کو افغان طالبان نے پاکستان کے مختلف علاقوں میں خوف و ہراس پھیلانے کی غرض سے چند ابتدائی نوعیت کے ڈرونز بھیجے، تاہم سیکیورٹی اداروں نے بروقت کارروائی کرتے ہوئے انہیں سافٹ اور ہارڈ کِل طریقوں سے ناکارہ بنا دیا۔
آئی ایس پی آر کے بیان کے مطابق ڈرونز اپنے ہدف تک پہنچنے میں ناکام رہے، تاہم گرنے والے ملبے کے باعث کوئٹہ میں دو بچے جبکہ کوہاٹ اور راولپنڈی میں ایک، ایک شہری زخمی ہو گیا۔
بیان میں کہا گیا ہے کہ یہ حملے عوام میں خوف پیدا کرنے کی کوشش تھے اور یہ افغان طالبان کی دہشت گردانہ ذہنیت کی عکاسی کرتے ہیں۔ آئی ایس پی آر کے مطابق افغان طالبان ایک طرف عالمی ہمدردی حاصل کرنے کے لیے خود کو متاثرہ فریق ظاہر کرتے ہیں جبکہ دوسری جانب دہشت گرد گروہوں اور ڈرون حملوں کے ذریعے شہری آبادی کو نشانہ بناتے ہیں۔
بیان میں مزید کہا گیا ہے کہ پاکستان کی عوام اور مسلح افواج افغانستان پر قابض اس “کرائے کی ملیشیا” کی اصل نیت اور عزائم سے بخوبی آگاہ ہیں۔
آئی ایس پی آر کے مطابق پاکستان کا جاری آپریشن “غضبُ للحق” اس وقت تک جاری رہے گا جب تک افغان طالبان پاکستان کے اس بنیادی مؤقف کا ازالہ نہیں کرتے کہ افغان سرزمین پاکستان کے خلاف دہشت گردی کے لیے استعمال نہ ہو۔
فوج کے شعبہ تعلقات عامہ نے واضح کیا کہ پاکستان کی مسلح افواج دہشت گردی اور اس کی تمام شکلوں کے خلاف اپنی جدوجہد جاری رکھیں گی اور عوام کے تحفظ کے لیے ہر ممکن اقدام اٹھایا جاتا رہے گا۔
